រាជធានីភ្នំពេញ ៖ ដើម្បីបង្ហាញភ្ញៀវជាតិ អន្តរជាតិមកទស្សនាបានស្គាល់ជារបស់កម្ពុជានោះ ក្រុមការងារអ្នកជំនាញក្រសួង វប្បធម៌ និងក្រសួងស្ថាប័នពាក់ព័ន្ធ បានយករូបសំណង់ប្រាសាទតាក្របី ប្រាសាទព្រះ វិហារ និងខ្លោងទ្វាររាជធានីអង្គរធំ ធ្វើអំពីស្នោ រៀបចំឡើងនៅភូមិហ្វ្រង់កូហ្វូនី នៅសួនច្បារមុខវត្តបទុមវតី រាជធានីភ្នំពេញយ៉ាងប្រណិត ។
ការយករូបសំណង់ប្រាសាទព្រះវិហារ ប្រាសាទតាក្របី មកបង្ហាញភ្ញៀវជាតិ និងអន្តរ ជាតិទស្សនានេះ បន្ទាប់ពីកងទ័ពថៃ បានធ្វើការបាញ់បំបាញ់លើប្រាសាទនេះ កាលពីពេលកន្លងមកនេះ ។
សំណង់គំរូប្រាសាទតាមាន់ ប្រាសាទតាក្របី ខ្លោងទ្វារាជធានីអង្គធំ ត្រូវបានដំឡើងយ៉ាងប្រណីតនៅក្នុង «ភូមិហ្វ្រង់កូហ្វូនី» ដើម្បីបង្ហាញពីអត្តសញ្ញាណវប្បធម៌ និងអធិបតេយ្យភាពខ្មែរ ក្នុងកិច្ចប្រជុំកំពូលហ្វ្រង់កូហ្វូនី លើកទី២០ ធ្វើឱ្យមានភាពចាប់អារម្មណ៍ពីភ្ញៀងជាតិ និងអន្តរជាតិ ។
លោក ប៊ុត ចាន់ណា មន្ដ្រីជាន់ខ្ពស់ក្រសួងវប្បធម៌ និងវិចិត្រសិល្បៈ បានឱ្យដឹងនៅថ្ងៃទី១២ ខែវិច្ឆិកា ឆ្នាំ២០២៦ ថា ដើម្បីអបអរសាទរ និងត្រៀម លក្ខណៈធ្វើជាម្ចាស់ផ្ទះ នៃកិច្ចប្រជុំកំពូលហ្វ្រង់កូហ្វូនី លើកទី២០ (20th Francophonie Summit) នៅរាជធានីភ្នំពេញ ក្រុមការងាររៀបចំព្រឹត្តិការណ៍ និងក្រសួង ស្ថាប័នពាក់ព័ន្ធ បានសម្រេចដំឡើងសំណង់គំរូ ប្រាសាទទាំងនេះ យ៉ាងផ្ចិតផ្ចង់បំផុតនៅក្នុងបរិវេណ «ភូមិហ្វ្រង់កូហ្វូនី» (Village de la Francophonie) ដែលរៀបចំ ឡើងនៅសួនច្បារមុខវត្តបទុមវតី ក្នុងគោលបំណងបង្ហាញពីមរតកវប្បធម៌ ប្រវត្តិសាស្ត្រ និងស្នាដៃស្ថាបត្យកម្មដ៏ល្អឯករបស់បុព្វបុរសខ្មែរ ទៅកាន់គណៈប្រតិភូ និងភ្ញៀវអន្តរជាតិ ដែលបានអញ្ជើញមកពីជុំវិញពិភពលោកបានឃើញ ។
លោកបានឱ្យដឹងថា ការជ្រើសរើសយកប្រាសាទទាំងនេះ មកដំឡើងជាសំណង់និមិត្តរូបដ៏សំខាន់មួយនៅក្នុង ភូមិហ្វ្រង់កូហ្វូនីនេះ មិនត្រឹមតែជាការតុបតែងលម្អដើម្បីទាក់ទាញភ្ញៀវទេសចរ និងអ្នកចូលរួមប៉ុណ្ណោះទេ ប៉ុន្តែវាបង្កប់នូវអត្ថន័យយ៉ាងជ្រាលជ្រៅផ្នែកប្រវត្តិសាស្ត្រ និងការទូតវប្បធម៌ ។
