ខេត្តក្រចេះ ៖ កំណាត់ផ្លូវជាតិលេខ៧៦A បានកកស្ទះចរាចរណ៍បង្កឱ្យអ្នកធ្វើដំណើរគ្រប់ មធ្យោបាយត្រូវកាត់ផ្តាច់ទាំងស្រុង នាព្រឹកថ្ងៃទី១៩ សីហា ក្នុងរយៈពេលជាង៤ម៉ោង គឺពេញមួយព្រឹក ខណៈពេលដែលប្រជាពលរដ្ឋមានចំនួនជាង១ពាន់នាក់ នំាគ្នាធ្វើបាតុកម្មប្រឆាំងនឹងក្រុមហ៊ុនវិនិយោគក្នុងរឿងវិវាទដីធ្លី ដ៏រ៉ាំរ៉ៃមួយដែលរហូតមកទល់នឹងពេលនេះនៅមិនទាន់ដោះ ស្រាយចេញជាផ្លូវការជូនពួកគាត់នៅឡើយ។
ខេត្តក្រចេះ ៖ កំណាត់ផ្លូវជាតិលេខ៧៦A បានកកស្ទះចរាចរណ៍បង្កឱ្យអ្នកធ្វើដំណើរគ្រប់មធ្យោបាយត្រូវកាត់ផ្តាច់ទាំងស្រុង នាព្រឹកថ្ងៃទី១៩ សីហា ក្នុងរយៈពេលជាង៤ម៉ោង គឺពេញមួយព្រឹក ខណៈពេលដែលប្រជាពលរដ្ឋមានចំនួនជាង១ពាន់នាក់ នំាគ្នាធ្វើបាតុកម្មប្រឆាំងនឹងក្រុមហ៊ុនវិនិយោគក្នុងរឿងវិវាទដីធ្លីដ៏រ៉ាំរ៉ៃមួយដែលរហូតមកទល់នឹងពេលនេះនៅមិនទាន់ដោះស្រាយចេញជាផ្លូវការជូនពួកគាត់នៅឡើយ។
បណ្តារថយន្តតូចធំ ដែលធ្វើដំណើរទៅមកលើកំណាត់ផ្លូវជាតិលេខ៧៦Aស្នួល-មណ្ឌលគិរីត្រូវកកស្ទះចរាចរណ៍ទៅមក បណ្តាលឱ្យអ្នកធ្វើដំណើរលើរថយន្តគ្រប់ប្រភេទត្រូវបញ្ឈប់ សកម្មភាពទាំងស្រុងធ្វើឱ្យចរាចរណ៍ត្រូវស្ទះពេញលើផ្លូវជាតិ ចាប់ពីម៉ោង៨ព្រឹក រហូតដល់ម៉ោង១២ថ្ងៃត្រង់ថ្ងៃដដែលទើបចរាចរណ៍អាចទៅមកបានជាបណ្តើរៗក្រោយពេលដែលអាជ្ញាធរខេត្តចេញមុខមកដោះស្រាយនិងអះអាងលើជំហរដោះស្រាយឱ្យពួកគាត់ក្នុងរឿងវិវាទដីធ្លីនេះ។
ក្នុងសកម្មភាពបាតុកម្មដែលបង្កឡើងដោយមនុស្សស្រីប្រុសមានចំនួនជាង១ពាន់នាក់ មានរយៈពេល៤ម៉ោង ពេញមួយព្រឹកនេះគឺធ្វើឡើងប្រជាពលរដ្ឋមានលំនៅចំណុចគីឡូម៉ែត្រលេខ១១៤ ក្នុងភូមិសាស្រ្តចំណុចK3 ក្នុងឃុំពីរធ្នូ ស្រុកស្នួល ខេត្តក្រចេះ ក្នុងទំនាស់ដីធ្លីជាមួយនឹងក្រុមហ៊ុនវិនិយោគដីសម្បទានសេដ្ឋកិច្ចឈ្មោះសុវណ្ណ វុទ្ធី ដែលបានវិនិយោគលើដីដែនជម្រកសត្វព្រៃស្នួល ខណៈពេលដែលក្រុមហ៊ុននេះ បានបង្កើតការឈូសឆាយប៉ះចំលើដីកសិកម្មរបស់ប្រជាពលរដ្ឋ ។ នេះបើតាមការអះអាងរបស់ពួកគាត់ ។
ប្រជាពលរដ្ឋដែលជាក្រុមបាតុកម្មបានសម្រេចសែងសាលាសំណាក់ឈើមួយខ្នងមានទំហំ១០ម៉ែត្រគុណ១២ម៉ែត្រ មកដាក់ចំកណ្តាលផ្លូវជាតិ បង្កឱ្យស្ទះចរាចរណ៍ទៅមក ។ ពួកគាត់អះអាងថា គ្រឿងចក្ររបស់ក្រុមហ៊ុនមួយនេះ បានឈូសប៉ះចំពីលើដីមួយកន្លែង ដែលប្រជាពលរដ្ឋរក្សាទុកសម្រាប់ធ្វើវត្ត ព្រមទាំងដំណាំរបស់ពួកគាត់។ ជាមួយគ្នានេះក៏មានកងកម្លាំងប្រដាប់អាវុធមួយចំនួនធំចេញមកអន្តរាគមន៍ការពារសុវត្ថិភាព និងទប់ស្កាត់កុំឱ្យមានការរីករាលដាលកាន់តែខ្លាំងឡើងទៅមុខទៀតរបស់ក្រុមបាតុករ។
