រាជធានីភ្នំពេញ​​ ៖ ​ជនសង្ស័យជាមុខ​សញ្ញា​ចោរប្លន់ ដែលបានបាញ់សម្លាប់ប៉ូលិស​ព្រហ្ម​ទណ្ឌកម្រិតធ្ងន់២នាក់ កាលពីយប់ថ្ងៃទី១៤​សីហា កន្លងមកនេះ ត្រូវបាន​សមត្ថកិច្ចស្គាល់​អត្តសញ្ញាណហើយ ហើយនៅពេលនេះសមត្ថ​កិច្ច​កំពុងតាមប្រមាញ់​។ នេះបើយោងតាម​លោក​ស្នងការនគរបាលរាជធានីភ្នំពេញ ទូច ណារ៉ុថ ដែលថ្លែងតាមទូរស័ព្ទប្រាប់កោះសន្តិភាពនៅព្រឹកថ្ងៃទី១៦ សីហានេះ​។

លោកស្នងការ​ទូច ណារ៉ុថ បានបញ្ជាក់​ទៀត​ថា សមត្ថកិច្ចមានដីកាតាមចាប់ខ្លួនហើយ ហើយ​ដោយសារពុំទាន់មានបញ្ជាពីថ្នាក់លើអោយមាន ការបង្ហាញឈ្មោះជនសង្ស័យប្រាប់​អ្នកកា​សែត​នោះ លោកសុំត្រឹមតែបញ្ជាក់ថា ជនសង្ស័យគឺ​ជា​មន្រ្តីកងរាអាវុធហត្ថរាជធានីភ្នំពេញ និង​ជា​មុខ​សញ្ញាចោរប្លន់ពេលយប់​។ លោកឧត្តម​សេនីយ៍​ទូច ណារ៉ុថ បញ្ជាក់ទៀតថា ជនសង្ស័យ​មិន​ទាន់ចេញពីភ្នំពេញនៅឡើយទេ ហើយនៅ​ពេលនេះមន្រ្តីជំនាញកងរាជអាវុធហត្ថ និង ប៉ូលិស ក៏ដូចជាអាជ្ញាធរមូលដ្ឋាន កំពុងសហ​ការគ្នាតាមប្រមាញ់ឧក្រិដ្ឋជនរូបនេះយកមកផ្ទន្ទា ទោសតាមច្បាប់ ។ 

គួររំលឹកថា មន្ត្រីប៉ូលិសការិយាល័យ​ព្រហ្ម​ទណ្ឌកម្រិតធ្ងន់នៃស្នងការដ្ឋាននគរបាលរាជធានី ២នាក់ ត្រូវជនសង្ស័យដែលគេអះអាងថា ជា​មុខ​សញ្ញាចោរប្លន់ម្នាក់​បានបាញ់សម្លាប់ ខណៈ​ពេលបើករថយន្តម៉ាកកាមរីឆ្លាម ពណ៌ស្ករ ពាក់​ស្លាកលេខភ្នំពេញ 2A-5777 មួយគ្រឿង តាម​ប្រមាញ់ និងស្ទាក់ដើម្បីត្រួតពិនិត្យ។ ហេតុ​ការណ៍បាញ់សម្លាប់មន្ត្រីប៉ូលិសនេះបានត្រូវសមត្ថកិច្ចឱ្យដឹងថា កើតឡើងកាលពីវេលា​ម៉ោង​២និង៤០នាទីរំលង​អធ្រាត្រឈានចូលថ្ងៃទី១៤ សីហា នៅចំណុចមុខ​មន្ទីរ​ពហុព្យាបាលម៉ៅ សារី តាមបណ្តោយផ្លូវលេខ៥១៦ ស្ថិតក្នុងសង្កាត់បឹង​កក់ទី១ ខណ្ឌទួលគោក​។ តាមសមត្ថកិច្ចឱ្យ​ដឹង​ថា ជនសង្ស័យមានគ្នាតែម្នាក់ឯងទេ ជិះម៉ូតូម៉ាក​ហុង​ដា C125 ពណ៌ខ្មៅ មួយគ្រឿង បានបាញ់​ស្រោចដោយកាំភ្លើងខ្លី បណ្តាលឱ្យមន្ត្រីប៉ូលិស​ម្នាក់ដួលស្លាប់នៅលើដងផ្លូវទាំងដៃកាន់កាំភ្លើងខ្លីម៉ាក BERETTA និងម្នាក់ទៀតស្លាប់នៅជាប់​ច​ង្កូតរថយន្ត​។ មន្ត្រីប៉ូលិសរងគ្រោះទី១-លោក​គង់ សុវិចិត្រ ហៅជា អាយុ៣២ឆ្នាំ រហស្ស​នាម​រាត្រី៣៦ មានឋានន្តរស័ក្តិជាអនុសេនីយ៍ត្រី មាន​ទីលំនៅផ្ទះលេខ៤៣ ផ្លូវលេខ៣១០ សង្កាត់​ទួលស្វាយព្រៃទី១ ខណ្ឌចំការមន ទី២-លោក​រឿន ប៉ូ ហៅមាស អាយុ៣២ឆ្នាំ មានឋានន្តរ​ស័ក្តិព្រិន្ទបាលឯក រហស្សនាមរាត្រី៨៥ មានទី​លំនៅក្នុងសង្កាត់ស្រះចក ខណ្ឌដូនពេញ ។

តាមសាក្សីនៅកន្លែងកើតហេតុបានឱ្យដឹងថា នៅមុនពេលមានការបាញ់ប្រហារនេះ គេ​ឃើញ​មន្ត្រីប៉ូលិសទាំង២នាក់ បើករថយន្តម៉ាកកាមរី​ឆ្លាមមួយគ្រឿង ឈប់ស្ទាក់ផ្លូវបុរស​ម្នាក់ជិះម៉ូតូ​មា៉កហុងដា C125 ពណ៌ខ្មៅ ដែលសមត្ថកិច្ច​អះ​អាងថា ជាមុខសញ្ញាចោរប្លន់ នៅចំណុចតាម​ផ្លូវលេខ៥១៦ មុខមន្ទីរពហុព្យាបាលម៉ៅសារី ស្ថិត​ក្នុងសង្កាត់បឹងកក់ទី១​៕