ADផ្ទាំងផ្សព្វផ្សាយពាណិជ្ជកម្ម

Picture

ពួកហ៊ូធីវាយលុកចូលដល់ចម្ងាយ៦០គីឡូម៉ែត្រពីក្រុងអាដេន រដ្ឋធានីបណ្តោះអាសន្នយេម៉ែន

1 ម៉ោង មុន

ប្រទេស​យេ​ម៉ែ​ន ៖ ពួក​ឧទ្ទាម​ហ៊ូ​ធី​យេ​ម៉ែ​ន​ ពេល​នេះ​បាន​វាយលុក​ចូល​ដល់​កៀក​មាត់ទ្វារ​ក្រុង​អា​ដេ​ន ​រដ្ឋធានី​បណ្ដោះអាសន្ន របស់​រដ្ឋាភិបាល​ ទទួលស្គាល់​ដោយ​អន្តរជាតិ​ហើយ​ ។ ពួក​យុទ្ធ​ជន​ស្និទ្ធិអ៉ី​​រ៉​ង់​នោះ​ឥឡូវ​ស្ថិត​នៅ​ចម្ងាយ​ត្រឹមតែ​៦០​គីឡូម៉ែត្រ​ទៀត​ប៉ុណ្ណោះ​​ពី​រដ្ឋធានី​អតីត​យេ​ម៉ែ​ន​ខាងត្បូង​នោះ​ ។ ពួក​ហ៊ូ​ធី​វាយលុក​ចូល​ដល់​ខេត្ត​LAHL ភាគ​ខាងត្បូង​យេ​ម៉ែ​ន​។ នេះ​ជា​ការ​លើក​ឡើង​​កាលពី​ថ្ងៃ​ទី​១៥ ​វិច្ឆិកា​ របស់​ប្រភព​យោធា​ និង​រដ្ឋាភិបាល​ ។

ប្រភព​យោធា​៤​​ក្នុង​ផ្ទៃ​កងទ័ព​រដ្ឋាភិបាល​ និង​ប្រភព​រដ្ឋាភិបាល​២ រៀបរាប់​ពី​ការ​វាយ​ដណ្ដើម​ត្រួតត្រា​របស់​ពួក​ហ៊ូ​ធី ស្រុក​អាល់​ម៉ា​ដា​រី​បា​ហ៍​ និង​ការ​រុលទៅមុខ​របស់​ពួក​គេ​រយៈពេល​៣​ថ្ងៃ​ចុង​ក្រោយ​នេះ​ សំដៅ​ក្រុង​អា​ដេ​ន​។ ពួក​ហ៊ូ​ធី​ពេល​នេះ​ ស្ថិត​នៅ​ក្នុង​ជំរំ​ទ័ព​អា​ខា​រ៉ា​ស​ខេត្ត​អាល់​ម៉ា​ដា​រី​បា​ហ៍ ចម្ងាយ​៦០​គីឡូម៉ែត្រ​ពី​កណ្ដាល​ក្រុង​អា​ដេ​ន ដែល​កងទ័ព​យេ​ម៉ែ​ន​ប្រកាស ​នា​ថ្ងៃ​ទី​១៥​វិច្ឆិកា​ពី​ការ​ដាក់​ពង្រាយ​ទ័ព​ជា​ថ្មី​ប្រឈម​មុខ​នឹង​ការ​វាយ​រុលទៅមុខ​ដ៏​លឿន​នោះ​របស់​ពួក​ហ៊ូ​ធី​ ។

មុន​នេះ ​កងទ័ព​រដ្ឋាភិបាល​យេ​ម៉ែ​ន​ប្រកាស​ពី​ការ​ដាក់​ពង្រាយ​កងទ័ព​បន្ថែម​ទៀត នៅ​ជុំវិញ​ក្រុង​អា​ដេ​ន​ដែល​កំពុង​រង​ការ​គំរាម​កំហែង​ដោយ​ពួក​ហ៊ូ​ធី ដោយ​ដក​កម្លាំង​ចេញពី​ជុំវិញ​ច្រក​សមុទ្រ​យុទ្ធសាស្ត្រ​BAB EL MANDEB ដើម្បី​ពង្រឹង​វត្តមាន​របស់​ខ្លួន​ក្នុង​បណ្ដា​តំបន់​ដែល​កាលៈទេសៈ​បច្ចុប្បន្ន​តម្រូវ ​។

ក្នុង​សេចក្ដី​ប្រកាស​មួយ​កងទ័ព​យេ​ម៉ែ​ន​បន្ត​ថា សេចក្ដី​សម្រេចចិត្ត​នេះ ជា​ការ​ឆ្លើយ​តប​ចំពោះ​អាទិភាព​នៃ​សេចក្ដី​ត្រូវការ​ខាង​សន្តិ​សុខ​សម្រាប់​ក្រុង​អា​ដេ​ន រដ្ឋធានី​បណ្ដោះអាសន្ន​ក្រោយ​ពី​រដ្ឋាភិបាល​ដកថយ ចេញពី​រដ្ឋធានី​សា​ណា​ដែល​ពួក​ហ៊ូ​ធី​ដណ្ដើម​កាន់កាប់​កាលពី​ឆ្នាំ​២០១៤ និង​ដក​ចេញពី​បណ្ដា​ខេត្ត​ជិតខាង​ក្រុង​នោះ ​។

ការ​វាយប្រហារ​ដោយ​មីស៊ី​ល​របស់​ពួក​ហ៊ូ​ធី ប្រឆាំង​ទីតាំង​មួយ​របស់​កងទ័ព​រដ្ឋាភិបាល បណ្ដាល​ឲ្យ​ជន​ស៊ី​​វិល​ស្លាប់​៨​នាក់​ និង​របួស​១២​នាក់ កាលពី​ថ្ងៃ​ទី​១៥ ​វិច្ឆិកា​ ។ បណ្ដា​អ្នក​​ទទួលខុសត្រូវ​យោធា​យេ​ម៉ែ​ន​គូសបញ្ជាក់​ថា រដ្ឋាភិបាល​ចាប់ផ្ដើម​ដាក់​បាវ​ខ្សាច់​និង​ជីក​លេណដ្ឋាន តាម​ច្រកចូល​នានា​នៃ​ក្រុង​អា​ដេ​ន​ប្រឈម​មុខការ​វាយ​រុលទៅមុខ​របស់​ពួក​ហ៊ូ​ធី​ ៕