ADផ្ទាំងផ្សព្វផ្សាយពាណិជ្ជកម្ម

Picture

វិទ្យាស្ថាន BIT បើក​ទទួល​ពាក្យ​ធ្វើតេស្ត​ទទួលស្គាល់​ជំនាញ​ពី​មុន (RPL) ជំហាន​ទី ​២ សម្រាប់​អតីត​ពលករ​ជិត ​៣០០​នាក់

3 ថ្ងៃ មុន

រាជធានីភ្នំពេញ​ ៖ វិទ្យាស្ថាន​បច្ចេកវិទ្យា​បាត់ដំបង (BIT) នៃ​ក្រសួង​ការងារ និង​បណ្ដុះបណ្ដាល​វិជ្ជាជីវៈ កំពុង​អនុវត្ត​នូវ​ការ​ធ្វើតេស្ត​ទទួលស្គាល់​ជំនាញ​ពី​មុន (RPL) ជំហាន​ទី​២ សម្រាប់​បងប្អូន​អតីត​ពលករ​ដែល​ត្រឡប់​មក​ពី​ប្រទេស​ថៃ​ចំនួន​ជិត ២៨២​នាក់ ដើម្បី​ប្រែក្លាយ​បទ​ពិសោធ​ការងារ​និង​ចំណេះ​ជំនាញ​ដែល​ខ្លួន​មាន ឱ្យទៅ​ជា​ជំនាញ​ផ្លូវការ ដោយ​រាជរដ្ឋាភិបាល​ជា​អ្នករ៉ាប់រង​បង់ថ្លៃ​ធ្វើតេស្ត​ជំនួស​។

លោក តេ​ង ចិន្ដា នាយ​វិទ្យាស្ថាន​បច្ចេកវិទ្យា​បាត់ដំបង បានឱ្យ​ដឹង​ថា មជ្ឈមណ្ឌល​ធ្វើតេស្ត​របស់​វិទ្យាស្ថាន​បាន​ផ្តើម​ការ​ធ្វើតេស្ត​កាលពី​ថ្ងៃ​ទី​៣០ ខែតុលា ឆ្នាំ​២០២៦ គិត​រហូត​មក​ត្រឹម​ថ្ងៃ​ទី​១៥ ខែវិច្ឆិកា ឆ្នាំ​២០២៦​នេះ បងប្អូន​អតីត​ពលករ​មក​ពី​ប្រទេស​ថៃ​ដែល​បាន​ចូលរួម​ធ្វើតេស្ត​សរុប​ចំនួន​ជាង ២០០​នាក់​។

លោក​ថ្លែង​ថា «​រហូត​មក​ដល់​ថ្ងៃនេះ មាន​បងប្អូន​អតីត​ពលករ ២៣៧​នាក់​ហើយ បាន​ចូលរួម​ធ្វើតេស្ត​បញ្ជាក់​ជំនាញ​របស់​ខ្លួន ដើម្បី​ទទួល​បាន​វិញ្ញាបនបត្រ​ជំនាញ​ផ្លូវការ ។​វិញ្ញាបនបត្រ​នោះ គឺជា​ស្ពាន​ដើម្បី​បន្ត​ការ​សិក្សា​ជំនាញ​កម្រិត​ខ្ពស់ ដែល​អាច​បង្កើន​ទំនុកចិត្ត​ពី​ខាង​វិស័យ​ឯកជន និង​ក្រុមហ៊ុន​ផ្សេង​ៗ ជា​ពិសេស​គឺ​ការ​ជួយ​បង្កើន​ឱកាស​ការងារ​របស់​ខ្លួន​ផង​ដែរ​»​។

លោកនាយក​វិទ្យាស្ថាន​បាន​អំពាវនាវ​ដល់​យុវជន កម្មករនិយោជិត និង​ប្រជាពលរដ្ឋ​ដែល​មាន​ជំនាញ ប៉ុន្តែ​មិន​ទាន់​មាន​វិញ្ញាបនបត្រ​បញ្ជាក់​សមត្ថភាព សូម​ចុះ​ឈ្មោះ​ធ្វើតេស្ត RPL ដោយ​ឥត​គិតថ្លៃ ដើម្បី​ទទួល​បានការ​វាយតម្លៃ និង​ការ​បញ្ជាក់​សមត្ថភាព​របស់​ខ្លួន សម្រាប់​ប្រើប្រាស់​ក្នុង​ការ​ស្វែងរក​ការងារ និង​អភិវឌ្ឍ​អាជីព សំដៅ​លើកកម្ពស់​ជីវភាព​ឱ្យ​កាន់តែ​ប្រសើរ​ឡើង​នៅ​ក្នុង​ប្រទេស​កម្ពុជា​៕ អត្ថបទសហការ