ខេត្តកំពង់ចាម ៖ ទឹកទន្លេមេគង្គរដូវវស្សាដែលបានឡើងជន់លិចព្រៃធម្មជាតិ (កន្លែងអភិរក្ស) តំបន់ស្ពានមាត់ឃ្មង់ ស្ថិតនៅភូមិទួលវិហារ ឃុំជីរោទ៍ទី២ ស្រុកត្បូងឃ្មុំ មើលទៅគួរឱ្យចង់គយគន់នោះ បានទាក់ទាញអ្នកក្រុងកំពង់ចាម និងអ្នកដំណើរជិតឆ្ងាយមកលំហែកាយស្រូបយកខ្យល់អាកាស ខ្លះបាននាំគ្នាអង្គុយលេងតាមក្យូសទទួលទានអាហារ និងជិះប៉េរូឡូ (ទាបណ្តែតទឹក) លេងកម្សាន្តលើផ្ទៃទឹកយ៉ាងសប្បាយរីករាយ។ ភ្ញៀវភាគច្រើនមកកម្សាន្តនៅពេលល្ងាច ពិសេសនៅចុងសប្តាហ៍ ធ្វើឱ្យទីនោះប្រៀបបានទៅនឹងតំបន់រមណីយដ្ឋានធម្មជាតិយ៉ាងដូច្នេះដែរ។
លោកគង់ សីហុង នាយប៉ុស្តិ៍រដ្ឋបាលឃុំជីរោទ៍ទី២ បានប្រាប់កោះសន្តិភាពឱ្យដឹងនាព្រឹកថ្ងៃទី១៧ សីហា ឆ្នាំ២០១១ ថា ស្របពេលអ្នកដំណើរមកពីគ្រប់ទិសទីមកលេងនៅ តំបន់ស្ពានមាត់ឃ្មង់នោះ លោកវរសេនីយ៍ត្រីហ៊ាង ហ៊ត់ អធិការនគរបាលស្រុកត្បូងឃ្មុំ បានដាក់កម្លាំងនគរបាលស្រុកចំនួន៤នាក់ និងប៉ុស្តិ៍រដ្ឋបាលឃុំជីរោទ៍ទី២ ចំនួន៤នាក់ សរុបទាំងអស់៨នាក់ ដើម្បីជួយរៀបចំការពារសន្តិសុខ និងសណ្តាប់ធ្នាប់ជូនប្រជាពលរដ្ឋ។ លោកនាយប៉ុស្តិ៍បានប្រាប់បន្តថា ជាមួយនោះដែរ សមត្ថកិច្ចបានណែនាំដល់ម្ចាស់ឧបករណ៍ទាទឹក ដែលបានមកធ្វើអាជីវកម្មនៅតំបន់ស្ពានមាត់ឃ្មង់នោះ ត្រូវធ្វើយ៉ាងណា សូមឱ្យឧបករណ៍ទាំងនោះមានគុណភាពល្អ និងត្រូវមានអាវពោងសុវត្ថិភាពសម្រាប់ឱ្យអ្នកជិះពាក់។ មិនតែប៉ុណ្ណោះ ត្រូវតែមានអូប័រឬទូកម៉ាស៊ីន សម្រាប់បើកចល័តឃ្លាំមើលទានោះឱ្យបានជាប់ជាប្រចាំដើម្បីរង់ចាំអន្តរាគមន៍មិនឱ្យទៅកន្លែងដែលមានចរន្តទឹកហូរខ្លាំងឡើយ។ ជាក់ស្តែងកាលពីថ្ងៃទី១៦ សីហា សមត្ថកិច្ចបានបើកវេទិកាសាធារណៈនៅតំបន់ស្ពានមាត់ឃ្មង់នេះ ទៅតាមការណែនាំរបស់លោកវរសេនីយ៍ឯកជឹម សេងហុង ស្នងការរងនគរបាលខេត្ត ទទួលផែនកណ្តាលយុត្តិធម៌ និងលោកឧត្តមសេនីយ៍ត្រីឆាយ គឹមសុន ស្នងការនគរបាលខេត្ត ផ្សព្វផ្សាយពីគោលនយោបាយភូមិ-ឃុំមានសុវត្ថិភាពផងដែរ។
លោកហោ ចំរើន អាយុ៤៥ឆ្នាំ រស់នៅភូមិទី៤ សង្កាត់វាលវង់ ក្រុងកំពង់ចាម ជាម្ចាស់ប៉េរូឡូ បានប្រាប់ថា ដោយមើលឃើញនៅតំបន់ស្ពានមាត់ឃ្មង់ ក្នុងរដូវវស្សា២០១១នេះ ទឹកទន្លេមេគង្គបានឡើងជន់លិចនៅសងខាងផ្លូវលេខ៧ ទើបរូបលោកយកប៉េរូឡូចំនួន១១គ្រឿងមកដាក់សម្រាប់ឱ្យប្រជាពលរដ្ឋជួលជិះលេងលំហែកាយ ចាប់តាំងពីថ្ងៃ១០ សីហា រហូតមកដល់ថ្ងៃ ទី១៤ សីហា ក្នុង១ថ្ងៃជាមធ្យមលោករកប្រាក់ចំណូលបានចាប់ពី៦ម៉ឺនរៀលរហូតដល់ជិត១០ម៉ឺនរៀល ដោយចាប់ផ្តើមពីម៉ោង៧ព្រឹករហូតដល់ម៉ោង៦ល្ងាច ក្នុង១ម៉ោង៥.០០០រៀល ព្រមទាំងមានទូកម៉ាស៊ីនសម្រាប់ចេញទៅជួយការពារដល់អ្នកជិះប៉េរូឡូបណ្តែតទឹកលេងទៀតផង។
អ្នកស្រីអ៊ុច យីន អាយុ៦២ឆ្នាំ ដែលមានទីលំនៅក្នុងភូមិកោះប៉ែន ឃុំកោះមិត្ត ស្រុកកំពង់សៀម បានប្រាប់ឱ្យដឹងថា កូនស្រីរបស់គាត់ឈ្មោះសុង ស បានមកប្រកបរបរលក់ដូរនៅតំបន់ស្ពានមាត់ឃ្មង់នេះតាំងពី ឆ្នាំ២០១០ ។ តាមការសង្កេតក្នុងឆ្នាំនេះការលក់ដូរដាច់ជាងឆ្នាំ មុន ដោយ១ថ្ងៃអាចលក់បានប្រាក់ជាង៣០ម៉ឺន
រៀល។ សម្រាប់សត្វគ្រួចបំពង១ក្បាលលក់តែ៣.៥០០រៀល មិនជាថ្លៃនោះទេ ដូច្នេះ សូមបងប្អូនប្រជាពលរដ្ឋនាំគ្នាមកលេងនៅតំបន់មាត់ឃ្មង់នេះ ពិតជាមិនខុសបំណងឡើយ ៕
ចែករំលែកព័តមាននេះ