ចាត់វិធានការរដ្ឋបាលលើទីតាំងមិនទាន់រុះរើសំណង់ និងសម្ភារលក់ដូរតាមបណ្តោយផ្លូវលេខ៦១ ក្រោយផុតកំណត់សេចក្តីជូនដំណឹង
- ស្ទឹងត្រែង
ខេត្តស្ទឹងត្រែង៖ រដ្ឋបាលក្រុងបានប្រកាសពីការត្រៀមចាត់វិធានការរដ្ឋបាលចំពោះទីតាំងមួយចំនួនដែលមិនទាន់អនុវត្តតាមសេចក្តីជូនដំណឹងឱ្យរុះរើដោយស្ម័គ្រចិត្ត នៅតាមបណ្តោយកំណាត់ផ្លូវលេខ៦១ តភ្ជាប់ពីផ្លូវលេខ២៨ ទៅផ្លូវលេខ១៤ ខណៈដែលរយៈពេលកំណត់ចំនួន១៥ថ្ងៃ នឹងត្រូវបញ្ចប់នៅថ្ងៃទី១៥ ខែវិច្ឆិកា ឆ្នាំ២០២៦។
តាមការបញ្ជាក់របស់លោក លី មីណា អភិបាលក្រុង ប្រជាពលរដ្ឋភាគច្រើនបានចូលរួមសហការ និងអនុវត្តតាមការណែនាំដោយស្ម័គ្រចិត្ត ក្នុងស្មារតីទទួលខុសត្រូវ និងចូលរួមចំណែកក្នុងការរៀបចំសណ្តាប់ធ្នាប់សាធារណៈឱ្យកាន់តែមានរបៀបរៀបរយ។ទោះជាយ៉ាងណា ក៏នៅមានប្រជាពលរដ្ឋមួយចំនួនតូចកំពុងបន្តរុះរើសំណង់ រោង ឬតូប និងរៀបចំសម្ភារសម្រាប់ប្រកបអាជីវកម្មមិនទាន់បានរៀបរយនៅឡើយ។
រដ្ឋបាលក្រុងបានគូសបញ្ជាក់ថា សេចក្តីជូនដំណឹងដែលបានចេញផ្សាយ គឺជាលិខិតរដ្ឋបាលផ្លូវការដែលមានសុពលភាពសម្រាប់ការអនុវត្ត មិនមែនជាការណែនាំដែលបុគ្គលណាម្នាក់អាចជ្រើសរើសអនុវត្ត ឬមិនអនុវត្តតាមចិត្តនោះឡើយ។ ដូច្នេះ ប្រជាពលរដ្ឋទាំងអស់ត្រូវចូលរួមអនុវត្តឱ្យបានស្មើភាពគ្នា ដើម្បីធានាបាននូវសណ្តាប់ធ្នាប់ និងសោភ័ណភាពទីក្រុង។
ជាវិធានការបន្ត នៅថ្ងៃទី១៦ ខែវិច្ឆិកា ឆ្នាំ២០២៦ ក្រុមការងារចម្រុះរបស់រដ្ឋបាលក្រុង នឹងចុះត្រួតពិនិត្យជាថ្មីតាមបណ្តោយកំណាត់ផ្លូវលេខ៦១ ដើម្បីផ្ទៀងផ្ទាត់លទ្ធផលនៃការអនុវត្តតាមការណែនាំ ព្រមទាំងពិនិត្យទីតាំងដែលនៅមិនទាន់បានរុះរើ។ ក្នុងដំណាក់កាលនេះ ក្រុមការងារនឹងបន្តណែនាំ និងផ្តល់ឱកាសចុងក្រោយដល់ម្ចាស់ទីតាំងពាក់ព័ន្ធ ដើម្បីអនុវត្តការរុះរើដោយខ្លួនឯង។
ទោះជាយ៉ាងណា រដ្ឋបាលក្រុងបានព្រមានថា ក្រោយផុតកំណត់ពេលវេលាដែលបានជូនដំណឹង ប្រសិនបើនៅតែមានទីតាំងណាមិនព្រមអនុវត្តតាមការណែនាំ អាជ្ញាធរក្រុងនឹងសហការជាមួយកម្លាំងមានសមត្ថកិច្ច ចាត់វិធានការរដ្ឋបាលដោយចុះអនុវត្តការរុះរើនៅទីតាំងជាក់ស្តែង តាមនីតិវិធីជាធរមាន។
ជាចុងក្រោយ លោកអភិបាលក្រុងបានបញ្ជាក់ពីគោលការណ៍អនុវត្តការងារដោយប្រើប្រាស់ស្តង់ដារតែមួយចំពោះប្រជាពលរដ្ឋទាំងអស់ ដោយមិនអនុញ្ញាតឱ្យមានការអនុវត្តខុសគ្នា ឬលើកលែងចំពោះបុគ្គលណាម្នាក់ឡើយ។ អាជ្ញាធរបានអំពាវនាវឱ្យប្រជាពលរដ្ឋដែលពាក់ព័ន្ធបន្តសហការ និងអនុវត្តតាមសេចក្តីណែនាំឱ្យបានទាន់ពេលវេលា ដើម្បីជៀសវាងវិធានការរដ្ឋបាល និងរួមចំណែកក្នុងការរៀបចំសណ្តាប់ធ្នាប់សាធារណៈឱ្យកាន់តែល្អប្រសើរ៕







ចែករំលែកព័តមាននេះ