ADផ្ទាំងផ្សព្វផ្សាយពាណិជ្ជកម្ម

Picture

ស្ថានភាពនៅយេម៉ែនកាន់តែតានតឹង! ពួកហ៊ូធីវាយលុកជិត​ដល់រដ្ឋធានីបណ្តោះអាសន្ន ធ្វើឱ្យសម្ព័ន្ធមិត្តត្រូវផ្លាស់ប្តូរមេ​បញ្ជាការយោធា

3 ថ្ងៃ មុន

ប្រទេស​យេ​ម៉ែ​ន ៖ ពួក​ឧទ្ទាម​ហ៊ូ​ធី​យេ​ម៉ែ​ន​ពេល​នេះ​ កំពុង​វាយលុក​ចូល​ដល់​កៀក​មាត់ទ្វារ​ក្រុង​អា​ដេ​ន​រដ្ឋធានី​បណ្ដោះអាសន្ន ខណៈ​កងទ័ព​រដ្ឋាភិបាល​ទទួលស្គាល់​ ដោយ​អន្តរជាតិ​កំពុង​បាក់ទ័ព​លើក​មក​ប្រមូលផ្ដុំ​ការពារ​ក្រុង​អា​ដេ​ន ​។

ពួក​យុទ្ធ​ជន​ស្និទ្ធិអ៉ី​​រ៉​ង​មុន​នេះ​ បាន​វាយ​រុលទៅមុខ និង​លើក​មក​ដល់​កាន់តែ​កៀក​ក្រុង​អា​ដេ​ន​រដ្ឋធានី​ អតីត​យេ​ម៉ែ​ន​​ខាងត្បូង​នោះ​ ។ ពួក​ហ៊ូ​ធី​វាយលុក​ចូល​ដល់​ខេត្ត ​LAHL ភាគ​ខាងត្បូង​យេ​ម៉ែ​ន​ ។ ពួក​គេ​វាយ​កាន់កាប់​ស្រុក​អាល់​ម៉ា​ដា​រី​បា​ហ៍ ​ហើយ​កំពុង​វាយ​រុលទៅមុខ​សំដៅ​ក្រុង​អា​ដេ​ន​ ។ ពួក​ហ៊ូ​ធី​ពេល​នេះ​ ស្ថិត​នៅ​ក្នុង​ជំរំ​ទ័ព​អា​ខា​រ៉ា​ស​ខេត្ត​អាល់​ម៉ា​ដា​រី​បា​ហ៍ ចម្ងាយ​៦០​គីឡូម៉ែត្រ​ពី​កណ្ដាល​ក្រុង​អា​ដេ​ន​ ។ កងទ័ព​យេ​ម៉ែ​ន​ប្រកាស​ នា​ថ្ងៃ​ទី​១៥​ វិច្ឆិកា​ ពី​ការ​ដាក់​ពង្រាយ​ទ័ព​ជា​ថ្មី​ប្រឈម​មុខ​នឹង​ការ​វាយ​រុលទៅមុខ​ដ៏​លឿន​នោះ​របស់​ពួក​ហ៊ូ​ធី​ ដោយ​ប្រមូលផ្ដុំ​ទ័ព​មក​ការពារ​ក្រុង​អា​ដេ​ន​ ។

