ជើងឯកប្រណាំងរថយន្តហ្វមមូឡាវ័នពិភពលោក៧សម័យម៉ៃឃើល ស្គូម៉ាតឈ័របានចេញមុខមកបដិសេធពាក្យចចាមអារ៉ាមដែលបាននិយាយថាខ្លួនគេនឹងចូលនិវត្តន៍បន្ទាប់ពីបញ្ចប់រដូវកាលប្រណាំងឆ្នាំ២០១១នេះ។ កីឡាករអាល្លឺម៉ង់រូបនេះថែមទាំងបានបញ្ជាក់ថា ខ្លួននឹងបន្តប្រណាំងឲ្យក្រុមមែរសឺដេសរហូតដល់ឆ្នាំ២០១២។
ស្គូម៉ាតឈ័របាននិយាយថា៖«ពិតប្រាកដណាស់ខ្ញុំនឹងប្រណាំងនៅឆ្នាំក្រោយទៀត។ នេះគឺជាការពិត»។ ពាក្យចចាមអារ៉ាមអំពីការចូលនិវត្តន៍របស់កីឡាករស្គូម៉ាតឈ័របានកើតមានឡើងបន្ទាប់ពីការបញ្ចេញយោបល់របស់កីឡាករវ័យ៤២ឆ្នាំរូបនេះនៅក្នុងកាសែតមួយរបស់ប្រទេសអ៊ីតាលី។ ប៉ុន្តែទោះជាយ៉ាងណា ការចេញមុខប្រកាសរបស់កីឡាករស្គូម៉ាតឈ័រកាលពីថ្ងៃអាទិត្យសប្តាហ៍កន្លងមកនេះបានធ្វើឲ្យការនិយាយពីការចូលនិវត្តន៍របស់គេស្ងប់។
ដោយបានឈ្នះពានជើងឯកពិភពលោកលើកទី៧ចុងក្រោយនៅឆ្នាំ២០០៤ ម៉ៃឃើល ស្គូម៉ាតឈ័រក៏បានចូលនិវត្តន៍ម្តងកាលពីឆ្នាំ២០០៦។ គេបានវិលចូលទីលានប្រណាំងវិញក្នុងឆ្នាំ២០១០ដោយបើកបរឲ្យក្រុមមែរសឺដេស។
ក្រោយឆ្នាំ២០១២ កុងត្រាដែលមានរយៈពេល៣ឆ្នាំរបស់កីឡាករស្គូម៉ាតឈ័រនឹងត្រូវបញ្ចប់។ ពេលនោះបើទោះជាគេចង់បន្តការប្រណាំងក៏ដោយ តែអ្វីសំខាន់គឺនៅតែជាការសម្រេចចិត្តមួយ។ គេបាននិយាយថា៖«យើងនឹងត្រូវចាំមើលតើអ្វីៗវាវិវត្តន៍ទៅបែបណា ។តើថាមពលនិងការសប្បាយដល់ពេលនោះមានច្រើនប៉ុនណា» ។
បើទោះជាស្ថិតនៅលំដាប់ទី១០នៅលើតារាងជើងឯកពិភពលោកបច្ចុប្បន្នក៏ដោយ តែកីឡាករស្គូម៉ាតឈ័រនៅតែប្រាកដនិយមចំពោះឱកាសដណ្តើមបានពានជើងឯកពិភពលោកជាលើកទី៨នៅឆ្នាំក្រោយ ។ គេបញ្ជាក់ថា៖«វាអាចជាការពិត ប្រសិនជាសង្ឃឹមថាយើងដណ្តើមបានជើងឯកពិភពលោកនៅឆ្នាំក្រោយ។ ឯក្នុងពេលឥឡូវនេះយើងស្ថិតនៅឆ្ងាយពីជើងឯកខ្លាំងណាស់»។
ស្គូម៉ាតឈ័របាននិយាយថា ឈរនៅលើវេទិការទទួលពានគឺជាគោលបំណងរបស់គេសម្រាប់ឆ្នាំក្រោយ។ ប៉ុន្តែចាប់តាំងពីការវិលត្រឡប់ចូលប្រណាំងជាថ្មីក្នុងឆ្នាំ២០១០មក គេមិនទាន់ដណ្តើមបានចំណាត់ថ្នាក់កំពូលម្តងណានៅឡើយទេ ។
លោកថូម៉ាស់ វេប៊័រប្រធានផ្នែកស្រាវជ្រាវរបស់ក្រុមមែរសឺដេសបាននិយាយថា៖«យើងត្រូវការមួយរយៈពេលទៀតដើម្បីឈានទៅឈោងចាប់ចំណាត់ថ្នាក់កំពូល។ ពេលវេលាគឺជាអ្វីមួយដែលចាំបាច់បំផុត»៕
ចែករំលែកព័តមាននេះ