ទីក្រុងបាងកក៖ ប្រទេសថៃជួបប្រទះនឹងសោកនាដកម្មភ្លើងឆេះដ៏សន្ធោសន្ធៅបណ្ដាលឱ្យស្លាប់មនុស្សយ៉ាងតិច១១នាក់ និងរបួស៣៦នាក់។ ហេតុការណ៍នេះកើតឡើងនៅហាងជួលម៉ូតូ និងលក់ឥវ៉ាន់នៅខេត្តភូកេតកាលពីពេលរំលងអធ្រាត្រឈានចូលព្រឹកថ្ងៃចន្ទនេះ។ អ្នកស្លាប់ភាគច្រើនត្រូវគេជឿជាក់ថាដោយសារឈ្លក់ផ្សែង។ គេបានបញ្ជូនអ្នករបួសទាំង៣៦នាក់ទៅមន្ទីរពេទ្យជាបន្ទាន់។ គេទទួលរបាយកាណ៍ថាមានភ្លើងឆេះនៅវេលាម៉ោង៣:១៥ និង៣:២០ទៀបភ្លឺនៅសង្កាត់ជំនួញមួយកន្លែង។

មិនយូរប៉ុន្មាន ភ្លើងក៏ចាប់ផ្ដើមឆាបឆេះយ៉ាងឆាប់រហ័ស មុននឹងឆ្លងទៅអគារជិតៗនោះ។ លទ្ធផលស៊ើបអង្កេតបឋមបង្ហាញថាផ្ទះអាជីវកម្ម៥ល្វែងបានរងការខូចខាត ខណៈដែលហាងជួលម៉ូតូជាច្រើនកន្លែងនៅក្បែរនោះក៏រងការខូចខាតផងដែរ។ ចៅហ្វាយរងក្រុងផាថង (Patong) លោកសាណាខន គីស៊ីន (Sanakorn Keesin) ថ្លែងថាម៉ូតូជាងមួយរយគ្រឿងចតនៅជាន់ផ្ទាល់ដីនៃអគារដែលឆេះ។ ចំណែកជាន់ខាងលើប្រើជាកន្លែងស្នាក់នៅ។ អ្វីដែលជួយឱ្យអគ្គិភ័យនេះឆាបឆេះយ៉ាងឆាប់រហ័ស និងកាន់តែខ្លាំងឡើងៗគឺសាំង, សម្បកកង់កៅស៊ូ និងសារធាតុផ្លាស្ទិចដែលនៅជាប់នឹងម៉ូតូ ដែលជាហេតុបង្កឱ្យមានផ្សែងខ្មៅងងឹតក្រាស់ឃ្មឹកហ៊ុមព័ទ្ធអគារដែលឆេះ។

នៅពេលភ្លើងបន្តឆាបឆេះកាន់តែខ្លាំង អ្នករស់នៅក្នុងអគារជាន់ខាងលើក៏ប្រញាប់ចុះមកជាន់ផ្ទាល់ដីជាបន្ទាន់។ ប៉ុន្តែដោយសារផ្សែងហ៊ុមព័ទ្ធយ៉ាងក្រាស់ឃ្មឹកធ្វើឱ្យការជម្លៀសខ្លួនពិបាកបំផុត។ យោងតាមលោកសាណាខន ជនរងគ្រោះម្នាក់ត្រូវគេប្រទះឃើញដេកស្លាប់នៅជាន់ទីបី ចំណែកដប់នាក់ទៀតដេកស្លាប់នៅជាន់ទីប្រាំ។ ទីភ្នាក់ងារសង្គ្រោះបន្ទាន់ដើរចូលទៅក្នុងអគារដើម្បីជួយសង្គ្រោះអ្នកដែលជាប់ផុងនៅក្នុងនោះ ហើយបានជម្លៀសអ្នកដែលនៅរស់រានមានជីវិតទៅរកទីកន្លែងសុវត្ថិភាព។

សាក្សីម្នាក់ប្រាប់ថាខ្លួនកំពុងនិយាយទូរស័ព្ទនៅក្នុងអគារសុខៗស្រាប់តែឮសំឡេងមនុស្សស្រែកប្រាប់ថាមានភ្លើងឆេះហើយៗ។ ដោយសារមិនដឹងថាភ្លើងចាប់ផ្ដើមឆេះពីកន្លែងណា ខ្លួនក៏ប្រញាប់ដើរចុះយ៉ាងលឿនមកជាន់ក្រោម។ ពេលនោះ ផ្សែងចាប់ផ្ដើមហុយទ្រលោមពាសពេញអគារបាត់ទៅហើយ។ ភ្នាក់ងារអគ្គិភ័យទទួលការហៅទូរស័ព្ទដើម្បីធ្វើអន្តរាគមន៍បន្ទាន់ ហើយពួកគេក៏ប្រញាប់នាំកម្លាំងចុះទៅកន្លែងកើតហេតុ។ រថយន្តគិលានសង្គ្រោះជាច្រើនគ្រឿងក៏ចុះទៅកន្លែងកើតហេតុផងដែរ។ លោកសាណាខនប្រាប់ថាទោះបីមានភ្លៀងធ្លាក់សស្រិចយ៉ាងណាក្ដី ក្រុមអ្នកជួយសង្គ្រោះបានធ្វើដំណើរទៅដល់ទីនោះប្រហែល៥នាទីក្រោយពេលទទួលដំណឹង។

ការបាញ់ទឹកពន្លត់ភ្លើងរាងពិបាកបន្តិចដោយសារនៅក្នុងអគារសម្បូរសារធាតុដែលងាយឆេះ ហើយម៉្យាងទៀតមានផ្សែងហុយខ្លាំងពេក។ ប្រហែលមួយម៉ោងក្រោយមកទើបពួកគេអាចពន្លត់ភ្លើងនោះជាស្ថាពរ។ ទោះបីភ្លើងរលត់អស់ហើយក្ដី ប៉ុន្តែនៅតែមានការឆ្លងចរន្តអគ្គិសនីចេញផ្កាភ្លើងព្រាកៗ។ ហេតុនេះ ភ្នាក់ងារអគ្គិភ័យត្រូវបន្តស្ថិតនៅទីនោះដើម្បីឃ្លាំមើលក្រែងលោមានភ្លើងឆេះជាបន្តទៀត។ គេសង្ស័យថាទំនងជាមានផ្កាភ្លើងធ្លាក់ត្រូវចំម៉ូតូដែលចតនៅជាន់ខាងក្រោមទើបបានជាមានអគ្គិភ័យកើតឡើង។ ប៉ុន្តែសមត្ថកិច្ចផ្នែកស៊ើបអង្កេតមិនទាន់សន្និដ្ឋានថាអគ្គិភ័យនេះបណ្ដាលមកពីមូលហេតុអ្វីពិតប្រាកដទេ៕ ប្រភព៖ Reuters និងប្រភពដទៃទៀត

ចែករំលែកព័តមាននេះ