មុន​នេះ​ កងទ័ព​រដ្ឋាភិបាល​យេ​ម៉ែ​ន ប្រកាស​ពី​ការ​ដាក់​ពង្រាយ​កងទ័ព​បន្ថែម​ទៀត នៅ​ជុំវិញ​ក្រុង​អា​ដេ​ន ​ដែល​កំពុង​រង​ការ​គំរាម​កំហែង​ដោយ​ពួក​ហ៊ូ​ធី ដោយ​ដក​កម្លាំង​ចេញពី​ជុំវិញ​ច្រក​សមុទ្រ​យុទ្ធសាស្ត្រ ​BAB EL MANDEB ដើម្បី​ពង្រឹង​វត្តមាន ក្នុង​បណ្ដា​តំបន់​ដែល​កាលៈទេសៈ​បច្ចុប្បន្ន​តម្រូវ​ ។ ក្នុង​សេចក្ដី​ប្រកាស​មួយ​កងទ័ព​យេ​ម៉ែ​ន​បន្ត​ថា សេចក្ដី​សម្រេចចិត្ត​នេះ ជា​ការ​ឆ្លើយ​តប​ចំពោះ​អាទិភាព​នៃ​សេចក្ដី​ត្រូវការ​ខាង​សន្តិសុខ សម្រាប់​ក្រុង​អា​ដេ​ន រដ្ឋធានី​បណ្ដោះអាសន្ន​ក្រោយ​ពី​រដ្ឋាភិបាល​ដកថយ​រត់​ចេញពី​ក្រុង​សា​ណា​ ។

បណ្ដា​អ្នក​​ទទួលខុសត្រូវ​យោធា​យេ​ម៉ែ​ន​គូសបញ្ជាក់​ថា រដ្ឋាភិបាល​ចាប់ផ្ដើម​ដាក់​បាវ​ខ្សាច់​ និង​ជីក​លេណដ្ឋាន តាម​ច្រកចូល​នានា​នៃ​ក្រុង​អា​ដេ​ន​ប្រឈម​មុខការ​វាយ​រុលទៅមុខ​របស់​ពួក​ហ៊ូ​ធី​ ។ កិច្ច​ការពារ​ក្រុង​អា​ដេ​ន​រដ្ឋធានី​បណ្ដោះអាសន្ន​ចាប់តាំងពី​ពួក​ហ៊ូ​វាយ​កាន់កាប់​រដ្ឋធានី​សា​ណា​ពី​ឆ្នាំ​២០១៤​​ មក ធានា​ការពារ​ដោយ​កងពលតូច​មួយ​ហៅ​កងពលតូច​ពួក​យក្ស​ខាង​ត្បួ​ង ជួយ​ទ្រទ្រង់​ដោយ​អេ​មី​រ៉ាត់​អា​រ៉ាប់​រួម ហើយ​ធ្វើ​សមាហរណកម្ម​ចូល​ក្នុង​កងទ័ព​ជាតិ​យេ​ម៉ែ​ន​ ។

អាទិភាព​ពេល​នេះ​ របស់​រដ្ឋាភិបាល​យេ​ម៉ែ​ន ​គឺ​ការពារ​ក្រុង​អា​ដេ​ន​និង​បណ្ដា​ខេត្ត​នៅ​ជុំវិញ​ក្រុង​នោះ ពង្រឹង​បណ្ដា​ខ្សែបន្ទាត់​រណសិរ្ស​និង​ប្រមូលផ្ដុំ​លើ​ការ​ទប់ទល់​ចំពោះ​ការ​គំរាមកំហែង​ចំពោះ​មុខ​។ នេះ​បើ់​តាម​សេចក្ដី​ប្រកាស​មួយ​របស់​អ្នកនាំពាក្យ​កងទ័ព​យេ​ម៉ែ​ន​ ។

កងទ័ព​រដ្ឋាភិបាល​ពេល​នេះ​ ក៏​កំពុង​តែ​មានការ​លំបាក ក្នុង​ការ​ទប់ទល់​ការ​ឡោម​ព័ទ្ធ​វាយប្រហារ​របស់​ពួក​ហ៊ូ​ធី​ដណ្ដើម​យក​ទីក្រុង​ធំ​ទី​៣​របស់​យេ​ម៉ែ​ន​គឹ​ក្រុង​តា​អេស​ ។ កងកម្លាំង​បន្ថែម​ត្រូវ​បាន​បញ្ជូន​ទៅ​កាន់​ទីនោះ​។ កងកម្លាំង​ដែល​គាំទ្រ​ដោយ​អា​រ៉ា​ប៊ី​សា​អូឌីត​ និង​អេ​មី​រ៉ាត់​អា​រ៉ាប់​រួម កាលពីដើម​ខែតុលា​ប៉ុនប៉ង​វាយ​ដណ្ដើម​យក​វិញ​បណ្ដា​ដែនដី​ដែល​ពួក​ហ៊ុ​ធី​កាន់កាប់​ព្រមទាំង​រដ្ឋធានី​សា​ណា​ផង​ដែរ ក្នុង​ប្រតិបត្តិការ​មួយ​មានឈ្មោះ​ថា​AUBE DU YEMEN​ ។

