ADផ្ទាំងផ្សព្វផ្សាយពាណិជ្ជកម្ម

Picture

ទូត​អា​មេ​រិ​ក​នៅ​កម្ពុជា​៖ ​សហរដ្ឋអាមេរិក គោរព​អធិបតេយ្យភាព​របស់​កម្ពុជា និង​ជឿជាក់​ថា ភាព​ជា​ដៃគូ​ដ៏​រឹង​មាំ​កើតឡើង​ពី​ការ​គោរព​គ្នា​ទៅ​វិញ​ទៅ​មក

1 ថ្ងៃ មុន

រាជធានី​ភ្នំពេញ​ ៖ ស្ថានទូត​អា​មេ​រិ​ក​ប្រចាំ​នៅ​កម្ពុជា ​បាន​បញ្ជាក់​ថា​ សហរដ្ឋអាមេរិក បាន​គោរព​អធិបតេយ្យភាព​របស់​កម្ពុជា និង​ជឿជាក់​ថា ភាព​ជា​ដៃគូ​ដ៏​រឹង​មាំ​កើតឡើង​ពី​ការ​គោរព​គ្នា​ទៅ​វិញ​ទៅ​មក និង​ត្រូវ​បាន​វាស់វែង​តាម​លទ្ធផល​ជាក់ស្តែង ​។

យោង​តាម​បណ្តាញ​សង្គម​របស់​ហ្វេ​ស​ប៊ុ​ក​របស់​ស្ថានទូត​អា​មេ​រិ​ក​នៅ​កម្ពុជា​ បាន​លើក​ឡើង​ថា​ ជំពូក​ថ្មី ​នៃ​ទំនាក់ទំនង​រវាង​សហរដ្ឋអាមេរិក និង​កម្ពុជា​នៅ​ថ្ងៃ​ទី​១៨ វិច្ឆិកា ឆ្នាំ​២០២៦ ឯកឧត្តម គ្រី​ស្តូ​ហ្វឺ​រ អ៊ែន​ដឺ​សិន​ (Christopher Anderson) ឯកអគ្គរដ្ឋទូត​វិសាមញ្ញ និង​ពេញ​សមត្ថភាព ​នៃ​សហរដ្ឋអាមេរិក​ប្រចាំ​ព្រះរាជាណាចក្រ​កម្ពុជា ក្នុង​ជំនួប​សម្តែង​ការ​គួរសម និង​ពិភាក្សា​ការងារជាមួយ​សម្តេច​បវរ​ធិ​បតី ហ៊ុន ម៉ា​ណែ​ត ​នាយក​រដ្ឋមន្ត្រី​កម្ពុជា នៅ​វិមាន​សន្តិភាព​ ។

ប្រភព​បាន​លើក​ឡើង​ថា​ ជួប​ប្រជុំ​គ្នា​ជា​លើក​ដំបូង ដើម្បី​ពិភាក្សា​អំពី​ការ​ពង្រីក​ពាណិជ្ជកម្ម និង​ការ​វិនិយោគ ព្រមទាំង​ការ​ពង្រឹង​កិច្ច​សហប្រតិបត្តិការ​ផ្នែក​ការពារ​ជាតិ ​។

មេដឹកនាំ​ទាំង​ពីរ ក៏​បាន​ផ្តោត​លើ​ការ​បង្ក្រាប​បណ្តាញ​ឧក្រិដ្ឋកម្ម​ឆបោក​ឆ្លង​ដែន ដែល​បង្ក​គ្រោះថ្នាក់​ដល់​ប្រជាជន​អា​មេ​រិ​ក និង​កម្ពុជា​ផង​ដែរ​ ។

នាយក​រដ្ឋមន្ត្រី និង​ឯកអគ្គរដ្ឋទូត អ៊ែន​ដឺ​សិន ក៏​បាន​ចែករំលែក​បទ​ពិសោធន៍​អំពី​ការ​ហ្វឹកហ្វឺន​ក្នុង​ជួរ​កងទ័ព​សហរដ្ឋអាមេរិក ដែល​បាន​បន្ថែម​ភាព​ស្និទ្ធស្នាល​ផ្ទាល់ខ្លួន លើ​កិច្ច​ពិភាក្សានេះ និង​បង្ហាញ​ពី​ចំណង​ពិសេស​រវាង​មេដឹកនាំ​ទាំង​ពីរ ​។

ស្ថានទូត​បាន​បញ្ជាក់​ថា​៖ “​សហរដ្ឋ​អា មេ​រិ​ក គោរព​អធិបតេយ្យភាព​របស់​កម្ពុជា និង​ជឿជាក់​ថា ភាព​ជា​ដៃគូ​ដ៏​រឹង​មាំ​កើតឡើង​ពី​ការ​គោរព​គ្នា​ទៅ​វិញ​ទៅ​មក និង​ត្រូវ​បាន​វាស់វែង​តាម​លទ្ធផល​ជាក់ស្តែង​” ៕