ប្រធានាធិបតីម៉ុងហ្គោលីប្រកាសលាលែងពីតំណែង ក្រោយរងការចោទប្រកាន់ពីបទពុ.ករលួយ
- ភ្នំពេញ
រដ្ឋធានីអ៊ូឡង់បាទ័រ ៖ ប្រធានាធិបតីម៉ុងហ្គោលី លោក Ukhnaa Khurelsukh បានប្រកាសលាលែងពីតំណែង នៅថ្ងៃទី ១៧ ខែវិច្ឆិកា ឆ្នាំ២០២៦ បន្ទាប់ពីមានការចោទប្រកាន់ពីបទពុករលួយ និងការគំរាមដកតំណែងពីគណបក្សប្រឆាំង។ នេះបើតាមការចេញផ្សាយពី AFP។
ការប្រកាសលាលែងពីតំណែងរបស់លោកធ្វើឡើងមួយថ្ងៃប៉ុណ្ណោះ បន្ទាប់ពីគណបក្សប្រជាធិបតេយ្យដែលជាបក្សប្រឆាំង បានចេញសេចក្តីថ្លែងការណ៍ចោទប្រកាន់លោកពីបទស៊ីសំណូក និងអំពាវនាវឱ្យលោកចុះចេញពីតំណែង បើពុំនោះទេនឹងប្រឈមមុខនឹងការដកតំណែងនៅក្នុងសភា។
ប្រធានាធិបតីម៉ុងហ្គោលីទី ៦ វ័យ៥៨ឆ្នាំរូបនេះ បានថ្លែងនៅក្នុងសន្និសីទសារព័ត៌មានថា លោកកំពុងត្រូវបានគេចោទប្រកាន់ដោយមិនពិត និងបរិហារកេរ្តិ៍ជាមួយការចោទប្រកាន់ពីបទឧក្រិដ្ឋកម្មដ៏ធ្ងន់ធ្ងរ ហើយលោកនឹងលាលែងពីតំណែង ដើម្បីស្តារកិត្តិយសរបស់លោកឡើងវិញ។ លោកក៏បានបដិសេធការចោទប្រកាន់ការប្រព្រឹត្តខុសឆ្គង ដោយបានបញ្ជាក់ថា លោកមិនដែលបានលួចទ្រព្យសម្បត្តិពីប្រជាជន ឬរដ្ឋឡើយ ហើយក៏មិនដែលលួចបន្លំ ឬបោកប្រាស់នរណាម្នាក់ដែរ។
គណបក្សប្រជាធិបតេយ្យ កាលពីថ្ងៃចន្ទបានប្រកាសថា ប្រទេសម៉ុងហ្គោលីបានធ្លាក់ក្នុងអំពើពុករលួយយ៉ាងស៊ីជម្រៅ ហើយក៏បានទាមទារឱ្យមន្ត្រីជាន់ខ្ពស់រដ្ឋាភិបាល រួមទាំងលោកប្រធានាធិបតី Ukhnaa Khurelsukh ដែលមានការពាក់ព័ន្ធនឹងការចោទប្រកាន់ពីបទពុករលួយ លាលែងពីតំណែង និងប្រឈមមុខនឹងការស៊ើបអង្កេតផងដែរ។
គួរបញ្ជាក់ថា ប្រទេសម៉ុងហ្គោលីបានជួបប្រទះនឹងភាពចលាចលនយោបាយអស់រយៈពេលជាច្រើនខែ ក៏ដូចជាជម្លោះផ្ទៃក្នុងនៃគណបក្សប្រជាជនម៉ុងហ្គោលី (MPP) ដែលកំពុងកាន់អំណាច។ កាលពីខែមីនាកន្លងទៅ សមាជិកសភាបានតែងតាំងនាយករដ្ឋមន្ត្រីលើកទី៣ របស់ប្រទេសក្នុងរយៈពេលមិនដល់ ១២ ខែផង បន្ទាប់ពីមានការតវ៉ាប្រឆាំងអំពើពុករលួយអស់រយៈពេលជាច្រើនសប្តាហ៍។
លើសពីនេះទៀត យុវជនរាប់ពាន់នាក់បានធ្វើបាតុកម្មនៅក្នុងរដ្ឋធានីអ៊ូឡង់បាទ័រ ដោយសម្តែងកំហឹងចំពោះក្រុមអ្នកមានអំណាច ក៏ដូចជាអ្វីដែលពួកគេបានមើលឃើញថា ភាពអយុត្តិធម៌កើតមានពាសពេញសង្គម។
យោងតាមច្បាប់ប្រទេសម៉ុងហ្គោលី ប្រធានរដ្ឋសភា គឺលោក Sandag Byambatsogt មកពីគណបក្សប្រជាជនម៉ុងហ្គោលី នឹងឡើងកាន់តួនាទីជាប្រធានាធិបតីស្តីទី ហើយការបោះឆ្នោតជ្រើសរើសប្រធានាធិបតីថ្មី ត្រូវតែរៀបចំឡើងក្នុងរយៈពេល៤ខែ៕




ចែករំលែកព័តមាននេះ