រាជធានីភ្នំពេញ ៖ វេទិកាសេដ្ឋកិច្ច និងបច្ចេកវិទ្យាកម្រិតខ្ពស់ នៃកិច្ចប្រជុំកំពូលហ្វ្រង់កូហ្វូនី ដែលរៀបចំដោយព្រះរាជាណាចក្រកម្ពុជា ហ្វ្រង់កូតិច ឆ្នាំ ២០២៦ គឺជាព្រឹត្តិការណ៍អមដ៏សំខាន់បំផុតផ្នែកសេដ្ឋកិច្ច និងបច្ចេកវិទ្យានៃកិច្ចប្រជុំកំពូលហ្វ្រង់កូហ្វូនីលើកទី ២០ ដែលបានប្រព្រឹត្តទៅនៅរាជធានីភ្នំពេញ ចាប់ពីថ្ងៃទី ១៤ នេះដល់ថ្ងៃទី ១៦ ខែវិច្ឆិកា ឆ្នាំ ២០២៦ ។
តាមរយៈភាពជោគជ័យនៃព្រឹត្តិការណ៍ហ្វ្រង់កូតិច ឆ្នាំ ២០២៤ នៅប្រទេសបារាំង ការរៀបចំឡើងជាលើកទីពីរនេះនឹងប្រមូលផ្ដុំរដ្ឋាភិបាល ក្រុមហ៊ុន វិនិយោគិន ធុរកិច្ចថ្មី និងអ្នកដឹកនាំផ្នែកនវានុវត្តន៍មកពីទូទាំងសហគមន៍ហ្វ្រង់កូហ្វូនី ដើម្បីជំរុញឱកាសធុរកិច្ច ការផ្លាស់ប្តូរបច្ចេកវិទ្យា និងកិច្ចសហប្រតិបត្តិការសេដ្ឋកិច្ចនៅក្នុងប្រទេសកម្ពុជា ដែលជាសេដ្ឋកិច្ចឌីជីថលកំពុងរីកចម្រើនយ៉ាងឆាប់រហ័ស និងជាច្រកទ្វារទៅកាន់ទីផ្សារដ៏មានសក្តានុពលរបស់តំបន់អាស៊ាន ។

ក្រោមមូលបទ «សហគមន៍ហ្វ្រង់កូហ្វូនីតែមួយ អនាគតឌីជីថលតែមួយ» ហ្វ្រង់កូតិច ឆ្នាំ ២០២៦ ឆ្លុះបញ្ចាំងពីចក្ខុវិស័យរួមគ្នាក្នុងការបង្រួបបង្រួមសហគមន៍ហ្វ្រង់កូហ្វូនី តាមរយៈបច្ចេកវិទ្យា និងកិច្ចសហប្រតិបត្តិការដែលត្រៀមរួចជាស្រេចសម្រាប់ថ្ងៃអនាគត តាមរយៈការជំរុញអធិបតេយ្យភាពឌីជីថល កំណើនប្រកបដោយបរិយាបន្ន កិច្ចសហប្រតិបត្តិការដោយសន្តិភាព និងភាពជាដៃគូឆ្លងប្រទេសដែលមានភាពវិជ្ជមាន នៅទូទាំងសហគមន៍ហ្វ្រង់កូហ្វូនី និងបណ្តាប្រទេសដទៃទៀត ។
ព្រឹត្តិការណ៍ហ្វ្រង់កូតិច នឹងបង្កើតជាវេទិកាថ្មីមួយសម្រាប់តភ្ជាប់ទំនាក់ទំនងជាមួយអ្នកដែលមានសិទ្ធិធ្វើការសម្រេចចិត្តស្វែងរកឱកាសវិនិយោគ និងបង្ហាញពីបច្ចេកវិទ្យាក៏ដូចជាដំណោះស្រាយដែលកំពុងមានភាពរីកចម្រើនទៅកាន់សហគមន៍ហ្វ្រង់កូហ្វូនី ព្រមទាំងកសាងភាពជាដៃគូ និងពង្រឹងកេរ្តិ៍ឈ្មោះឱ្យកាន់តែទូលំទូលាយ ។ តាមរយៈការរៀបចំពិព័រណ៍នវានុវត្តន៍ឌីជីថល វេទិកាវិនិយោគ ការផ្គូរផ្គងធុរកិច្ច (B2B Matchmaking) និងវេទិកាពិភាក្សា ព្រឹត្តិការណ៍នេះនឹងជំរុញឱ្យមានកិច្ចសន្ទនាប្រកបដោយអត្ថន័យ និងនាំមកនូវលទ្ធផលធុរកិច្ចពិតប្រាកដ ។

