ទីក្រុងយេរូសាឡឹម៖ ថ្មីៗនេះ យោធាអុីស្រាអែលសម្លាប់មេបញ្ជាការជាន់ខ្ពស់ម្នាក់របស់ក្រុមហាម៉ាស់ដែលចូលរួមរៀបចំផែនការវាយប្រហារកាលពីថ្ងៃទី៧ ខែតុលា ឆ្នាំ២០២៣។ គិតទៅ មេបញ្ជាការរូបនេះទើបតែឡើងកាន់តំណែងបាន២ខែប៉ុណ្ណោះបន្ទាប់ពីមេបញ្ជាការជំនាន់មុនគាត់ត្រូវអុីស្រាអែលធ្វើឃាត។ វាជាសញ្ញាបង្ហាញថាជម្លោះនៅតំបន់ហ្កាហ្សានៅតែក្ដៅងំជានិច្ចទោះបីអាមេរិកខិតខំសម្របសម្រួលឱ្យមានបទឈប់បាញ់យ៉ាងណាក្ដី។

ទាំងក្រុមហាម៉ាស់ និងអុីស្រាអែលសុទ្ធតែអះអាងថាដូចៗគ្នាថាយោធាអុីស្រាអែលបានធ្វើឃាតលោកសាមៀ ម៉ាមូត អាប៊ូ យូនីស (Samir Mahmoud Abu Younis) ពិតមែន។ គាត់ជាមេបញ្ជាការប្រចាំតំបន់ប្រតិបត្តិការសឹករ៉ាហ្វា (Rafah)។ លោកអាប៊ូ យុននីសដែលជាសមាជិកដ៏យូរអង្វែងនៃកងប្រតិបត្តិការសឹកខាងលើនេះឡើងមកជំនួសលោកណាអែល អាប៊ូ អូបេត (Nael Abu Obeid) ជាមេបញ្ជាការរបស់ហាម៉ាស់ និងដែលត្រូវយោធាអុីស្រាអែលបាញ់សម្លាប់កាលពីខែកញ្ញា ឆ្នាំ២០២៦ ។ អាប៊ូ អូបេតឡើងមកជំនួសតំណែងលោកមហាម៉ាត់ សាបាណេ (Mohammad Sabaneh) ដែលត្រូវអុីស្រាអែលបាញ់សម្លាប់កាលពីខែឧសភា ឆ្នាំ២០២៥។

គិតទៅ ពួកគេឡើងមកកាន់តំណែងនេះមិនយូរប៉ុន្មានទេ ត្រូវស្លាប់ជាបន្តបន្ទាប់។ ការវាយប្រហារនេះកើតឡើងត្រឹមតែប៉ុន្មានថ្ងៃប៉ុណ្ណោះបន្ទាប់ពីយោធាអុីស្រាអែលទើបតែវាយប្រហារមន្ទីរពេទ្យណាស៊ែ (Nasser) នៅទីក្រុងខាន់យុននីស។ អុីស្រាអែលអះអាងថាការវាយប្រហារនោះជាការប៉ុនប៉ងសម្លាប់មេបញ្ជាការម្នាក់របស់ក្រុមហាម៉ាស់។ ក្រុមអាល់កាសាម (Al-Qassam) ដែលជាសាខារបស់ក្រុមហាម៉ាស់បានចេញសេចក្ដីប្រកាសថាលោកអាប៊ូ យុននីស ពិតជាបានស្លាប់ហើយ។ គាត់ចូលរួមនៅក្នុងកងប្រតិបត្តិការសឹកខាងលើនេះកាលពីឆ្នាំ១៩៩១ និងជាមេបញ្ជាការដ៏លេចធ្លោម្នាក់ដែលចូលរួមនៅក្នុងការរៀបចំ និងអនុវត្តផែនការវាយប្រហារអុីស្រាអែលកាលពីខែតុលា ឆ្នាំ២០២៣។

រដ្ឋមន្ត្រីការពារជាតិអុីស្រាអែល លោកអុីស្រាអែល កាត់ (Israel Katz) ថ្លែងថាយោធារបស់លោកនឹងបន្តបោសសម្អាតមេធំៗរបស់ហាម៉ាស់នៅហ្កាហ្សាឱ្យដល់ឫសគល់។ មេបញ្ជាការណាឡើងមកបន្តតំណែងពីអ្នកចាស់ យើងនឹងកម្ចាត់ជាបន្តបន្ទាប់។ គោលនយោបាយតាមកម្ចាត់មេហាម៉ាស់ដែលរ៉ាប់រងអនុវត្តដោយលោក ក្រោមកិច្ចសហការពីនាយករដ្ឋមន្ត្រីណឺតាន់យ៉ាហ៊ូ និងយោធាអុីស្រាអែលនឹងបន្តធ្វើដូចភ្លៀងរលឹម។ ពោលគឺធ្វើរហូតដល់តំបន់ហ្កាហ្សាក្លាយជាទីតាំងគ្មានកងទ័ព និងគ្មានក្រុមហាម៉ាស់តទៅទៀត៕ ប្រភព៖ CNN

ចែករំលែកព័តមាននេះ