អត្តពលិកហ្សាម៉ាអ៊ីកស្ទីវ មូលលីងដែលជាអ្នករត់លឿនលំដាប់ទី៣ក្នុងចម្ងាយ១០០ម៉ែត្រនៅឆ្នាំនេះត្រូវគេបណ្តេញចេញពីក្រុមដែលមានគ្នា៥០នាក់បន្ទាប់ពីបរាជ័យក្នុងការធ្វើតេស្តរកសារធាតុញៀន។ ការបណ្តេញនេះធ្វើឲ្យអត្តពលិកល្បីឈ្មោះរូបនេះបាត់បង់ឱកាសបញ្ចេញសមត្ថភាពរបស់ខ្លួនក្នុងការប្រកួតជ្រើសរើសជើងឯកពិភពលោកនៅកូរ៉េខាងត្បូងដែលនឹងចាប់ផ្តើមនៅថ្ងៃទី២៧ខែសីហា ។
តាមសមាគមកីឡាអត្តពលកម្មរបស់ហ្សាម៉ាអ៊ីកឲ្យដឹងថា ដោយសារតែមានបញ្ហាលេចឡើងគួរឲ្យកត់សម្គាល់ ដូច្នេះលោកមូលលីងត្រូវលុបឈ្មោះចេញពីក្រុម។ទោះជាយ៉ាងណាក៏ដោយ ប្រសិនជាបញ្ហានោះត្រូវបានដោះស្រាយដោយឈរលើប្រយោជន៍របស់គេ ដូច្នេះនឹងមានការចាត់ចែងមួយ»។ អគ្គលេខាធិការសមាគមកីឡាអត្តពលកម្មរបស់ហ្សាម៉ាអុីកលោក Garth Gayleបាននិយាយថា អត្តពលិកមូលលីងត្រូវលុបឈ្មោះចោលពីក្រុមក៏ព្រោះតែអត្តពលិករូបនេះព្យួរការប្រកួត។
ទោះជាយ៉ាងណាក្តី គណៈកម្មាធិការប្រឆាំងនឹងសារធាតុញៀនរបស់ប្រទេសហ្សាម៉ាអ៊ីកមិនបានប្រាប់ថា អត្តពលិកមូលលីងប្រើប្រាស់សារធាតុអ្វីទេ ។ កាលពីប្រកួតជ្រើសរើសជើងឯកកីឡាអត្តពលកម្មពិភពលោកនៅក្រុងប៊ែរឡាំងឆ្នាំ២០០៩ មូលលីងគឺជាសមាជិកក្នុងក្រុមរត់បណ្តាក់ចម្ងាយ១០០ម៉ែត្រដែលដណ្តើមបានមេដាយមាស។ កាលដើមឡើយគេសង្ឃឹមថា មូលលីងនឹងមានឱកាសចូលរួមជាមួយយូសេន បូលក៏ដូចជាក្រុមរបស់ខ្លួនការពារជើងឯកកាលពីឆ្នាំ២០០៩ ។ នៅក្នុងការប្រកាសផ្សាយកាលពីថ្ងៃចន្ទ ក្រុមជម្រើសជាតិរត់ប្រណាំងហ្សាម៉ាអ៊ីកមិនបានបញ្ជាក់ថាតើកីឡាករយូសេន បូលត្រូវប្រកួតក្នុងប្រភេទចម្ងាយណាខ្លះទេ ៕
ចែករំលែកព័តមាននេះ