ខេត្ត​ពោធិ៍​សាត់ ៖រថយន្តដឹកបទល្មើស ព្រៃឈើចំនួន២គ្រឿង រួមនឹងមនុស្ស​ម្នាក់​ត្រូវ​សមត្ថកិច្ចចាប់បាន កាលពីវេលាម៉ោង​៨និង​១៥នាទីព្រឹក ថ្ងៃទី១៦ សីហា​ ២០១១ នៅខាង​មុខ​អធិការដ្ឋាននគរបាលស្រុកក្រគរ ស្ថិត​ក្នុង​ភូមិផ្សារ ឃុំអន្លង់ត្នោត។ រថយន្ត​ទាំងពីរ​គ្រឿង​មួយ​គ្រឿងម៉ាកមែរសឺដែស S-500​ ពណ៌ស្ករ​ពាក់ស្លាកលេខ ភ្នំពេញ 2B-4779 និងមួយ​គ្រឿងទៀតម៉ាក​កាមរីស៊េរី​95​ ពណ៌ស ចង្កូតស្ដាំ ពាក់ស្លាកលេខ ភ្នំពេញ 2A-2635។ ចំណែក​មនុស្សដែលឃាត់ខ្លួនបាន​នោះឈ្មោះស៊ូ សារ៉ូ ភេទ​ប្រុស អាយុ​31​ឆ្នាំ មាន​ទី​លំនៅ​ភូមិជ្រា​ស ​ឃុំ​ល្វា ស្រុកពួក ខេត្តសៀមរាប។រថយន្ត​មែរ​សឺ​ដែស​​ផ្ទុកឈើ​គ្រញូងចំនួន​44ដុំ និងរថយន្ត​កាម​រី​45​ដុំ សរុប89​ដុំ​ទម្ងន់​9​02គីឡូក្រាម​ស្មើនឹង​0,751​​ម៉ែត្រគូប។

ស៊ូ សារ៉ូ​ដែលឃាត់ខ្លួន​បាន​នោះ​សារ​​ភាពថា ខ្លួន​ជិះរថយន្តកាម​រីជាមួយ​អ្នក​បើកបរ​ឈ្មោះ​ឈឿន ឃឿន ដែលរត់គេចខ្លួន​មានទីលំ​នៅ​ស្រុក​ពួក ខេត្តសៀមរាបដែរ។ ចំណែក​​អ្នក​បើក​បររថយន្តមែរសឺដែសឈ្មោះ​វ៉ាន់ មានទីលំនៅ​ខេត្តឧត្តរ​មានជ័យ។ ទាំង​ពីរ​នាក់ស៊ីឈ្នួល​បើក​រថយន្ត​ដឹក​ឈើ​គ្រញូង​ឱ្យថៅ​កែ​ឈ្មោះ​ទន់​នៅ​ស្រុកក្រឡាញ់ ខេត្ត​សៀម​រាប ​យកទៅលក់នៅ​ស្រុក​មេមត់​ ខេត្ត​កំពង់ចាម។ ពេលដឹក​ឈើ​គ្រញូង​ដល់គោល​ដៅម្ដងបានប្រាក់កម្រៃម្នាក់ 100ដុល្លារ ចំណែក​ខ្លួនអ្នករួម​ដំណើរបាន​តែ​50ដុល្លារទេ។

