ខេត្តក្រចេះ ៖ បេក្ខជនឈ្មោះឌីន ធារ៉ា អាយុ២១ឆ្នាំ មានទីលំនៅក្នុងភូមិហាន់ជ័យលើ ឃុំហាន់ជ័យ ស្រុកឆ្លូង ដែលប្រឡងសញ្ញាបត្រមធ្យមសិក្សាទុតិយភូមិនៅមណ្ឌលវិទ្យាល័យ ក្រចេះក្រុង សម័យប្រឡងថ្ងៃទី២៥-២៧ ខែកក្កដា ឆ្នាំ២០១១ បានជួបគ្រោះថ្នាក់ចរាចរណ៍រវាងម៉ូតូ និងរថយន្ត ខណៈធ្វើដំណើរបញ្ច្រាសទិសគ្នា
ខេត្តក្រចេះ ៖ បេក្ខជនឈ្មោះឌីន ធារ៉ា អាយុ២១ឆ្នាំ មានទីលំនៅក្នុងភូមិហាន់ជ័យលើ ឃុំហាន់ជ័យ ស្រុកឆ្លូង ដែលប្រឡងសញ្ញាបត្រមធ្យមសិក្សាទុតិយភូមិនៅមណ្ឌលវិទ្យាល័យក្រចេះក្រុង សម័យប្រឡងថ្ងៃទី២៥-២៧ ខែកក្កដា ឆ្នាំ២០១១ បានជួបគ្រោះថ្នាក់ចរាចរណ៍រវាងម៉ូតូ និងរថយន្ត ខណៈធ្វើដំណើរបញ្ច្រាសទិសគ្នា ពេលចេញពីប្រឡងនៅថ្ងៃចុងក្រោយ។ ហេតុការណ៍នេះបណ្តាលឱ្យយុវជនឌីន ធារ៉ា និងឪពុកដែលជិះម៉ូតូឌុបគ្នាត្រឡប់ទៅផ្ទះវិញស្លាប់យ៉ាងអាណោចអាធ័មនៅនឹងកន្លែង។
គ្រោះអកុសលនេះបានកើតឡើងនាល្ងាចថ្ងៃទី២៧ កក្កដា ខណៈយុវជនឌីន ធារ៉ា ធ្វើដំណើរត្រឡប់ទៅផ្ទះវិញតាមម៉ូតូមួយគ្រឿងម៉ាកវ៉េវ ពណ៌ខ្មៅ ពាក់ស្លាកលេខ ភ្នំពេញ ៧៩៨៤ បើកបរដោយឪពុកឈ្មោះ ឌីន ប៉ុង អាយុ៥២ឆ្នាំ ។ ពេលកំពុងធ្វើដំណើរនោះទាំង២នាក់ឪពុក និងកូនក៏បានជួបគ្រោះថ្នាក់នោះប៉ះជាមួយរថយន្តមួយគ្រឿងម៉ាកតូយ៉ូតាឡិចស៊ីសRX 300 ពណ៌ស ពាក់ស្លាកលេខភ្នំពេញ ២G ៥៤៩៧ លើកំណាត់ផ្លូវជាតិលេខ៧៣ ក្នុងភូមិសាស្ត្រភូមិព្រែកតាអាំ ឃុំបុសលាវ ស្រុកចិត្របុរី។ រថយន្តបើកបរក្នុងទិសដៅពីត្បូងទៅជើងក្នុងល្បឿនយ៉ាងលឿន និងបានបុកម៉ូតូរបស់ជនរងគ្រោះពីរនាក់ឪពុក និងកូនក្នុងទិសដៅបញ្ច្រាសគ្នាចំពីមុខពេញមួយទំហឹង។ ក្នុងហេតុការណ៍នេះបណ្តាលឱ្យទាំងរថយន្តក្រឡាប់ជាច្រើនត្រឡប់ធ្លាក់ពីផ្លូវចូលស្នាមភ្លោះដែលមានជម្រៅជ្រៅ រីឯម៉ូតូត្រូវដាច់ជាពីរកំណាត់ ហើយជនរងគ្រោះពីរនាក់ឪពុក និងកូនខ្ទាតធ្លាក់ចូលស្នាមភ្លោះបាក់កស្លាប់យ៉ាងអាណោចអាធ័មនៅនឹងកន្លែងទាំងក្បាលពាក់មួកសុវត្ថិភាព។
ដោយឡែកនៅថ្ងៃទី២០ ខែសីហា ឆ្នាំ២០១១ ជាថ្ងៃមួយទៀតដែលក្រុមគ្រួសារជនរងគ្រោះ ព្រមទាំងប្រជាពលរដ្ឋក្នុងស្រុកភូមិ រួមទាំងមិត្តភក្តិដែលស្គាល់ក្នុងសាលាទាំងអស់រឹតតែមានការសង្វេគ និងសោកស្តាយក្តុកក្តួលចិត្តកាន់តែខ្លាំងដោយសារលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិរបស់បេក្ខជនឌីន ធារ៉ា គឺជាប់ជាស្ថាពរ និងទទួលបាននិទ្ទេសE ប៉ុន្តែមានតែឈ្មោះជាប់ រីឯមនុស្សបានស្លាប់បាត់បង់ជីវិតទៅហើយ ៕
ចែករំលែកព័តមាននេះ