ក្រសួងយុទ្ធសាស្ត្រ និងហិរញ្ញវត្ថុកូរ៉េខាងត្បូងថ្លែងកាលពីថ្ងៃទី១៩ សីហា ថា ប្រទេសកូរ៉េខាងត្បូងនឹងព្រងីកការជួយទ្រទ្រង់ខាងផ្នែកហិរញ្ញវត្ថុរបស់ខ្លួនដល់ផ្នែកកសិកម្ម និងផ្នែកនេសាទដើម្បីសម្រាលលទ្ធភាពនៃការខូចខាតដោយសារការសម្រុកហូរចូលខ្លាំងនៃផលិតផលពីខាងក្រៅ បន្ទាប់ពីកិច្ចព្រមព្រៀងផ្លាស់ប្តូរសេរីដែលចុះហត្ថលេខាជាមួយប្រទេសជាច្រើន។
យោងតាមក្រសួងនេះថា រដ្ឋាភិបាលនឹងបញ្ចូលទឹកប្រាក់ដល់ទៅ២២.១០០ពាន់លានវ៉ុន(២០,៥ពាន់លានដុល្លារ)សម្រាប់ជួយបណ្តាកសិករ និងអ្នកនេសាទក្នុងស្រុកដែលនឹងរងការប៉ះពាល់ដោយសារការហូរចូលយ៉ាងគំហុកនៃផលិតផលបរទេស។ ទឹកប្រាក់នោះជាទឹកប្រាក់យ៉ាងច្រើនមួយបើប្រៀបធៀបទៅនឹងទឹកប្រាក់២១.០០០ពាន់លានវ៉ុនដែលផ្តល់សម្រាប់ការជួយទ្រទ្រង់ប្រហាក់ប្រហែលគ្នានោះដែរកាលពីឆ្នាំ២០០៧។
កូរ៉េខាងត្បូង និងសហរដ្ឋអាមេរិកបានចុះហត្ថលេខាលើកិច្ចព្រមព្រៀងផ្លាស់ប្តូរសេរី ALE កាលពីឆ្នាំ២០០៧ ហើយរង់ចាំការអនុម័តដោយសភារបស់ប្រទេសទាំង២។ ALE ជាមួយសហភាពអឺរ៉ុបដែលជាប្លុកសេដ្ឋកិច្ចដ៏ធំបំផុតមួយនៃពិភពលោកបានចូលជាធរមានកាលពីខែមុននេះ។
ក្រសួងខាងលើនេះក្នុងសេចក្តីប្រកាសមួយនិយាយថា ផែនការជួយទ្រទ្រង់នេះនឹងបង្កើតឡើងសម្រាប់រយៈពេល១០ឆ្នាំខាងមុខនេះដើម្បីផ្តល់ឱកាសគ្រប់គ្រាន់ដល់កសិករក្នុងស្រុកពង្រឹងខ្លួនសម្រាប់ការប្រកួតប្រជែង។ សរុបទឹកប្រាក់ប្រមាណជា៤.០០០ពាន់លានវ៉ុននឹងត្រូវប្រើប្រាស់សម្រាប់ជួយផ្នែកទាំងនេះឱ្យធ្វើទំនើបកម្មផ្នែករបស់ខ្លួនដែលមានខ្ពស់ជាងទឹកប្រាក់២.០០០ពាន់លានវ៉ុនផ្តល់ឱ្យមុននេះសម្រាប់ទិសដៅដូចគ្នាដែរ ៕
ចែករំលែកព័តមាននេះ