កីឡាការិនីកូរ៉េខាងត្បូងណា យេអុន ឆយបានសម្តែងក្តីរីករាយជាខ្លាំងបន្ទាប់ពីបានយកឈ្នះជុំទី២នៃការប្រកួតវាយកូនហ្គោលកម្មវិធីLPGA Safeway Classic ជាមួយនឹងគម្លាតពិន្ទុ២ស្ត្រូក កាលពីថ្ងៃសៅរ៍ ទី២០ សីហា កន្លងមកនេះ។ កម្មវិធីប្រកួតដែលមានទឹកប្រាក់រង្វាន់សរុប១លាន៥សែនដុល្លារអាមេរិកនេះត្រូវបានរៀបចំធ្វើនៅទីលានឈ្មោះ Pumpkin Ridge Golf Clubស្ថិតក្នុងទីក្រុងណ័សភ្លេន រដ្ឋអូរេហ្គឹនសហរដ្ឋអាមេរិក។
នាងឆយធ្វើបាន២បូជីនៅឡូចុងក្រោយដែលមាន៤ប៉ាយកឈ្នះជុំទី២ក្នុងលទ្ធផល៧អាន់ឌ័រប៉ា ៦៥ នាំមុខ២ស្ត្រូកលើនាងស្ទេស៊ី ឡេវីស។ ថ្លែងបន្ទាប់ពីទទួលបានជ័យជម្នះ ឆយបានបញ្ជាក់ថា៖«ខ្ញុំពិតជាចង់ត្រឡប់ទៅឡូទី១៨វិញ»។ កីឡាការិនីការពារជើងឯកសញ្ជាតិជប៉ុនអៃ មីយ៉ាហ្សាតុ បញ្ចប់ការប្រកួតក្នុងលំដាប់ទី៣។ នាងធ្វើបានលទ្ធផលពិន្ទុ៣អាន់ឌ័រ ប៉ា១៣៩ នាំមុខ១ស្ត្រូកលើកីឡាការិនីប្រ៊ីតតានី លីនស៊ីខាំ កីឡាការិនីស៊ុយអែតអាណា ណ័រវីសនិងកីឡាការិនីកូរ៉េខាងត្បូង ហ្គ្រាស ប៉ាក់។ ឆ្លងកាត់ការប្រកួត២ជុំ អ្នកទាំង៣ធ្វើបានលទ្ធផលស្មើគ្នា២អាន់ឌ័រ ប៉ា ១៤០។
សម្រាប់នាងប៉ាក់ ការប្រកួតរបស់នាងក្នុងពេលបច្ចុប្បន្នហាក់មិនសូវជាទទួលបានលទ្ធផលល្អនោះទេ។ រយៈពេល៦ឆ្នាំចុងក្រោយនេះនាងត្រូវរំខានដោយរបួសលើរាងកាយជាច្រើនកន្លែងដូចជា.ក ខ្នង និងត្រគាក។ នាងបាននិយាយថា៖«ពីអតីតកាលខ្ញុំបានរងរបួសជាញឹកញាប់ ហើយនោះជាការពិតដែលការប្រកួតរបស់ខ្ញុំបានធ្លាក់ចុះ។ ប៉ុន្តែក្នុងពេលនេះសុខភាពរបស់ខ្ញុំដូចជាគ្រាន់បើច្រើនធៀបនឹង១០ឆ្នាំមុន»។
ឯកីឡាការិនីលំដាប់ទី១ពិភពលោកសញ្ជាតិតៃវ៉ាន់យ៉ានី សេង បញ្ចប់ការប្រកួត២ជុំធ្វើបានលទ្ធផល១អាន់ឌ័រ ប៉ា១៤១ស្ថិតនៅចំណាត់ថ្នាក់លេខ៧ស្ទួន។ ក្នុងពេលដំណាលគ្នា នៅក្នុងកម្មវិធីប្រកួតCzech Open កីឡាករស្កុតលែនស្ទេវ៉ឹន អូហារ៉ាបានយកឈ្នះជុំទី៣បន្ទាប់ពីធ្វើបានលទ្ធផលពិន្ទុ៧អាន់ឌ័រប៉ា៦៥។ ការប្រកួតកម្មវិធីដែលមានទឹកប្រាក់រង្វាន់សរុប២លាននិង៥សែនដុល្លារអាមេរិកនេះ ត្រូវបានរៀបចំធ្វើនៅទីលានវាយកូនហ្គោល Prosper Golf Resortស្ថិតក្នុងទីក្រុង Celadnaសាធារណរដ្ឋឆែក។ សរុបលទ្ធផលនៃការប្រកួតចំនួន៣ជុំ អូហារ៉ាធ្វើបានពិន្ទុ១០អាន់ឌ័រប៉ា ២០៦ស្មើជាមួយកីឡាករអង់គ្លេសអូលីវ័រ ហ្វ៊ីសស៊័រ។ ថ្លែងបន្ទាប់ពីបាននាំមុខក្នុងជុំទី៣ អូហារ៉ាបានបញ្ជាក់ថា៖«ខ្ញុំបានផ្លាស់ប្តូរស្ទីលវាយកូនបាល់បញ្ចូលឡូរៀងរាល់សប្តាហ៍។ ការធ្វើដូច្នេះនាំឲ្យការប្រកួតរបស់ខ្ញុំកាន់តែល្អឡើងៗ» ៕
ចែករំលែកព័តមាននេះ