លោក ប៊ុត ចាន់ណា ទីប្រឹក្សានៃក្រសួងវប្បធម៌ និងវិចិត្រសិល្បៈ បានលើកឡើងថា៖ «មូលហេតុដែលក្រសួងវប្បធម៌ ក៏ដូចជាថ្នាក់ដឹកនាំសម្រេចចិត្តជ្រើសរើសយកតួប្រាសាទ យកមកដំឡើងនៅក្នុងកិច្ចប្រជុំកំពូលហ្វ្រង់កូហ្វូនី លើកទី២០នេះ ដោយសារប្រាសាទតាមាន់ និងប្រាសាទតាក្របី ជារបស់ខ្មែរពិត ។
លោកបានលើកឡើងថា៖ «សព្វថ្ងៃកំពុងមានបញ្ហាពាក់ព័ន្ធទៅនឹងជម្លោះជាមួយប្រទេសជិតខាង ដែលរំលោភថា ជាបរបស់គេ។ ម្ល៉ោះហើយ នេះជាបស់ខ្មែរពិត ហើយបានជាថ្នាក់ដឹកនាំសម្រេចថា ត្រូវតែបង្ហាញរបស់ពិតទៅកាន់ភ្ញៀវជាតិ និងភ្ញៀវអន្តរជាតិឱ្យបានស្គាល់ថា នេះជាបស់ខ្មែរ ជាប្រាសាទតាក្របី ប្រាសាទតាមាន់» ។
ជាមួយគ្នានេះ លោក ប៊ុត ចាន់ណា បានពន្យល់បន្ថែមថា ចំពោះការដំឡើងតួប្រាសាទតាមាន់នេះ មានរយៈពេលយូរជាង ២ខែ ដោយសារការរៀបចំ និងកែសម្រួលឱ្យត្រឹមត្រូវទៅនឹងរចនាសម្ព័ន ក្បួនខ្នាត និងរចនាបថចម្លាក់របស់ខ្មែរ ទោះបីជាប្រាសាទតូចជាងប្រាសាទមែនទែនក៏ដោយ តែរចនាសម្ព័ន គឺត្រូវឱ្យជារបស់ខ្មែរពិតប្រាកដ ។
លោកបានគូសបញ្ជាក់ថា ៖ «ខ្ញុំសង្ឃឹមថា ភ្ញៀវដែលមកទស្សនា ជាពិសេសភ្ញៀវអន្តរជាតិ គាត់នឹងយកចិត្តទុកដាក់ពីបញ្ហា ឃើញនូវប្រាសាទរបស់យើង ដែលកំពុងមានបញ្ហាជម្លោះជាមួយអ្នកជិតខាង ហើយវាបានបង្ហាញ នូវអ្វីដែលថាជាបស់ខ្មែរពិតៗ បង្ហាញដល់ភ្ញៀវជាតិ និងភ្ញៀវអន្តរជាតិឱ្យបានស្គាល់ថា នេះជាបស់ខ្មែរ ហើយខ្មែរមិនមែនចេះតែទាមទារយករបស់គេទេ។ ខ្មែរមិនដែលចង់បានរបស់អ្នកណាទេ គឺខ្មែរចង់តែថែរក្សារបស់ខ្មែរដែលខ្លួនមាន ហើយក៏មិនចង់បាត់បង់ទៅវិញដែរ។ ខ្ញុំសង្ឃឹមថា ប្រជាជនខ្មែរ និងភ្ញៀវអន្តរជាតិ លោកនឹងយល់ដឹង ហើយលោកនឹងគាំទ្រចំពោះរាជរដ្ឋាភិបាលកំពុងតែការពារ ថែរក្សា និងទាមទាររបស់ខ្មែរយកមកវិញ» ។
