ADផ្ទាំងផ្សព្វផ្សាយពាណិជ្ជកម្ម

Picture

អាជ្ញាធរ​ខេត្តស្ទឹងត្រែង​ដាក់​វិធានការ​អប់រំ​លើ​ក្រុម​ក្មេ.ង.​ទំ.នើ.ង​​៦​នាក់ និង​បន្ត​ស្រាវជ្រាវ​រក​ទីតាំង​កែ​ច្នៃ​បំពង់​ស៊ី​ម៉ាំង​ម៉ូតូ

5 ថ្ងៃ មុន
  • ស្ទឹងត្រែង

ខេត្តស្ទឹងត្រែង​ ៖ ក្រុម​ក្មេង​ទំនើង​ចំនួន​៦​នាក់ ដែល​មាន​ទីលំនៅ​ក្នុង​តំបន់​ជនបទ​នៃ​ខេត្តស្ទឹងត្រែង ត្រូវ​បាន​អាជ្ញាធរ​ខេត្ត​ចាត់វិធានការ​រដ្ឋបាល និង​អប់រំ ដោយ​តម្រូវ​ឱ្យ​ចូលរួម​រើស​សំរាម​នៅ​តាម​ទី​សាធារណៈ ដើម្បី​កែប្រែ​ឥរិយាបថ​ និង​ដាស់តឿន​ឱ្យ​មានការ​យល់​ដឹង​ពី​ផល​ប៉ះពាល់​ដល់​សង្គម បន្ទាប់​ពី​ពួក​គេ​ត្រូវ​បាន​សមត្ថកិច្ច​ឃាត់ខ្លួន ពាក់ព័ន្ធ​នឹង​ការ​កែ​ច្នៃ​បំពង់​ស៊ី​ម៉ាំង​ម៉ូតូ​ឱ្យ​បញ្ចេញ​សំឡេង​ខ្លាំង​ៗ ​។

លោក លី មី​ណា អភិបាលក្រុង​ស្ទឹង​ត្រែង បានឱ្យ​ដឹង​ថា នៅ​យប់​ថ្ងៃ​ទី​១៣ ខែវិច្ឆិកា ឆ្នាំ​២០២៦ កម្លាំង​នគរបាល​នៃ​អធិការដ្ឋាន​ក្រុង​ស្ទឹង​ត្រែង បាន​ចុះ​អន្តរាគមន៍​ឃាត់ខ្លួន​យុវជន​ទាំង​៦​នាក់​ក្រោយ​រក​ឃើញ​ថា ពួក​គេ​បាន​ជិះ​ម៉ូតូ​ជា​ក្រុម និង​បង្ក​សំឡេង​រំខាន​យ៉ាង​ខ្លាំង​នៅ​តាម​ដងផ្លូវ​ក្នុង​ក្រុង ដែល​ប៉ះពាល់​ដល់​ការ​រស់នៅ និង​សេចក្តីសុខ​របស់​ប្រជាពលរដ្ឋ​ក្នុង​មូលដ្ឋាន​ ។

តាម​ការ​បញ្ជាក់​របស់​លោក​អភិបាលក្រុង យុវជន​ទាំង៦​នាក់​ខាងលើ មាន​លំនៅ​ឋាន​នៅ​ភូមិ​ត្បូង​ខ្លា ឃុំ​អូរ​ម្រះ ស្រុក​សៀម​បូក ខេត្តស្ទឹងត្រែង ​។ ក្រោយ​បញ្ចប់​ការ​អនុវត្ត​វិធានការ​រដ្ឋបាល ពួក​គេ​នឹង​ត្រូវ​អនុញ្ញាត​ឱ្យ​វិល​ត្រឡប់​ទៅ​កាន់​លំនៅ​ឋាន​វិញ ​ដោយ​មាន​លក្ខខណ្ឌ ត្រូវ​ដោះ​បំពង់​ស៊ី​ម៉ាំង​ដែល​បាន​កែ​ច្នៃ​ចេញ និង​ប្តូរ​មក​ប្រើ​បំពង់​ស៊ី​ម៉ាំង​ដើម​តាម​លក្ខណៈ​បច្ចេក​ទេស​វិញ ព្រមទាំង​តម្រូវ​ឱ្យ​អាណាព្យាបាល​មក​ធានា និង​ទទួលខុសត្រូវ​លើ​ការ​អប់រំ​កូន​ៗ​ផង​ដែរ​ ។

ជាមួយ​គ្នា​នេះ អាជ្ញាធរ​នឹង​បន្ត​ចាត់វិធានការ​ស្រាវជ្រាវ ដើម្បី​កំណត់​អត្តសញ្ញាណ និង​ស្វែងរក​ទីតាំង​ជាង​ដែល​ទទួល​កែ​ច្នៃ​បំពង់​ស៊ី​ម៉ាំង​ម៉ូតូ​ខាងលើ ដើម្បី​ចាត់វិធានការ​តាម​នីតិវិធី​ ។ វិធានការ​នេះ ​មាន​គោលបំណង​ទប់ស្កាត់​ការ​បង្ក​សំឡេង​រំខាន និង​រក្សា​សណ្តាប់ធ្នាប់​សាធារណៈ​ក្នុង​ក្រុង​ស្ទឹង​ត្រែង ​៕