លោកវរសេនីយ៍ត្រីប៊ិន វណ្ណា អធិការ​នគរ​បាល​ស្រុកក្រគរឱ្យដឹងថា នៅព្រឹកនោះនគរ​បាល​ចរាចរផ្លូវគោកស្រុកបាកាន បានផ្ដល់ព័ត៌​មានមកថា ឃើញរថយន្ត​ទាំងពីរគ្រឿងខាងលើ​គួរឱ្យសង្ស័យ ព្រោះហៅមិនឈប់​ ហើយ​បើក​បរក្នុងល្បឿនលឿនទៀតផង។ទទួលបាន​ព័ត៌មាននេះ​ក៏​ដូចបទបញ្ជាលោកឧត្តម​សេនីយ៍​ត្រីសារុន ចាន់​ធី ស្នងការនគរបាលខេត្ត យើង​បាន​​សហ​ការ​ជាមួយនគរបាលប្រឆាំងបទ​ល្មើស​សេដ្ឋកិច្ច​ខេត្ត​-ក្រសួង កងរាជអាវុធហត្ថ និង​មន្ត្រី​​ផ្នែក​រដ្ឋ​បាលព្រៃឈើក្រគរ ដើម្បីស្ទាក់​ចាប់​រថយន្តដែលមានការសង្ស័យ​នោះ។ មួយ​សន្ទុះ​ក្រោយមក​យើងឃើញរថយន្តដែល​មាន​ភិនភាគខាង​លើកំពុងបោះ​ពួយប្រដេញគ្នាយ៉ាង​លឿន​លើផ្លូវជាតិលេខ5 ក្នុងទិសដៅពីកើត​ទៅលិច។ ដោយកម្លាំងខាងមុខហៅឱ្យ​ឈប់មិន​ឈប់ យើងបានទាញបារ៉ាសដាក់កាត់​ទទឹងថ្នល់ នៅខាងមុខអធិការដ្ឋាននគរបាល​ស្រុកក្រគរ ស្រាប់តែរថយន្ត​ទាំងពីរគ្រឿងនោះ​បើក​បំបុក​បារ៉ាសទាំងកំរោលហើយជ្រុលទៅ​បុករថយន្ត​សមត្ថកិច្ចខូចខាតអស់​ចំនួន2គ្រឿងទៀតផង។ ដោយទៅមុខលែងរួចអ្នកបើក​បរបាន​ទុករថ​យន្តចោល​ទីនោះរួចនាំគ្នា​រត់​គេចខ្លួនបាត់ នៅ​សល់​តែអ្នក​រួមដំណើរ​ម្នាក់មិន​រត់​ទៅណាក៏​ឃាត់​ខ្លួន​បានតែម្ដង។

សម​ត្ថ​កិច្ច​យើងបានឆែកឆេរក្នុងរថយន្ត ឃើញផ្ទុកសុទ្ធតែឈើគ្រញូង ក៏នាំយកវត្ថុតាង​និងមនុស្សម្នាក់នោះប្រគល់ទៅឱ្យខាងរដ្ឋបាល​ព្រៃ​ឈើ និងបញ្ជូន​ទៅតុលា​ការ ដើម្បីចាត់ការ​តាម​ផ្លូវ​ច្បាប់។លោកឱ្យដឹងថា អ្នកបើកបរ​រថ​យន្ត​ដឹកឈើគ្រញូង​សព្វថ្ងៃនេះភាគច្រើន​សុទ្ធ​តែញៀនថ្នាំ មិនខ្លាច​ស្លាប់​នោះ​ឡើយ ដែល​ធ្វើឱ្យ​សមត្ថកិច្ច​មានការលំបាកក្នុងការស្ទាក់​ចាប់រថយន្តពួកគេម្ដងៗ។

លោកគឹម ចេត្ថាវី នាយផ្នែក​រដ្ឋបាល​ព្រៃ​ឈើក្រគរ ឱ្យដឹងថា ក្នុងរយះពេលមួយសប្ដាហ៍នេះ សមត្ថកិច្ចយើងចាប់បានអ្នករកស៊ីដឹកឈើចំនួន5នាក់ដាក់ពន្ធនា​គារហើយ ក្នុងនោះនៅស្រុកក្រគរ3នាក់ និងស្រុកភ្នំក្រវាញ2នាក់រួមនឹងឈើគ្រញូងនិងរថយន្តជាវត្ថុតាងមួយចំនួនទៀត។ ទន្ទឹមនឹងនេះ សមត្ថកិច្ចយើងក៏កំពុងតែ
សហការគ្នាបន្តបង្ក្រាបដូចភ្លៀងរលឹម ដើម្បីអនុវត្តឱ្យខាងតែបានតាមទិសដៅរបស់រាជរដ្ឋា ភិបាល ក៏ដូចរដ្ឋមន្ត្រីក្រសួងកសិកម្មរុក្ខាប្រមាញ់
និនេសាទ រដ្ឋបាលព្រៃឈើ និងអភិ​បាល​ខេត្ត​ពោធិ៍សាត់ផងដែរ៕