ខេត្តតាកែវ ៖ ក្រុមកម្មករសំណង់ចំនួន៣០នាក់ តំណាងឱ្យកម្មករសរុប៨៤នាក់ ដែលកំពុងតែធ្វើការសំណង់ឱ្យក្រុមហ៊ុនហេង អេងគង់ ស្ថាបនាឃ្លាំងរោងម៉ាស៊ីនកិនស្រូវ បានលើកគ្នាមកជួបជុំក្រៅបរិវេណសំណង់ដើម្បីតវ៉ា ដល់ក្រុមហ៊ុនឱ្យចាត់វិធានការដល់មេការ ដែលជួលពួកគេមកធ្វើការ ហើយមិនព្រមបើកលុយឱ្យ ព្រមទាំងបានរត់គេចខ្លួនបាត់ស្រមោល។
ខេត្តតាកែវ ៖ ក្រុមកម្មករសំណង់ចំនួន៣០នាក់ តំណាងឱ្យកម្មករសរុប៨៤នាក់ ដែលកំពុងតែធ្វើការសំណង់ឱ្យក្រុមហ៊ុនហេង អេងគង់ ស្ថាបនាឃ្លាំងរោងម៉ាស៊ីនកិនស្រូវ បានលើកគ្នាមកជួបជុំក្រៅបរិវេណសំណង់ដើម្បីតវ៉ា ដល់ក្រុមហ៊ុនឱ្យចាត់វិធានការដល់មេការ ដែលជួលពួកគេមកធ្វើការ ហើយមិនព្រមបើកលុយឱ្យ ព្រមទាំងបានរត់គេចខ្លួនបាត់ស្រមោល។
កម្មករឈ្មោះផាន់ រី ភេទប្រុស អាយុ៤០ឆ្នាំ បានប្រាប់កោះសន្តិភាពឱ្យដឹងថា ពួកគេទាំងអស់មានគ្នា៨៤នាក់ រស់នៅស្រុកសំរោង និងក្រុងដូនកែវ ត្រូវបានអ្នកម៉ៅការសំណង់ឱ្យក្រុមហ៊ុនហេង អេងគង់ ជួលធ្វើឃ្លាំងរោងម៉ាស៊ីនកិនស្រូវ ដោយទទួលកម្រៃប្រចាំថ្ងៃ១អាទិត្យ ទើបបើកលុយម្តង ក្នុងនោះមេជាងទទួលបានលុយ១ថ្ងៃ ២៦.០០០រៀល កូនជាងទទួលបាន១៦.០០០រៀល ដែលមកដល់ពេលនេះធ្វើបានរយៈពេលជាង១ខែហើយ។ តំណាងកម្មករបានបន្តទៀតថា រយៈពេលកន្លងទៅ កម្មករធ្វើការបាន១អាទិត្យអ្នកម៉ៅការតែងតែបើកលុយពីក្រុមហ៊ុនរួចយកមកបើកឱ្យក្រុមកម្មករជានិច្ច។ប៉ុន្តែនៅថ្ងៃទី១៦ សីហា ពេលបើកលុយពីក្រុមហ៊ុនបានហើយ អ្នកម៉ៅការអត់បានបើកប្រាក់ឱ្យកម្មករទេ បែរជាប្រមូលប្រាក់ជាញើសឈាមរបស់កម្មករទាំងអស់រត់គេចខ្លួនបាត់ស្រមោល។ លុះថ្ងៃទី១៧ សីហា ក្រុមកម្មករទាំងអស់បានលើកគ្នាមិនព្រមចូលធ្វើការ និងសុំឱ្យតំណាងក្រុមហ៊ុនជួយសម្រួលបើកប្រាក់ថ្លៃឈ្នួលឱ្យក្រុមកម្មករទាំងអស់គ្នានោះផង ព្រោះគ្រួសារនៅឯផ្ទះពឹងលើលុយទាំងនេះសម្រាប់ទិញអង្ករទទួលទាន។ ទោះបីជាមានការសំណូមពរដល់ក្រុមហ៊ុនបែបណាក៏ដោយ ក៏គ្មានតំណាងក្រុមហ៊ុនណាម្នាក់ចេញមុខមកដោះស្រាយឡើយ ទើបនៅថ្ងៃទី១៨ សីហា ពួកគាត់បានលើកគ្នាមកតវ៉ានៅមុខការដ្ឋានសំណង់សុំការជួយអន្តរាគមន៍ពីក្រុមហ៊ុនម្តងទៀត តែគ្មានលទ្ធផលដដែល។
តំណាងកម្មករទាំងអស់សុំឱ្យក្រុមហ៊ុនមេត្តាជួយសម្រួលដល់ពួកគាត់ផង ព្រោះអ្នកដែលទទួលម៉ៅការធ្វើឃ្លាំងនោះ ខាងក្រុមហ៊ុនពិតជាស្គាល់ច្បាស់ណាស់ ដូច្នេះសូមខាងក្រុមហ៊ុនជួយឱ្យអ្នកម៉ៅការនោះចូលខ្លួនមកបើកលុយឱ្យពួកគាត់ដែលជាកម្មករទាំងអស់គ្នាផង។ ទាក់ទិននឹងបញ្ហានេះ កោះសន្តិភាពមិនអាចទាក់ទងសុំការបំភ្លឺពីតំណាងក្រុមហ៊ុន ឬអ្នកម៉ៅការសំណង់បានទេ នៅថ្ងៃទី១៨ សីហា ៕
ចែករំលែកព័តមាននេះ