អ្នកនាំពាក្យម្នាក់របស់កងកម្លាំងអន្តរជាតិនៅអាហ្វហ្គានីស្ថាន ISAF គូសបញ្ជាក់កាលពីថ្ងៃទី១៥ សីហា ថា កងកម្លាំង ISAF ដឹកនាំដោយអូតង់បានចេញធ្វើបេសកកម្មតាមអាកាសដល់ទៅជាង៥០.០០០លើកនៅអាហ្វហ្គានីស្ថាន ក្នុងរយៈពេល១ឆ្នាំកន្លងទៅនេះ
អ្នកនាំពាក្យម្នាក់របស់កងកម្លាំងអន្តរជាតិនៅអាហ្វហ្គានីស្ថាន ISAF គូសបញ្ជាក់កាលពីថ្ងៃទី១៥ សីហា ថា កងកម្លាំង ISAF ដឹកនាំដោយអូតង់បានចេញធ្វើបេសកកម្មតាមអាកាសដល់ទៅជាង៥០.០០០លើកនៅអាហ្វហ្គានីស្ថាន ក្នុងរយៈពេល១ឆ្នាំកន្លងទៅនេះ។
ក្នុងឱកាសនៃសន្និសីទសារព័ត៌មានប្រចាំសប្តាហ៍មួយរបស់ ISAF អ្នកនាំពាក្យរូបនេះ ឧត្តមសេនីយ៍ត្រី CARSTEN JACOBSON អះអាងប្រាប់បណ្តាអ្នកកាសែតថា កាលពីឆ្នាំកន្លងមកនេះ ISAF បានបំពេញបេសកកម្មតាមឧទ្ធម្ភាគចក្រជាង៥០.០០០លើក ។ ក្នុងបេសកកម្មទាំងនេះឧទ្ធម្ភាគចក្រ៣គ្រឿង ត្រូវបាត់បង់ដោយសារសកម្មភាពរបស់ពួកសត្រូវ ដោយឧទ្ធម្ភាគចក្រមួយគ្រឿងត្រូវបាញ់ធ្លាក់កាលពីសប្តាហ៍មុន។
យោងតាមប្រភពដដែលនេះថា កងកម្លាំងអូតង់ និងកងកម្លាំងរដ្ឋាភិបាលអាហ្វហ្គានីស្ថានបានចេញធ្វើប្រតិបត្តិការពិសេសជាង២.៨០០លើក ដែលអាចចាប់ខ្លួន ឬសម្លាប់បណ្តាមេដឹកនាំតាលីបង់ ក្នុងដំណាក់កាលដូចគ្នានេះ។
សម្រាប់កងកម្លាំងប្រតិបត្តិការពិសេសការហោះហើរបំពេញបេសកកម្ម១០.០០០លើក ត្រូវបានបំពេញក្នុងដំណាក់កាលដូចគ្នានេះ ដោយជួយទ្រទ្រង់ដល់ប្រតិបត្តិការជាង២.៨០០លើក។ ការប្រកាសពីតួលេខនេះធ្វើឡើង១០ថ្ងៃ ក្រោយពីកងទ័ពអាមេរិករងការបាត់បង់ធ្ងន់ធ្ងរបំផុតរយៈពេលតែមួយថ្ងៃពុំធ្លាប់មានតាំងពីចាប់ផ្តើមសង្គ្រាមនៅអាហ្វហ្គានីស្ថានមក។ ទាហានអាមេរិកដល់ទៅ៣០នាក់ត្រូវស្លាប់ពេលសត្រូវបាញ់ធ្លាក់ឧទ្ធម្ភាគចក្រធុន CH-47 CHI-NOOK មួយគ្រឿងកាលពីថ្ងៃទី៦ សីហា ៕
ចែករំលែកព័តមាននេះ