ADផ្ទាំងផ្សព្វផ្សាយពាណិជ្ជកម្ម

Picture

សោកនាដកម្ម! ឆេះ​ផ្ទះ ៤​ខ្នង ឆ.ក់យកជីវិត ៣នាក់ នៅជិតផ្សារតារាសំណាង ក្រុងព្រះ​សីហនុ

4 ម៉ោង មុន
  • ព្រះសីហនុ

ខេត្ត​ព្រះ​សីហ​នុ​៖ ករណី​អគ្គិភ័យ​មួយ​បាន​ឆាបឆេះ​ផ្ទះ​ប្រជាពលរដ្ឋ​ចំនួន ៤​ខ្នង នៅ​វេលា​ម៉ោង ១០និង​៥០​នាទី យប់​ថ្ងៃ​ទី​១៥ ខែវិច្ឆិកា ឆ្នាំ​២០២៦ នៅ​ចំណុច​ជិត​ផ្សារ​តារា​សំណាង (​ឃ្លាំង​លើ​) ស្ថិត​ក្នុង​ក្រុម​ទី​៦ ភូមិ​៣ សង្កាត់​លេខ​១ ក្រុងព្រះសីហនុ ខេត្ត​ព្រះ​សីហ​នុ​។

តាម​ព័ត៌មាន​ពី​ប្រភព​សមត្ថកិច្ច​បានឱ្យ​ដឹង​ថា ផ្ទះ​ដែល​រង​ការ​ឆាបឆេះ​ទាំង ៤​ខ្នង មាន​សំណង់​ផ្នែក​ខាងក្រោម​ធ្វើ​ពី​ថ្ម ផ្នែក​ខាងលើ​ធ្វើ​ពី​ឈើ និង​ដំបូល​ប្រក់​ស័ង្កសី ព្រមទាំង​ហ្វី​ប្រូ​ស៊ីម៉ង់ត៍​។

លោក​ឧត្តមសេនីយ៍ត្រី ហេង ប៊ុ​នទី មេបញ្ជាការ​កងរាជអាវុធហត្ថ​ខេត្ត​ព្រះ​សីហ​នុ បាន​ដឹកនាំ​កម្លាំង​ជំនាញ​នៃ​កងរាជអាវុធហត្ថ​ខេត្ត និង​កម្លាំង​មូលដ្ឋាន​កងរាជអាវុធហត្ថ​ ក្រុងព្រះសីហនុ ចុះ​អន្តរាគមន៍​ជួយ​សង្គ្រោះ​ភ្លាម​ៗ ដោយ​មានការ​សហការ​ពី​អាជ្ញាធរ​មូលដ្ឋាន និង​កងកម្លាំង​មាន​សមត្ថកិច្ច​ចម្រុះ​ពាក់ព័ន្ធ​ក្នុង​ខេត្ត​។

ក្នុង​ប្រតិបត្តិការ​នេះ កម្លាំង​សមត្ថកិច្ច​បាន​ប្រើប្រាស់​រថយន្ត​ពន្លត់​អគ្គិភ័យ​សរុប​ចំនួន ៨​គ្រឿង និង​ប្រើប្រាស់​ទឹក​អស់​ចំនួន ២០​រថយន្ត ទើប​អាច​គ្រប់គ្រង​ស្ថានការណ៍ និង​ពន្លត់​អគ្គិភ័យ​បាន​ទាំងស្រុង​។ ប្រតិបត្តិការ​បាន​បញ្ចប់​នៅ​វេលា​ម៉ោង ១២និង៦០​នាទី រំលង​អធ្រាត្រ ឈាន​ចូល​ថ្ងៃ​ទី​១៦ ខែវិច្ឆិកា ឆ្នាំ​២០២៦​។

ហេតុការណ៍​គ្រោះ​អគ្គិភ័យ​ដ៏​រន្ធត់ខាងលើ​​នេះ បាន​បណ្តាល​ឱ្យ​មនុស្ស​ចំនួន ៣​នាក់​ស្លាប់​បាត់បង់​ជីវិត ក្នុង​នោះ​មាន​ក្មេង​ប្រុស​ម្នាក់​អាយុ​ប្រហែល ១​ខួប ក្មេង​ស្រី​ម្នាក់​អាយុ​ប្រហែល ៦​ឆ្នាំ និង​ស្ត្រី​ម្នាក់​ដែល​ត្រូវ​បាន​រាយការណ៍​ថា​ជា​ម្តាយ​របស់​កុមារ​ទាំង​ពីរ​។

ចំពោះ​មូលហេតុ​ដែល​បង្ក​ឱ្យ​មាន​គ្រោះ​អគ្គិភ័យ​នេះ នៅ​មិន​ទាន់​ត្រូវ​បាន​កំណត់​ច្បាស់លាស់​នៅឡើយ​ទេ ខណៈ​សមត្ថកិច្ច​ជំនាញ​កំពុង​បន្ត​ការ​ស្រាវជ្រាវ ដើម្បី​ស្វែងរក​មូលហេតុ​ពិតប្រាកដ​ ៕​