ADផ្ទាំងផ្សព្វផ្សាយពាណិជ្ជកម្ម

Picture

ប្រធានាធិបតី​បារាំង​ កោតសរសើរ​ព្រះមហាក្សត្រ​ និងថា«​ព្រះ​អង្គ​គឺជា​តំណាង ​នៃ​មិត្តភាព​កម្ពុជា​-​បារាំង​» បាន​ផ្សារ​ភ្ជាប់​ប្រជាជាតិ​ទាំង​ពីរ​តាំងពី​ដើម​ដំបូ​ង និង​នៅ​គ្រប់​ដំណាក់កាល​លំបាក

3 ថ្ងៃ មុន

រាជធានី​ភ្នំពេញ ​៖ ឯកឧត្តម អេ​ម៉ា​នុយ​អែ​ល ម៉ា​ក្រុង (Emmanuel Macron) ប្រធានាធិបតី​ នៃ​សាធារណរដ្ឋ​បារាំង ក្រៅពី​សម្តែង​ នូវ​ការ​កោតសរសើរ​យ៉ាង​ជ្រាលជ្រៅ​ចំពោះ​ព្រះរាជ​បន្ទូល និង​ភាសា​បារាំង​ដ៏​ល្អ​ឥត​ខ្ចោះ​របស់ ព្រះ​ករុ​ណា ព្រះបាទ​សម្តេច ព្រះ​បរមនាថ ន​រោ​ត្តម សីហ​មុនី ព្រះមហាក្សត្រ​កម្ពុជា ព្រមទាំង​បាន​ចាត់​ទុក​ព្រះករុណា ព្រះមហាក្សត្រ ថា «​ព្រះ​អង្គ ​គឺជា​តំណាង​ នៃ​មិត្តភាព​កម្ពុជា​-​បារាំង​» ដែល​បាន​ផ្សារ​ភ្ជាប់​ប្រជាជាតិ​ទាំង​ពីរ​តាំងពី​ដើមដំបូង និង​នៅ​គ្រប់​ដំណាក់កាល​លំបាក​ ។

ការ​កោតសរសើរ និង​ការ​គូសបញ្ជាក់​ដ៏​មាន​អត្ថន័យ​ជ្រាលជ្រៅ​របស់​ប្រ​ធានា​ធិបតី​បារាំង​នេះ ត្រូវ​បាន​ធ្វើ​ឡើង​នៅ​ក្នុង​សុន្ទរកថា​របស់​លោក​ប្រធានាធិបតី នា​ឱកាស​អញ្ជើញ​ចូលរួម​ជា​អធិបតី​ជាមួយ ព្រះករុណា ព្រះមហាក្សត្រ ក្នុង​ព្រះរាជ​ពិធី​បិទ​បញ្ចប់​ការដ្ឋាន​ជួសជុល និង​សម្ពោធ​ប្រាសាទមេបុណ្យខាងលិច នៅ​ខេត្តសៀមរាប នា​រសៀល​ថ្ងៃ​ទី​១៦ ខែវិច្ឆិកា ឆ្នាំ​២០២៦​ ។

ថ្លែង​ក្នុង​ពិធី ឯកឧត្តម អេ​ម៉ា​នុយ​អែ​ល ម៉ា​ក្រុង បាន​លើក​ឡើង​ពី​មនោ​សញ្ចេ​ត​នា​ដ៏​ជ្រាលជ្រៅ​ចំពោះ​ព្រះករុណា ព្រះមហាក្សត្រ យ៉ាង​ដូច្នេះ​ថា​ ៖ «​ខ្ញុំ​សូម​ជម្រាប​ថា មនោសញ្ចេតនា​ ដែល​យើង​មាន​ក្នុង​ការ​ចែករំលែក​ពេលវេលា​នេះ​ជាមួយ​ព្រះ​អង្គ និង​ប្រជារាស្ត្រ​ព្រះ​អង្គ ត្រូវ​បាន​កើនឡើង​ទ្វេ​ដងដោយ​សារ​ព្រះរាជ​បន្ទូល ​ដែល​ព្រះ​អង្គ​ទើបនឹង​មាន ទាំង​ពាក្យពេចន៍ ​ដែល​ព្រះ​អង្គ​បាន​ជ្រើសរើស និង​ភាសា​បារាំង​ដ៏​ល្អ​ឥត​ខ្ចោះ ដូច​សព្វមួយដង​។ ព្រះ​អង្គ​តែ​មួយ​អង្គ​ឯង ​គឺជា​តំណាង​ នៃ​មិត្តភាព​នេះ​»​ ។