ចូលរួមព្រឹត្តិការណ៍ហ្វ្រង់កូតិច ឆ្នាំ ២០២៦ ដែលជាពិព័រណ៍បច្ចេកវិទ្យាហ្វ្រង់កូហ្វូនីដ៏ធំបំផុត ចាប់ពីថ្ងៃទី ១៤ ដល់ថ្ងៃទី ១៦ ខែវិច្ឆិកាឆ្នាំ ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ដើម្បីភ្ជាប់ទំនាក់ទំនងជាមួយជាង ២០០ ក្រុមហ៊ុនដែលនឹងមកតាំងពិព័រណ៍ គណៈប្រតិភូរដ្ឋាភិបាលមកពី ៩០ប្រទេស អ្នកដឹកនាំផ្នែកនវានុវត្តន៍មកពីជុំវិញពិភពលោក និងអ្នកចូលរួមជាង ៥០០០នាក់ ។
ព្រឹត្តិការណ៍ហ្វ្រង់កូតិច ឆ្នាំ ២០២៦ ត្រូវបានរៀបចំឡើងក្នុងគោលបំណង ទាញយកអត្ថប្រយោជន៍ពីកម្លាំងរួមនៃសហគមន៍ ប្រទេសនិយាយភាសាបារាំង ដើម្បីជំរុញការផ្លាស់ប្តូរសេដ្ឋកិច្ច លើកកម្ពស់វឌ្ឍនភាពបច្ចេកវិទ្យា និងបង្ហាញពីឧត្តមភាពសហគ្រិនក្នុងសហគមន៍ហ្វ្រង់កូហ្វូនី ។ ស្របនឹងបរិបទបរិវត្តកម្មឌីជីថល សង្គម និងសេដ្ឋកិច្ចស៊ីជម្រៅ ព្រឹត្តិការណ៍ហ្វ្រង់កូតិច ឆ្នាំ ២០២៦ រំលេចគោលបំណងគន្លឹះចំនួន ៤ ដូចខាងក្រោម ៖

ការទូតសេដ្ឋកិច្ច និងបច្ចេកវិទ្យា ៖ ប្រែក្លាយសន្ទុះ នៃកិច្ចប្រជុំកំពូលហ្វ្រង់កូហ្វូនី ឱ្យទៅជាកិច្ចសហប្រតិបត្តិការជាក់ស្តែង និងបង្ហាញពីសក្តានុពលរបស់កម្ពុជាដែលជាតួអង្គមួយនៅក្នុងសហគមន៍ហ្វ្រង់កូហ្វូនី ក្នុងការបំពេញមុខងារជាមជ្ឈមណ្ឌលតភ្ជាប់ពាណិជ្ជកម្ម និងនវានុវត្តន៍ រវាងសហគមន៍ហ្វ្រង់កូហ្វូនី និងសហគមន៍អាស៊ាន ។
ការទាក់ទាញវិនិយោគផ្ទាល់ពីបរទេស ៖ វត្តមានជាពិសេសនៃបណ្តាក្រុមហ៊ុនបច្ចេកវិទ្យាធំៗ និងគណៈប្រតិភូជាន់ខ្ពស់ពី ៩០ប្រទេសបង្កើតជាឱកាសក្នុងការជំរុញអាជីវកម្មសម្រេចចិត្តលើជម្រើសវិនិយោគ និងការចាប់ដៃគូប្រតិបត្តិការក្នុងតំបន់អាស៊ាន ។

បរិវត្តកម្មឌីជីថល ៖ បង្ហាញអំពីមូលធនមនុស្ស និងហេដ្ឋារចនាសម្ព័ន្ធសាធារណៈឌីជីថល ដែលជាមូលដ្ឋាននាំយកផលដល់បរិវត្តកម្មឌីជីថលស៊ីជម្រៅ និងការអភិវឌ្ឍឧស្សាហកម្ម ៤.០ ក្នុងសហគមន៍ហ្វ្រង់កូហ្វូនី ។ ជាឧទាហរណ៍ នៅកម្ពុជា ហេដ្ឋារចនាសម្ព័ន្ធសាធារណៈឌីជីថលមួយចំនួនត្រូវបានដាក់ឱ្យប្រើប្រាស់ ជាអាទិ៍ Verify.gov.kh, ប្រព័ន្ធទូទាត់ប្រាក់ បាគង (Bakong), ថ្នាលផ្លាស់ប្តូរទិន្នន័យ CamDX, និង Digital ID ជាដើម ។
អធិបតេយ្យភាពឌីជីថល ៖ ការជំរុញអភិបាលកិច្ចបច្ចេកវិទ្យាដែលផ្ដោតលើក្រមសីលធម៌បរិស្ថាន និងភាពចម្រុះ នៃវប្បធម៌សម្រាប់ការអភិវឌ្ឍ និងប្រើប្រាស់បច្ចេកវិទ្យាបញ្ញាសប្បនិម្មិត ។

