រាជធានីភ្នំពេញ ៖ កាលពីថ្ងៃទី១៦ សីហា នៅសណ្ឋាគារសាន់វេ ក្រសួងទេសចរណ៍បានរៀបចំកិច្ចប្រជុំជំហានដំបូងស្តីពី ការប្រឡងប្រណាំងរមណីយដ្ឋានស្អាត និងពង្រឹងការងារសហគមន៍ទេសចរណ៍ ក្រោមអធិបតីភាពលោកថោង ខុន រដ្ឋមន្ត្រីក្រសួងទេសចរណ៍ ។ អញ្ជើញចូលរួមក្នុងកិច្ចប្រជុំនេះមានថ្នាក់ដឹកនាំក្រសួង
រាជធានីភ្នំពេញ ៖ កាលពីថ្ងៃទី១៦ សីហា នៅសណ្ឋាគារសាន់វេ ក្រសួងទេសចរណ៍បានរៀបចំកិច្ចប្រជុំជំហានដំបូងស្តីពីការប្រឡងប្រណាំងរមណីយដ្ឋានស្អាត និងពង្រឹងការងារសហគមន៍ទេសចរណ៍ ក្រោមអធិបតីភាពលោកថោង ខុន រដ្ឋមន្ត្រីក្រសួងទេសចរណ៍ ។ អញ្ជើញចូលរួមក្នុងកិច្ចប្រជុំនេះមានថ្នាក់ដឹកនាំក្រសួងទេសចរណ៍ តំណាងក្រសួង ស្ថាប័នពាក់ព័ន្ធ អាជ្ញាធររាជធានី-ខេត្ត មន្ទីរទេសចរណ៍ ផ្នែកឯកជន ឧស្សាហកម្មទេសចរណ៍ និងសហគមន៍ទេសចរណ៍ សរុបចំនួន២២៤នាក់ ។
នៅក្នុងកិច្ចប្រជុំនេះ លោករស់ រ៉េន រដ្ឋលេខាធិការក្រសួងទេសចរណ៍បានមានប្រសាសន៍ថា ដោយការខិតខំប្រឹងប្រែងរបស់មន្ទីរទេសចរណ៍ ផ្នែកឯកជន អង្គការសង្គមស៊ីវិល និងប្រជាពលរដ្ឋយ៉ាងសកម្ម ក្នុងការជំរុញចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ យើងនឹងអាចរៀបចំរមណីយដ្ឋានទេសចរណ៍ និងសហគមន៍ទេសចរណ៍ដោយផ្តោតលើសោភ័ណភាព របៀបរៀបរយ អនាម័យ សណ្តាប់ធ្នាប់សង្គម សេវាល្អ និងបរិស្ថានល្អដើម្បីពង្រឹងគុណភាពផលិតផលទេសចរណ៍ និងមជ្ឈដ្ឋានរស់នៅរបស់ប្រជាសហគមន៍ឱ្យកាន់តែល្អប្រសើរឡើង ។ ការអភិវឌ្ឍធនធានមនុស្សផ្នែកជំនាញនៅតាមរមណីយដ្ឋាន និងសហគមន៍ទេសចរណ៍ គឺជាការលើកកម្ពស់ សមត្ថភាពជំនាញ និងផ្តល់ឱកាសការងារជូនប្រជាពលរដ្ឋ និងសហគមន៍មូលដ្ឋាន ដើម្បីបំពេញតម្រូវការទេសចរណ៍ប្រកបដោយគុណភាព។
លោកថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា ចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ ពិសេសការគ្រប់គ្រង និងអភិវឌ្ឍន៍រមណីយដ្ឋាន និងសហគមន៍ទេសចរណ៍ គឺជាអាទិភាពមួួយនៃការអភិវឌ្ឍទេសចរណ៍ប្រកបដោយប្រសិទ្ធភាព គុណភាព និងការទទួលខុសត្រូវ ។ ជាមួយគ្នានេះ ស្ថាប័នអនុវត្តផ្ទាល់ដែលទាក់ទងទៅនឹងការបង្កើត គ្រប់គ្រង និងអភិវឌ្ឍផលិតផលទេសចរណ៍ត្រូវយកចិត្តទុកដាក់ដើម្បីត្រៀមទទួលកំណើនទេសចរនៅពេលខាងមុខនេះ ។ ដើម្បីជំរុញចលនាប្រឡងប្រណាំងរមណីយដ្ឋានស្អាត និងពង្រឹងសហគមន៍ទេសចរណ៍ លោករដ្ឋមន្ត្រីបានផ្តល់ជាអនុសាសន៍សំខាន់ៗដល់អ្នកអនុវត្តកិច្ចការងារខាងលើនេះដូចជា ៖
-ក្រុមការងារនៃគណៈកម្មការចលនាប្រឡងប្រណាំងត្រូវរៀបចំបូកសរុប វាយតម្លៃលទ្ធផលការងារដែលបានអនុវត្ត និងលើកទិសដៅការងារ សកម្មភាពអនុវត្តបន្ត ក្នុងនោះត្រូវពិនិត្យ និងវាយតម្លៃសំណើសុំរបស់មន្ទីរទេសចរណ៍ស្តីពីការពិនិត្យវាយតម្លៃ និងជូនរង្វាន់អ្នកដែលមានស្នាដៃ។
-គ្រប់មន្ទីរទេសចរណ៍រាជធានី ខេត្ត ដែលជាសេនាធិការឱ្យគណៈកម្មការគ្រប់គ្រងអភិវឌ្ឍន៍ទេសចរណ៍រាជធានី-ខេត្ត ត្រូវយកចិត្តទុកដាក់ ជំរុញបន្ថែមទៀតនូវចលនាប្រឡងប្រណាំង ពិសេសការអនុវត្តស្តង់ដាអប្បបរមាសម្រាប់រមណីយយដ្ឋានជាកំណត់ និងជ្រើសរើសរមណីយដ្ឋានជាគំរូ វត្តទេសចរណ៍គំរូ សហគមន៍ទេសចរណ៍គំរូ និងការអុវត្តស្តង់ដាទីក្រុងស្អាត ដែលរាជរដ្ឋាភិបាលបានអនុម័តនាពេលថ្មីៗនេះ។
-មន្ទីរទេសចរណ៍រាជធានី-ខេត្ត ត្រូវរាយការណ៍ និងសុំយោបល់ណែនាំជាប្រចាំពីគណៈកម្មការគ្រប់គ្រងអភិវឌ្ឍន៍ទេសចរណ៍រាជធានី-ខេត្ត ស្តីពីការជំរុញអនុវត្តចលនាប្រឡងប្រណាំង។
-ចាប់ពីពេលនេះ រហូតដល់ដំណាច់ឆ្នាំ២០១១ គ្រប់ភោជនីយដ្ឋាន និងរមណីយដ្ឋាន ទេសចរណ៍នៅទូទាំងប្រទេស ត្រូវមានការប្រែប្រួលថ្មី ត្រូវស្អាត មានអនាម័យ(គ្មានការបោះសំរាមខុសគំនរសំរាម ) សណ្តាប់ធ្នាប់ល្អ បន្ទប់ទឹកស្អាត សេវាបម្រើល្អ ម្ហូបអាហារភេសជ្ជៈមានអនាម័យនិងថ្លៃលក់សមរម្យ ។
-សហគមន៍ទេសចរណ៍ត្រូវធ្វើការគ្រប់គ្រង និងអភិវឌ្ឍតាមលំនាំ 4Ps (Public-Private- Partnership-People) ។
