រាជធានីភ្នំពេញ៖អនុលោមតាមព្រះរាជក្រឹត្យស្តីពី ការបង្កើតគណៈកម្មាធិការជាតិវាយតម្លៃទីក្រុងស្អាត កាលពីព្រឹកថ្ងៃទី១៨ សីហា លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការវាយតម្លៃទីក្រុងស្អាត បានអញ្ជើញជាអធិបតីក្នុងពិធីបើកសិក្ខាសាលាបណ្តុះបណ្តាល និងពង្រឹងសមត្ថភាពមន្ត្រីទាក់ទង
រាជធានីភ្នំពេញ៖អនុលោមតាមព្រះរាជក្រឹត្យស្តីពី ការបង្កើតគណៈកម្មាធិការជាតិវាយតម្លៃទីក្រុងស្អាត កាលពីព្រឹកថ្ងៃទី១៨ សីហា លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការវាយតម្លៃទីក្រុងស្អាត បានអញ្ជើញជាអធិបតីក្នុងពិធីបើកសិក្ខាសាលាបណ្តុះបណ្តាល និងពង្រឹងសមត្ថភាពមន្ត្រីទាក់ទងនឹងការវាយតម្លៃទីក្រុងស្អាត ដោយមានការអញ្ជើញចូលរួមពីប្រធាន-អនុប្រធានមន្ទីររាជធានីខេត្ត-ក្រុងជាច្រើនទៀត។
មានប្រសាសន៏បើកសិក្ខាសាលានាឱកាសនោះ លោកថោង ខុន បានលើកឡើងអំពីផែនការរបស់គណៈកម្មាធិការជាតិវាយតម្លៃទីក្រុងស្អាត ដែលជាជំហានដំបូងត្រូវធ្វើសិក្ខាសាលា ដ៏ទូលំទូលាយមួយដែលមានការចូលរួមពីប្រធាន-អនុប្រធានមន្ទីរទេសចរណ៍គ្រប់ខេត្ត-ក្រុង ដើម្បីស្វែងយល់ឱ្យបានស៊ីជម្រៅស្តីពីសូចនាករទាំងឡាយ និងនីតិវិធីក្នុងការវាយតម្លៃទីក្រុងស្អាតនេះ។ លោកបានបន្តថា ទីក្រុងទាំងអស់នៅក្នុងព្រះរាជាណាចក្រកម្ពុជា ត្រូវបានរៀបចំឱ្យមានការប្រលងប្រណាំងទីក្រុងស្អាត។
ទាក់ទងទៅនឹងការវាយតម្លៃទីក្រុងស្អាតនេះដែរ លោករដ្ឋមន្ត្រីបានបញ្ជាក់ថា នៅក្នុងឧបសម្ព័ន្ធនៃស្តង់ដាទីក្រុងស្អាតនេះ បានចែងពីសូចនាករគោលចំនួន៧ សូចនាករលម្អិតចំនួន៣៣ហើយ ដែលត្រូវបានកំណត់ធ្វើការវាយតម្លៃ។ដោយផ្អែកលើលក្ខណៈវិនិច្ឆ័យចំនួន៧៧ ស្មើនឹង ៧៧ពិន្ទុសម្រាប់ធ្វើការវាយតម្លៃ និងសម្រេចផ្តល់ជ័យលាភី ជូនទីក្រុងជាបេក្ខភាពរួមមានសូចនាករលំអិតនៃការរៀបចំ និងគ្រប់គ្រងបរិស្ថាន សូចនាករលម្អិតនៃភាពស្អាត សូចនាករលម្អិត នៃការគ្រប់គ្រងសំណល់ សូចនាករលម្អិតនៃតំបន់បៃតង សូចនាករលម្អិតនៃសុវត្ថិភាពសុខាភិបាលសន្តិសុខ និងសណ្តាប់ធ្នាប់ទីក្រុង សូចនាករលម្អិតនៃហេដ្ឋារចនាសម្ព័ន្ធ និងសម្បទាទេសចរណ៍។
ការប្រលងប្រណាំងនេះ ត្រូវបានរៀបចំជារៀងរាល់៣ឆ្នាំម្តង ហើយទីក្រុងជ័យលាភី នឹងទទួលបានស្លាកសញ្ញាដែលមានសុពលភាពសម្រាប់រយៈពេល៣ឆ្នាំ។ ទីក្រុងជ័យលាភីដែលជាប់ចំណាត់ថ្នាក់ អាចទទួលស្លាកសញ្ញាជ័យលាភីត្រូវបានចែកជា៣កម្រិត គឺស្លាកសញ្ញាផ្ការំដួល៣ទង (ទីក្រុងដែលទទួលបានពិន្ទុចាប់ពី៥៨ ដល់ ៧៧ពិន្ទុ យ៉ាងហោចណាស់ស្មើនឹង ៧៥% នៃចំនួនពិន្ទុសរុប)។ ស្លាកសញ្ញាផ្ការំដួល២ទង (ពិន្ទុចាប់ពី ៤៦ ដល់ ៥៧ ពិន្ទុយ៉ាងហោចណាស់ស្មើនឹង ៦០%) និងស្លាកសញ្ញាផ្ការំដួល១ទង (ពិន្ទុចាប់ពី ៣១ ដល់ ៤៥ពិន្ទុ យ៉ាងហោចណាស់ស្មើនឹង៤០%) ។
លោករដ្ឋមន្ត្រីបានបន្តទៀតថា ការរៀបចំឱ្យមានការប្រលងប្រណាំងទីក្រុងស្អាតនេះ គឺជាគំនិតផ្តួចផ្តើមថ្មីនៅកម្ពុជាក្រោមការដឹកនាំដ៏ត្រឹមត្រូវប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីក៏ដូចជាសម្រាប់ប្រទេសកំពុងអភិវឌ្ឍនានា លើសាកលោក។ដោយហេតុថាការប្រលងប្រណាំងទីក្រុងស្អាតនេះ គឺរៀបចំជាលើកដំបូងបង្អស់សម្រាប់ព្រះរាជាណាចក្រកម្ពុជា ក្នុងគោលដៅធ្វើយ៉ាងណាឱ្យបណ្តាទីក្រុងទាំងអស់ក្លាយជាកន្លែងផ្តល់
ភាពកក់ក្តៅយ៉ាងពិតប្រាកដ ក្នុងការរស់នៅប្រកបកិច្ចការ ធ្វើអាជីវកម្មពាណិជ្ជកម្មកម្សាន្ត និងធ្វើឱ្យកម្ពុជាក្លាយជាគោលដៅបៃតងប្រកបដោយគុណភាពស្តង់ដាអន្តរជាតិ ពិសេសឆ្ពោះទៅរកការកសាងសេដ្ឋកិច្ចបៃតងនៅកម្ពុជា និងដើម្បីធ្វើឱ្យកម្ពុជាក្លាយជាគោលដៅទេសចរណ៍កម្រិតពិភពលោក។
គំនិតផ្តួចផ្តើមរបស់កម្ពុជាថ្មីនេះ ត្រូវបានទទួលស្វាគមន៍ដោយអាស៊ាន ហើយនៅថ្ងៃអនាគតស្តង់ដាទីក្រុងស្អាតនេះនឹងក្លាយជាស្តង់ដារួមមួយអាចអនុវត្តបានក្នុងក្របខណ្ឌអាស៊ាន ដោយក្លាយជាស្តង់ដាទីក្រុងស្អាតអាស៊ាន(ASEAN Clean City Standard)។
ចែករំលែកព័តមាននេះ