ខេត្តស្វាយរៀង៖ ឪពុកចុងអប្រិយម្នាក់ បានចាប់រំលោភកូនស្រីអាយុ១៦ឆ្នាំ រហូតមានផ្ទៃពោះ៦ខែ ទើបបែកធ្លាយដល់ម្ដាយ ប្ដឹងសមត្ថកិច្ចហៅមកសួរនាំ តែប្ដីកំហូចមិនព្រមឆ្លើយសារភាព បែរជាប្រកែក។ ប៉ុន្តែនៅពេលសមត្ថកិច្ច កំពុងសួរជនរងគ្រោះ (ម្ដាយ និងកូនស្រី) ភ្លេចខ្លួន ជនសង្ស័យជាឪពុកចុង ដែលសមត្ថកិច្ចឃាត់ខ្លួននៅក្នុងបន្ទប់ប៉ុស្តិ៍ មិននឹកស្មានថា ទាញបានក្រមាយកទៅចង.កធ្វើអត្តឃាតនៅក្នុងប៉ុស្តិ៍រដ្ឋបាលឃុំថ្មី បង្កឱ្យមានការភ្ញាក់ផ្អើលយ៉ាងខ្លាំង។ សំណាងល្អ សមត្ថកិច្ចឃើញក៏យកកាំបិតកាត់ក្រមាជួយទាន់ (មិនស្លាប់) គ្រាន់តែរបួសធ្ងន់ ទើបសមត្ថកិច្ចហៅរថយន្តសាមុយ ដឹកបញ្ជូនមកមន្ទីរពេទ្យបង្អែកខេត្តស្វាយរៀងដើម្បីសង្គ្រោះ ។
ករណីបង្កការភ្ញាក់ផ្អើលនេះកើតឡើងនាវេលាម៉ោង០៨ព្រឹក ថ្ងៃទី១៨ ខែវិច្ឆិកា ឆ្នាំ២០២៦ ស្ថិតនៅប៉ុស្តិ៍រដ្ឋបាលឃុំថ្មី ក្នុងភូមិអូរ ឃុំថ្មី ស្រុកកំពង់រោទិ៍។ ទាក់ទិននឹងករណីនេះដែរ លោកមេឃុំថ្មី បានប្រាប់អ្នកសារព័ត៌មានយើងថា ពិតជាមានករណីឪពុកចុងចាប់រំលោភកូនស្រី អាយុ១៦ឆ្នាំ រហូតមានផ្ទៃពោះ០៦ខែ ពិតប្រាកដមែន។ សមត្ថកិច្ចបានទទួលពាក្យបណ្ដឹងពីម្ដាយនារីរងគ្រោះហើយ ដោយជនសង្ស័យឈ្មោះ រិន វិត ភេទប្រុស អាយុ ៣៦ឆ្នាំ ជាឪពុកចុង មានទីលំនៅភូមិកោះត្រាច ឃុំថ្មី ស្រុកកំពង់រោទិ៍ ។
បច្ចុប្បន្ន សមត្ថកិច្ចកំពុងអនុវត្តដំណើរការនីតិវិធី ដោយជនសង្ស័យចង.កធ្វើអត្តឃាតរងរបួសធ្ងន់ និងត្រូវបានបញ្ជូនមកសង្គ្រោះនៅមន្ទីរពេទ្យខេត្តស្វាយរៀង។ ទោះបីជាយ៉ាងណា សមត្ថកិច្ចកំពុងបន្តដំណើរការនីតិវិធី និងកសាងសំណុំរឿងបញ្ជូនមកស្នងការដ្ឋាននគរបាលខេត្តស្វាយរៀង ដើម្បីចាត់ការបន្តតាមច្បាប់ ៕





ចែករំលែកព័តមាននេះ