ខេត្តស្វាយរៀង ៖ សេរ៉ូមឡាក់តាតចំនួន៩០កេសដែលជាអំណោយរបស់លោកជំទាវកិត្តិ ព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ត្រូវបានប្រគល់ជូនមន្ទីរពេទ្យបង្អែកខេត្តស្វាយរៀង កាលពីវេលាម៉ោង៩និង៣០នាទីព្រឹកថ្ងៃទី១៧ សីហា ឆ្នាំ២០១១ តាមរយៈលោកសៅ សេរីមុន្នី រដ្ឋលេខាធិការក្រសួងធន
ខេត្តស្វាយរៀង ៖ សេរ៉ូមឡាក់តាតចំនួន៩០កេសដែលជាអំណោយរបស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ត្រូវបានប្រគល់ជូនមន្ទីរពេទ្យបង្អែកខេត្តស្វាយរៀង កាលពីវេលាម៉ោង៩និង៣០នាទីព្រឹកថ្ងៃទី១៧ សីហា ឆ្នាំ២០១១ តាមរយៈលោកសៅ សេរីមុន្នី រដ្ឋលេខាធិការក្រសួងធនធានទឹក និងឧតុនិយម ។
សូមបញ្ជាក់ថា នេះជាលើកទី២ ហើយដែលលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រគល់អំណោយសេរ៉ូមឡាក់តាតជូនដល់មន្ទីរពេទ្យបង្អែកខេត្ត សម្រាប់ប្រើប្រាស់ក្នុងការជួយព្យាបាលអ្នកជំងឺ ពិសេសគឺជនក្រីក្រ ដែលលើកទី ១ ប្រគល់ជូនកាលពីថ្ងៃទី៥ កក្កដា ឆ្នាំ២០១១ សេរ៉ូមចំនួន១៥០កេស និងលើកទី២ នេះ សេរ៉ូមចំនួន៩០កេស ស្មើនឹង១.២៦០ប្លោក។
នៅក្នុងឱកាសនៃពិធីប្រគល់អំណោយនេះ លោកឧកញ៉ា សៅ សុវណ្ណី សមាជិកក្រុមការងារគណៈកម្មាធិការកណ្តាលគណបក្សប្រជាជនកម្ពុជាចុះជួយខេត្តស្វាយរៀង និងជាអនុប្រធានក្រុមការងារចុះជួយស្រុករំដួល ជួសមុខឱ្យលោកសៅ សេរីមុន្នី ជាឪពុកបានមានប្រសាសន៍ពាំនាំបណ្តាំផ្ញើសាកសួរសុខទុក្ខពីលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់ក្រុមគ្រូពេទ្យទាំងអស់ ក៏ដូចជាបងប្អូនប្រជាពលរដ្ឋទាំងអស់ដែលកំពុងសម្រាកព្យាបាលជំងឺនៅក្នុងមន្ទីរពេទ្យបង្អែកខេត្តផងដែរ ។
លោកឧកញ៉ា សៅ សុវណ្ណី បានផ្តាំផ្ញើដល់ក្រុមគ្រូពេទ្យទាំងអស់ពេលទទួលបានអំណោយដ៏ថ្លៃថ្លារបស់លោកជំទាវកិត្តិព្រឹទ្ធបណ្ឌិតហើយសូមយកទៅប្រើប្រាស់ឱ្យបានត្រឹមត្រូវចំគោលដៅ និងមានប្រសិទ្ធភាពខ្ពស់ ឆ្លើយតបទៅនឹងគោលបំណងដ៏ថ្លៃថ្លារបស់លោកជំទាវកិត្តិព្រឹទ្ធបណ្ឌិត ដែលចង់ឱ្យបងប្អូនប្រជាពលរដ្ឋទាំងអស់ដែលបានចូលមកសម្រាកព្យាបាលជំងឺនៅក្នុងមន្ទីរពេទ្យឆាប់ជាសះស្បើយបានត្រឡប់ទៅលំនៅឋានវិញ ដោយទឹកចិត្តសប្បាយរីករាយ ។
លោកចាន់ ដារ៉ា ប្រធានមន្ទីរពេទ្យបង្អែកខេត្តបានមានប្រសាសន៍ថា លោក និងមន្ត្រីពេទ្យក្រោមឱវាទទាំងអស់ នឹងយកសេរ៉ូមដែលជាអំណោយដ៏ថ្លៃថ្លាទាំងនេះទៅប្រើប្រាស់ឱ្យបានត្រឹមត្រូវ និងចំគោលដៅប្រកបដោយប្រសិទ្ធ ភាពខ្ពស់បំផុត មិនធ្វើឱ្យលោកជំទាវកិត្តិព្រឹទ្ធបណ្ឌិតដែលជាម្ចាស់អំណោយខកបំណងឡើយ៕
ចែករំលែកព័តមាននេះ