ស្ត្រីមានផ្ទៃពោះក្រីក្រ២នាក់មានអ្នកស្រីស៊ឹម ច្រឹប និងអ្នកស្រីយ៉ាន់ ចាន់ណា ត្រូវបានមូលនិធិអង្គការសង្គ្រោះគ្មានព្រំដែន ជួយឧបត្ថម្ភទាំងថ្លៃសម្រាល ការស្នាក់ និងដឹកជញ្ជូនទាំងទៅទាំងមកផងដែរ ។
លោកស្រីស៊ូ សុគន្ធារី ប្រធានគ្លីនិកអង្គការបានមានប្រសាសន៍ថា យោងតាមប្រសាសន៍ដ៏ថ្លៃថ្លារបស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមជាតិកម្ពុជាក្នុងការជួួយសង្គ្រោះចំពោះស្ត្រីពេលមានផ្ទៃពោះឱ្យមានសុវត្ថិភាពពេលឆ្លងទន្លេ ដើម្បីជួយកាត់បន្ថយនូវការគ្រោះថ្នាក់ដល់ជីវិតមាតា និងទារក នោះ ទើបអង្គការសង្គ្រោះគ្មានព្រំដែនបានបង្កើតមូលនិធិនេះឡើង ក្នុងគោលបំណងជួយចំពោះស្ត្រីមានផ្ទៃពោះដែលមានការលំបាកខ្វះខាតក្នុងជីវភាពគ្រួសារ ពុំមានលទ្ធភាពពេលឆ្លងទន្លេ ។ លោកស្រីបានបន្តទៀតថា មូលនិធិបានកើតឡើងក្រោមការឧបត្ថម្ភពីលោកចាន់ វ៉ែន ប្រធានអង្គការ និងលោកយាយឧបាសិកាគៀត ជាវ សព្វថ្ងៃរស់នៅប្រទេសអូស្ត្រាលី និងសប្បុរសជនក្នុងប្រទេស តាមរយៈអង្គការសង្គ្រោះគ្មានព្រំដែន ដើម្បីយកមកជួយរំលែកនូវទុក្ខលំបាកចំពោះក្រុមគ្រួសារក្រីក្រក្នុងប្រទេសកម្ពុជា ។ សូមជម្រាបថា អង្គការសង្គ្រោះគ្មានព្រំដែនបានទទួលយកស្ត្រីមានផ្ទៃពោះក្រីក្រក្នុង១ខែចំនួន៦នាក់មកជួយឧបត្ថម្ភពេលឆ្លងទន្លេ ។
បន្ទាប់ពីការឆ្លងទន្លេប្រកបដោយសុវត្ថិភាពរួចហើយ អ្នកស្រីទាំង២ និងក្រុមគ្រួសារមានចិត្ត ត្រេកអរយ៉ាងខ្លាំងចំពោះការជួយឧបត្ថម្ភរបស់អង្គការដល់គ្រួសាររបស់គាត់ ។ អ្នកស្រីទាំង២បានលើកដៃប្រណម្យបួងសួងដល់វត្ថុស័ក្តិសិទ្ធិក្នុងលោកទាំងមូល សូមជួយដល់អង្គការ និងម្ចាស់អំណោយដែលបានបរិច្ចាគនូវថវិកាជួយដល់ក្រុមគ្រួសាររបស់គាត់ សូមឱ្យជួបប្រទះនូវពុទ្ធពរទាំងបួនប្រការគឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
ចែករំលែកព័តមាននេះ