ការរំពឹងទុកអំពីព្រឹត្តិការណ៍ហ្វ្រង់កូតិច ឆ្នាំ ២០២៦ ៖ ឱកាសបង្ហាញវត្តមាននៅក្នុងព្រឹត្តិការណ៍ដ៏ធំ អមជាមួយកិច្ចប្រជុំកំពូលនៃបណ្តាប្រទេសនិយាយភាសាបារាំង លើកទី ២០ ដែលមានអ្នកចូលរួមជាង ៥០០០នាក់ និងការតាំងពិព័រណ៍បច្ចេកវិទ្យាជាង ១១០ស្តង់ ។ ឱកាសចូលទៅកាន់ទីផ្សារដ៏មានសក្តានុពលរបស់ប្រទេសកម្ពុជា និងតំបន់អាស៊ីអាគ្នេយ៍ តាមរយៈការជួបពិភាក្សាជាមួយ ម្ចាស់សហគ្រាស និងអាជីវកម្មក្នុងស្រុក ។ ភ្ជាប់ទំនាក់ទំនងជាមួយថ្នាក់ដឹកនាំ ធុរកិច្ចថ្មីឌីជីថល (Digital Startups) និងដៃគូពីបណ្តាប្រទេសនិយាយភាសាបារាំង តាមរយៈជំនួបធុរកិច្ច (B2B meetings) វេទិកាអំពីការវិនិយោគ និងកម្មវិធីជាច្រើនផ្សេងទៀត ។ ចូលរួមក្នុងវេទិកាពិភាក្សារយៈពេលពីរថ្ងៃ ស្តីពីសេដ្ឋកិច្ចឌីជីថល ដោយមានវាគ្មិនជំនាញល្បីៗមកពីបណ្តាប្រទេសនានាចែករំលែកបទពិសោធន៍ និងទស្សនវិស័យកម្រិតសកល ។

ព្រឹត្តិការណ៍ហ្វ្រង់កូតិច ឆ្នាំ ២០២៦ នឹងប្រមូលផ្តុំតំណាងមកពីប្រទេសនិយាយភាសាបារាំងចំនួន ៩០ប្រទេស រួមមានស្ថាប័នរដ្ឋាភិបាល ធុរកិច្ចថ្មីឌីជីថល (Startups) វិនិយោគិន ក្រុមហ៊ុនបច្ចេកវិទ្យា និងថ្នាក់ដឹកនាំផ្នែកនវានុវត្តន៍ ដើម្បីជំរុញកិច្ចសហប្រតិបត្តិការ ភាពជាដៃគូ និងការអភិវឌ្ឍសេដ្ឋកិច្ច ។
រដ្ឋាភិបាល ក្រសួងស្ថាប័ន ក្រុមហ៊ុនបច្ចេកវិទ្យា ធនាគារ ដៃគូអភិវឌ្ឍន៍ សាកលវិទ្យាល័យ និងគ្រឹះស្ថានអប់រំ រួមទាំងអង្គការអន្តរជាតិ និងគណៈប្រតិភូមកពីបណ្តាប្រទេសនានា នឹងចូលរួមយ៉ាងសកម្មក្នុងកិច្ចពិភាក្សាលើប្រធានបទទាំង ៧ នៃព្រឹត្តិការណ៍។ ថ្នាក់ដឹកនាំជាន់ខ្ពស់ រួមមាននាយកប្រតិបត្តិ (C-level executives) នាយកមន្ត្រីទទួលបន្ទុកផ្នែកនវានុវត្តន៍ និងអ្នកជំនាញដែលមានទំនាក់ទំនងជាមួយសហគមន៍នៃបណ្តាប្រទេសនិយាយភាសាបារាំង ។ សហគ្រិនវ័យក្មេងនិយាយភាសាបារាំង និងក្រុមហ៊ុនបង្កើតថ្មី (Startups) នៃបណ្តាប្រទេសនិយាយភាសាបារាំង ដែលកំពុងអនុវត្តគម្រោងនវានុវត្តន៍ ដើម្បីរួមចំណែកជំរុញការអភិវឌ្ឍ និងបង្កើតសន្ទុះថ្មីសម្រាប់សហគមន៍នៃបណ្តាប្រទេសនិយាយភាសាបារាំង ៕

















ចែករំលែកព័តមាននេះ