ប្រធានាធិបតី​បារាំង បាន​រំលេច​បន្ថែម​ថា ព្រះករុណា ព្រះមហាក្សត្រ ដែល​ជា​សមាជិក​បណ្ឌិតសភា​បារាំង​ផង​ដែរ ព្រះ​អង្គ​ផ្ទាល់​តែងតែមាន​ព្រះរាជ​បន្ទូល​អំពី «​មិត្តភាព​ នៃ​បេះដូង និង​ហេតុផល​» រវាង​ប្រទេស​ទាំង​ពីរ ​។

ប្រធានាធិបតី​បារាំង​ ក៏បាន​គូសបញ្ជាក់​ថា បារាំង​មាន​មោទនភាព​ ដែល​បាន​ចូលរួម​តាម​រយៈ​ការងារ​រួម​គ្នា និង​ការ​ជឿ​ទុកចិត្ត​របស់​ព្រះករុណា ព្រះមហាក្សត្រ ជួយ​ឱ្យ​ទីកន្លែង​ប្រវត្តិសាស្ត្រ​ដូច​ជា​ប្រាសាទមេបុណ្យខាងលិច​រស់​ឡើង​វិញ និង​បាន​បន្ថែម​តម្លៃ​មិន​អាច​កាត់ថ្លៃ​បាន ទៅ​នឹង​កម្លាំង​ខាង​វិញ្ញាណ ​ដែល​រស់នៅ​ក្នុង​ទឹកដី​កម្ពុជា ​។

ឯកឧត្តម​ប្រធានាធិបតី ​បាន​គូសបញ្ជាក់​ទៀត​ថា​៖ «​អ្វីមួយ ​ដែល​មិន​អាច​កាត់ថ្លៃ​បាន​នេះ គឺជា​អ្វី​ ដែល​បាន​ភ្ជាប់​យើង​តាំងពី​ដើមដំបូង​ នៃ​ព្រះរាជាណាចក្រ​កម្ពុជា អ្វី​ដែល​បាន​ភ្ជាប់​យើង​នៅ​គ្រប់​ដំណាក់កាល​លំបាក ហើយ​អ្វី​ ដែល​នឹង​បន្ត​ភ្ជាប់​យើង​។ សូម​ឱ្យ​មិត្តភាព​រវាង​កម្ពុជា និង​បារាំង ស្ថិតស្ថេរ​យូរអង្វែង​» ​។

សូម​ជម្រាប​ជូន​ថា ព្រះរាជ​ពិធី​បិទ​បញ្ចប់​ការដ្ឋាន​ជួសជុល និង​សម្ពោធ​ប្រាសាទមេបុណ្យខាងលិច ក្រោម​ព្រះ​រាជាធិបតី​ភាព ព្រះករុណា សម្តេច​ព្រះបាទ​នរោត្តម សីហ​មុនី ព្រះមហាក្សត្រ​កម្ពុជា និង​ឯកឧត្តម​ប្រធានាធិបតី​បារាំង អេ​ម៉ា​នុយ​អែ​ល ម៉ា​ក្រុង ព្រមទាំង​លោក​ជំទាវ​ទី​មួយ ប្រ៊ី​ហ្ស៊ី​ត ម៉ា​ក្រុង (Brigitte Macron) នា​រសៀល​ថ្ងៃ​ទី​១៦ ខែវិច្ឆិកា ឆ្នាំ​២០២៦នេះ គឺជា​ព្រឹត្តិការណ៍​ដ៏​មាន​អត្ថន័យ​ជា​ប្រវត្តិសាស្ត្រ ដែល​ឆ្លុះ​បញ្ចាំង​ពី​ចំណងមិត្តភាព​ដ៏​រឹង​មាំ និង​កិច្ច​សហប្រតិបត្តិការ​ដ៏​ជិត​ស្និទ្ធ​រវាង​កម្ពុជា និង​បារាំង ក្នុង​ការ​អភិរក្ស និង​លើក តម្កើង​បេតិកភណ្ឌ​វប្បធម៌​មនុស្សជាតិ​ ៕