ការ​វាយបក​នោះ​ពិត​ណាស់​ថា មិន​សម្រេច​គោលដៅ​ឡើយ ដោយ​ពួក​ហ៊ូ​ធី​បើក​ការ​វាយលុក​លើ​ទីក្រុង​តា​អេស និង​វាយលុក​សំដៅ​ក្រុង​អា​ដេ​ន​។ បែប​នេះ​បង្ខំ​ឲ្យ​កងទ័ព​រដ្ឋាភិបាល​គាំទ្រ​ដោយ​អា​រ៉ា​ប៊ី​សា​អូឌីត​ដកទ័ព​មក​ជួយ​ទប់ទល់ ការ​វាយ​រុលទៅមុខ​របស់​ពួក​ហ៊ូ​ធី​សំដៅ​ដណ្ដើម​យក​ក្រុង​អា​ដេ​ន​វិញ​ ។

អា​រ៉ា​ប៊ី​សា​អូឌីត​ដូរ​មេបញ្ជាការ​យោធា​ប្រចាំ​យេ​ម៉ែ​ន
អា​រ៉ា​ប៊ី​សា​អូឌីត​កាលពី​ថ្ងៃ​ទី​១៦ ​វិច្ឆិកា បាន​ដក​តំណែង​មេបញ្ជាការ​យោធា​ចម្រុះ​អា​រ៉ាប់​ជួយ​រដ្ឋាភិបាល​យេ​ម៉ែ​ន ប្រឈម​មុខជា​មួយ​ពួក​ហ៊ូ​ធី​ ។ នេះ​បើ​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន​ផ្លូវការ​អា​រ៉ា​ប៊ី​សា​អូឌីត បន្ទាប់​ពី​ការ​វាយលុក​រុលទៅមុខ
​ថ្មី​ៗ​របស់​ពួក​ហ៊ូ​ធី​នៅ​យេ​ម៉ែ​ន ​។ តាម​រាជ​ក្រិ​ត្យ​មួយ​ឧត្ដមសេនីយ​ហ្វា​ដ​បេន​ហា​ម៉ា​ដ​បេន​អាប់​ឌឺ​ឡា​ហ្ស៊ីស​​ អាល់​សាល់​ម៉ា​ន ទទួល​ការ​តែងតាំង​ថ្មី​ជាទី​ប្រឹក្សា​ក្រសួង​ការពារ​ប្រទេស ហើយ​លោក​ត្រូវ​ជំនួស​ដោយ​នាយសេនាធិការ​កងទ័ព​ឧត្ដមសេនីយ​ហ្វៃ​យ៉ា​ត​អាល់​រូ​វ៉ា​អ៉ី​​លី​។

ការ​ប្រកាស​ពី​ការ​ដោះ​ដូរ​​មេបញ្ជាការ​កងទ័ព​នេះ​កើត​មាន ពេល​ដែល​ពួក​ហ៊ូ​ធី​កំពុង​តែ​វាយ​រុលទៅមុខ​យ៉ាង​លឿន​សំដៅ​ក្រុង​អា​ដេ​ន ហើយ​កងទ័ព​រដ្ឋាភិបាល​និង​សម្ព័ន្ធមិត្ត​កំពុង​តែ​ខិតខំ​ទប់​ ៕