កាលពីថ្ងៃទី១៩ មិថុនា ឆ្នាំ២០១១ ប្រជាពលរដចំនួនជាងមួយពាន់គ្រួសារបាននាំគ្នាធ្វើបាតុកម្មបិទផ្លូវជាតិរួចម្តងមកហើយ ក្នុងវិវាទដីធ្លីមួយកន្លែងដែលកាលនោះប្រជាពលរដ្ឋបានយកដើមឈើធំៗមកកាត់ដាក់ទទឹងផ្លូវធ្វើឱ្យស្ទះចរាចរណ៍ទៅមកដូចគ្នា និងបានធូរស្រាលទៅវិញ ក្រោយពីអាជ្ញាធរបានចេញមកសម្របសម្រួល។
បន្ទាប់ពីមានវិវាទដីធ្លីដ៏រ៉ាំរ៉ៃកើតមានជាបន្តបន្ទាប់រួចមក គេឃើញមានកងកម្លាំងកងរាជអាវុធហត្ថខេត្តមួយចំនួនធំទៅឈរជើងនៅតំបន់នោះក្នុងជំហរការពារការប៉ះទង្គិចរវាងប្រជាពលរដ្ឋ និងក្រុមហ៊ុនមានរយៈពេលរាប់សិបខែ តែនៅតែមិនមានដំណោះស្រាយដដែល ។
នៅនឹងកន្លែងកើតហេតុលើដងផ្លូវប្រជាពលរដ្ឋជាហ្វូងបាតុករបាននិយាយថា ក្នុងបាតុកម្ម ថ្ងៃនេះអ្វីដែលពួកគាត់ចង់ទាមទារគឺសុំឱ្យក្រុមហ៊ុនធ្វើសេចក្តីជូនដំណឹងណាមួយឱ្យពួកគាត់បានដឹងមុននឹងបង្កើតការឈូសឆាយដី និងស្នើសុំឱ្យអាជ្ញាធររកដំណោះស្រាយឱ្យពួកគាត់បានឆាប់រហ័ស ឬក៏អាចមានទីតាំងណាមួយសម្រាប់ផ្លាស់ប្តូរដើម្បីអោយពួកគាត់បានបង្កបង្កើនផលដូចធម្មតាវិញ។
ក្រោយពីក្រុមបាតុករបានបង្កសកម្មភាពឡើងមានរយៈពេលពេញមួយព្រឹករួចមកនោះគេ ឃើញមានអាជ្ញាធរខេត្តដឹកនាំដោយលោក ស ចំរ៉ុង អភិបាលរងខេត្ត និងអាជ្ញាធរពាក់ព័ន្ធមួយចំនួនធំបានចេញមកដោះស្រាយសម្របសម្រួលជាមួយនិងប្រជាពលរដ្ឋ។
នៅមុខបាតុករនាព្រឹកនោះ លោក ស ចំរ៉ុង អភិបាលរងខេត្តបានថ្លែងថា អាជ្ញាធរនឹងចាត់ឱ្យក្រុមហ៊ុនបញ្ឈប់សកម្មភាពឈូសឆាយ ហើយលោកអភិបាលរងបានអះអាងបន្ថែមថា នៅថ្ងៃច័ន្ទ អាជ្ញាធរខេត្ត នឹងទៅជួបប្រជាពលរដ្ឋដែលមានការប៉ះពាល់ជាមួយនឹងក្រុមហ៊ុនដើម្បីរកដំណោះស្រាយបន្ត ។
ក្រោយពីមានការសម្របសម្រួលរបស់អាជ្ញាធររួចមក ស្ថានការណ៍បានធូរស្រាលនៅវេលា ម៉ោង១១ព្រឹកថ្ងៃដដែល ដោយផ្លូវអាចបន្តការទៅមកបានធម្មតាវិញ។ តែទោះបីជាយ៉ាងណា ក្រុមប្រជាពលរដ្ឋព្រមានថា ពួកគាត់នឹងចាំមើលប្រសិនបើអាជ្ញាធរនៅតែមិនមានវិធានការណាមួយទៀតនោះ ពួកគាត់នឹងបន្តបាតុកម្មខ្លាំងជាងមុនទៀត ៕
ចែករំលែកព័តមាននេះ