ទីក្រុងវ៉ាស៊ីនតោន៖ ប្រទេសអាមេរិកនៅតែជួបប្រទះនឹងបញ្ហារអាក់រអួលក្នុងការធ្វើដំណើរតាមជើងអាកាសដដែលទោះបីបញ្ហានេះបានកើតឡើងរយៈពេលបីថ្ងៃមកហើយក្ដី។ បញ្ហាដោយសារប្រព័ន្ធទំនាក់ទំនងចាស់ហួសសម័យដែលបំពាក់នៅតាមអាកាសយានដ្ឋាននានា ដូច្នេះធ្វើឱ្យពិបាកនៅក្នុងប្រតិបត្តិការធ្វើដំណើរចេញចូលរបស់យន្តហោះ។ កាលពីថ្ងៃអាទិត្យ យន្តហោះជាងមួយម៉ឺនខ្សែត្រូវអាក់ខានការហោះហើររបស់ខ្លួន។

ទោះជាយ៉ាងណាក្ដី រដ្ឋមន្ត្រីក្រសួងដឹកជញ្ជូន លោកសង់ ដាហ្វ៊ី (Sean Dauffy) ព្យាករថានៅថ្ងៃចន្ទនេះអ្វីៗនឹងវិលត្រឡប់ទៅរកសភាពប្រក្រតីឡើងវិញ។ លោកនៅតែអះអាងដូច្នេះទោះបីក្រុមហ៊ុនអាកាសចរណ៍នានានៅតែមិនទាន់រៀបចំឱ្យបានប្រសើរឡើងវិញដើម្បីរៀបចំកាលបរិច្ឆេទហោះហើររបស់ខ្លួន។ កាលពីថ្ងៃអាទិត្យ ជើងហោះហើរក្នុងស្រុកជាង២៣០០ខ្សែ និងជើងហោះហើរអន្តរជាតិ៧៧០០ខ្សែត្រូវពន្យារពេល។ នេះបើយោងតាមគេហទំព័រ FlightAware ដែលតាមដានការហោះហើរ។

កាលពីថ្ងៃសៅរ៍ ជើងហោះហើរជាង៦៤០០ខ្សែត្រូវបានលុបចោល និងជើងហោះហើរជាង៨ពាន់ខ្សែត្រូវពន្យារពេល។ លោកដាហ្វ៊ីថ្លែងថាមិនមានភស្តុតាងបង្ហាញថាបញ្ហារអាក់រអួលលើកនេះបង្កឡើងដោយការវាយប្រហារតាមប្រព័ន្ធព័ត៌មានវិទ្យា ឬដោយចេតនាទុច្ចរិតណាមួយនោះឡើយ។ ទោះជាយ៉ាងណាក្ដី គេមិនទាន់ដឹងមូលហេតុពិតប្រាកដនៅឡើយទេ។ ពីថ្ងៃសុក្រ គណៈកម្មការអាកាសចរណ៍ជាតិ (FAA) បានចេញសេចក្ដីប្រកាសឱ្យបញ្ឈប់ការហោះហើរទូទាំងប្រទេសកាល ដែលមានន័យស្មើនឹងការបិទដែនអាកាសអស់រយៈពេលជិត៥ម៉ោង។

នេះជាការបិទដែនអាកាសដ៏យូរបំផុតចាប់តាំងពីក្រោយព្រឹត្តិការណ៍វាយប្រហារភេរវកម្មកាលពីថ្ងៃទី១១ ខែកញ្ញា ឆ្នាំ២០០១។ លោកដាហ្វ៊ីថ្លែងថាប្រព័ន្ធបញ្ជាការទំនាក់ទំនងដែលបំពាក់នៅតាមអាកាសយានដ្ឋាននានាបានដាក់ឱ្យប្រើប្រាស់តាំងពីឆ្នាំ២០០១ ដូច្នេះវាចាស់ហួសសម័យទៅហើយ។ ចាប់តាំងពីថ្ងៃសុក្រសប្ដាហ៍មុន លោកបានស្នើសុំឱ្យសភាអនុម័តថវិកា៥០ពាន់លានដុល្លារដើម្បីធ្វើទំនើបកម្មប្រព័ន្ធគ្រប់គ្រងការហោះហើរ៕ ប្រភព៖ Reuters

ចែករំលែកព័តមាននេះ