អាជ្ញាធរចំនួន៣នាក់ត្រូវតុលាការខេត្តព្រៃវែង កោះហៅឲ្យចូលបំភ្លឺក្នុងរឿងទំនាស់ដីផ្លូវសាធារណៈ
- ព្រៃវែង
ខេត្តព្រៃវែង ៖ តំណាងអយ្យការអមសាលាដំបូងខេត្តព្រៃវែង បានកោះហៅអាជ្ញាធរចំនួន៣នាក់ រួមមាន អតីតមេភូមិ អនុភូមិ និងអតីតមេឃុំ ឲ្យចូលបំភ្លឺ នៅរសៀលថ្ងៃទី១៨ វិច្ឆិកា នេះ តាមបណ្តឹងរបស់ឈ្មោះ លឹម គួង និងប្រពន្ធឈ្មោះ តិច ចាន់សុភា ដែលចោទប្រកាន់ពីបទ «ញុះញង់ឱ្យមានការរើសអើស និងអំពើញុះញង់ប្រព្រឹត្តតាមផ្លូវសារព័ត៌មាន» ។

យោងតាមដីកាដែលចេញដោយលោកព្រះរាជអាជ្ញារង តាន់ ប៊ុនលី បង្ហាញថា អាជ្ញាធរទាំង៣នាក់នេះ រួមមានលោក ហេង សៅ អាយុ៦៤ឆ្នាំ ជាអតីតមេភូមិធ្នុង ។ លោកស្រី ផេង ធី អាយុ៥២ឆ្នាំ ជាអនុភូមិធ្នុង និងលោក អុប ស៊ាត អាយុ៦៨ អតីតមេឃុំ
ជាខ្លាង ។
ការប្តឹងនេះ គឺដោយសារតែអតីតអាជ្ញាធរទាំង៣រូបនេះ តំណាងឱ្យប្រជាពលរដ្ឋនៅក្នុងភូមិ-ឃុំរបស់ខ្លួនបានព្យាយាមទាមទារឱ្យទុកផ្លូវ ដើម្បីប្រជាពលរដ្ឋធ្វើដំណើរ និងដឹកកសិផលផ្សេងៗ តែមានការជំទាស់ពីដើមបណ្តឹងទាំង២នាក់ប្តីប្រពន្ធ បើទោះបីជាផ្លូវគឺជាគម្រោងអភិវឌ្ឍន៍ក្នុងឃុំជាខ្លាង ស្រុកស្វាយអន្ទរ ខេត្តព្រៃវែងក្តី ។
គួរបញ្ជាក់ផងដែរថា កន្លងមក អាជ្ញាធរស្រុកស្វាយអន្ទរ ក៏ធ្លាប់បានចុះទៅពិនិត្យមើលទីតាំងផ្លូវមានទំនាស់ និងហៅភាគីពាក់ព័ន្ធទាំងអស់ធ្វើការដោះស្រាយជាច្រើនលើកផងដែរ ប៉ុន្តែពុំទទួលបានលទ្ធផល ។



ចែករំលែកព័តមាននេះ