លោករដ្ឋមន្ត្រីបន្តថា ឆ្នេរសមុទ្ររបស់កម្ពុជា បានក្លាយទៅជាគោលដៅទេសចរណ៍ដ៏ធំបន្ទាប់ពីអង្គរវត្ត និងរាជធានីភ្នំពេញ ហើយយើងឃើញថា រៀងរាល់ឆ្នាំភ្ញៀវទេសចរជាតិនិងភ្ញៀវអន្តរជាតិបានទៅកម្សាន្តនៅអង្គរវត្តជាង១លាននាក់ ហើយទេសចរអន្តរជាតិចំនួន១០% បានធ្វើដំណើរទៅកម្សាន្តនៅឆ្នេរសមុទ្រ។ បើកាលណាមានការហោះហើរពីខេត្តសៀមរាបតភ្ជាប់មកឆ្នេរសមុទ្រ យើងសង្ឃឹមថា នាវាធំៗដឹកទេសចរចូលមកកំពង់ផែខេត្តព្រះសីហនុ យ៉ាងហោចណាស់ភ្ញៀវទេសចរ៣០ទៅ៤០% ដែលមកកម្សាន្តតាមនាវានេះ នឹងទៅកម្សាន្តនៅសៀមរាប-អង្គរ ។
ទ្ទឹមនឹងនេះ ក៏មានការតភ្ជាប់ពីខេត្តសៀមរាបទៅតំបន់ប្រាសាទព្រះវិហារ ដែលជាផលិតផលទេសចរណ៍វប្បធម៌ប្រវត្តិសាស្ត្រថ្មី និងតំបន់អេកូទេសចរណ៍ផ្សេងៗទៀតផងដែរ ។ នៅតំបន់ឆ្នេរសមុទ្រ យើងក៏បានមើលឃើញច្បាស់ពីការអភិវឌ្ឍភ្នំបូកគោដែលជាមេដែកដ៏ធំមួយសម្រាប់តំបន់ឆ្នេរនេះ ។
តាមការរំពឹងទុក ឆ្នាំ២០១១ យើងអាចទទួលបានទេសចរអន្តរជាតិប្រមាណ២,៨លាននាក់នៅឆ្នាំ២០១២ ប្រមាណ៣លាននាក់ នៅឆ្នាំ២០១៣ ប្រមាណ៣,៥លាននាក់ និងនៅឆ្នាំ២០១៥ ប្រមាណ៤,៥លាននាក់ ។
យើងមានគម្រោងផែនការកំណត់យកឆ្នាំ២០២០ ជាឆ្នាំគោល ដើម្បីជំរុញទាក់ទាញទេសចរអន្តរជាតិមកទស្សនាកម្ពុជា ឱ្យបានប្រមាណ៧ទៅ៨លាននាក់ និងធ្វើឱ្យកម្ពុជាត្រូវបានទទួលស្គាល់ថាជាគោលដៅទេសចរលំដាប់ពិភពលោកប្រកបដោយភាពកក់ក្តៅ ។។ បើសម្រេចបានទេសចរអន្តរជាតិ៧ទៅ៨លាននាក់ នៅឆ្នាំ២០២០នោះ កម្ពុជាយើងអាចទទួលចំណូលពីវិស័យទេសចរណ៍ប្រមាណ៥.០០០លានដុល្លារអាមេរិក ហើយបើគិតមេគុណប្រសិទ្ធភាពសេដ្ឋកិច្ចថែម២ទៀត ចំណូលនោះអាចរីកបានដល់១០.០០០លានដុល្លារ ក្នុង១ឆ្នាំ។ ចំណូលនេះនឹងរួមចំណែកយ៉ាងសំខាន់ក្នុងកំណើនផលិតផលក្នុងស្រុកសរុប ពិសេសគឺចំណូលសម្រាប់ប្រជាជនម្នាក់ៗអាចកើនឡើងបន្ថែមជាង៤០០ដុល្លារ ដោយគ្រាន់តែវិស័យទេសចរណ៍មួយតែ ប៉ុណ្ណោះ៕
ចែករំលែកព័តមាននេះ