ជាការកត់សម្គាល់ ក្រុមជាងចម្លាក់ និងវិស្វករជំនាញខ្មែរ បានប្រើប្រាស់ពេលវេលា និងបច្ចេកទេសយ៉ាងយកចិត្តទុកដាក់ ក្នុងការរចនាតួប្រាសាទតាមាន់នេះឡើង ដោយរក្សាបាននូវទម្រង់ដើម ក្បាច់រចនា និងសមាមាត្រយ៉ាងសម សួន។ ចាប់តាំងពីគ្រឹះប្រាសាទ ជញ្ជាំង ហោជាង ផ្តែរ រហូតដល់កំពូលប្រាង្គ ត្រូវបានឆ្លាក់ និងតុបតែងយ៉ាងរស់រវើក ប្រៀបបាននឹងប្រាសាទថ្មពិតៗ ដែលធ្វើឱ្យអ្នកទស្សនាទទួលបានអារម្មណ៍ដូចបានធ្វើដំណើរទៅដល់ទីតាំងប្រាសាទផ្ទាល់។
បើតាមក្រុមជាងដែលបាន និងកំពុងរៀបចំប្រាសាទតាមាន់បានរំលេចឱ្យដឹងថា ការរៀបចំដំឡើងតួប្រាសាទទាំងនេះ ក៏បង្ហាញពីការប្តេជ្ញាចិត្តខ្ពស់របស់រាជរដ្ឋាភិបាលកម្ពុជា ក្នុងការថែរក្សា ការពារ និងលើកតម្កើងមរតកវប្បធម៌ជាតិ ព្រមទាំងបញ្ជាក់ពីតួនាទីដ៏សកម្មរបស់កម្ពុជានៅលើឆាកអន្តរជាតិ ក្នុងការប្រើប្រាស់វប្បធម៌ជាស្ពានតភ្ជាប់សន្តិភាព មិត្តភាព និងកិច្ចសហប្រតិបត្តិការពហុភាគី។
សូមជម្រាបជូនថា «ភូមិហ្វ្រង់កូហ្វូនី» គឺជាបេះដូងនៃសកម្មភាពវប្បធម៌ សិល្បៈ នវានុវត្តន៍ និងការផ្លាស់ប្តូរពាណិជ្ជកម្ម អមជាមួយកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជា ធ្វើជាម្ចាស់ផ្ទះ។ វត្តមានរបស់ប្រាសាទទាំងនេញនៅទីនេះ នឹងក្លាយជាចំណុចចាប់អារម្មណ៍ដ៏សំខាន់ផងដែរ សម្រាប់ការផ្តិតយករូបភាពអនុស្សាវរីយ៍ ការរៀបចំកម្មវិធីសម្តែងសិល្បៈបុរាណ និងជាវេទិកាផ្សព្វផ្សាយសក្តានុពលទេសចរណ៍វប្បធម៌របស់កម្ពុជាទៅកាន់បណ្តាប្រទេសនិយាយភាសាបារាំងទាំងអស់។
ភូមិហ្វ្រង់កូហ្វូនី គ្រោងនឹងរៀបចំរយៈពេល ៥ថ្ងៃ ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ ដើម្បីបង្ហាញលើសិល្បៈ វប្បធម៌ កិច្ចសហប្រតិបត្តិការ និងសាមគ្គីភាព រវាងព្រះរាជាណាចក្រកម្ពុជា និងបណ្តាប្រទេសនិយាយភាសាបារាំង តាមរយៈការរៀបចំជាពន្លាជាតិ, ស្តង់ពិព័រណ៌, ស្តង់ពិព័រណ៌ម្ហូបអាហារ, ការសម្តែងសិល្បៈចម្រុះប្រចាំថ្ងៃ និងការរៀបចំជាកិច្ចសន្ទនា និងសិក្ខាសាលាលើប្រធានបទផ្សេងៗ៕
ចែករំលែកព័តមាននេះ