អន្តរជាតិ ៖ យោងតាមការវាយតម្លៃរបស់ទីភ្នាក់ងារស៊ើបការណ៍សម្ងាត់លោកខាងលិចបានឱ្យដឹងថា ប្រទេសអ៊ីរ៉ង់នៅតែអាចផលិតមីស៊ីលបាលីស្ទិកបានប្រហែល៥០គ្រាប់ក្នុងមួយខែ បើទោះបីជាមូលដ្ឋានឧស្សាហកម្មយោធារបស់ខ្លួន រងការខូចខាតយ៉ាងធ្ងន់ធ្ងរពីការវាយប្រហារតាមអាកាសរបស់អាមេរិក និងអ៊ីស្រាអែលយ៉ាងណាក៏ដោយ។
ប្រភពពី Bloomberg កាលពីថ្ងៃទី១១ ខែវិច្ឆិកា បានរាយការណ៍ថា មន្ត្រីលោកខាងលិចដែលវិភាគរបាយការណ៍ស៊ើបការណ៍សម្ងាត់យោធាបានប៉ាន់ប្រមាណថា អ៊ីរ៉ង់ទំនងជានៅតែរក្សាទុកមីស៊ីលបាលីស្ទិកយ៉ាងតិច ១ ៧០០ គ្រាប់ និងកំពុងផលិតបន្ថែមប្រហែលពាក់កណ្តាលនៃសមត្ថភាពមុនសង្គ្រាម។ ឃ្លាំងសព្វាវុធអ៊ីរ៉ង់ រួមបញ្ចូលទាំងបណ្តាដ្រូនអត្តឃាតត្រកូល Shahed ក៏ដូចជាវីដេអូបង្ហាញពីទីក្រុងមីស៊ីលក្រោមដីថ្មី ដែលទើបត្រូវបានចេញផ្សាយដោយកងឆ្មាំបដិវត្តន៍ឥស្លាមអ៊ីរ៉ង់។
ចំនួនអាវុធពិតប្រាកដ គឺពិបាកនឹងកំណត់ណាស់ ដោយសារតែគ្មាននរណាដឹងអំពីទំហំនៃឃ្លាំងស្តុកអាវុធមុនសង្គ្រាមរបស់អ៊ីរ៉ង់ និងកម្រិតដែលប្រទេសនេះ អាចផលិតមីស៊ីលជំនួសមីស៊ីលដែលត្រូវបានបំផ្លាញនោះទេ។ ទោះយ៉ាងណាក៏ដោយ តួលេខ Bloomberg Economics បានបង្ហាញថា អ៊ីរ៉ង់បានបាញ់ដ្រូន Shahed ជាង ៤ ៩០០ គ្រឿង និងមីស៊ីលបាលីស្ទិកយ៉ាងតិច ២ ២០០ គ្រាប់ ចាប់តាំងពីសង្គ្រាមបានចាប់ផ្តើម កាលពីថ្ងៃទី២៨ ខែកុម្ភៈ កន្លងទៅ។
អ្នកនាង Becca Wasser អ្នកជំនាញខាងកិច្ចការយោធានៃសារព័ត៌មាន Bloomberg Economics បាននិយាយថា ឃ្លាំងស្តុកអាវុធ និងគ្រាប់មីស៊ីលរបស់អ៊ីរ៉ង់ មិនអាចប្រៀបធៀបជាមួយសហរដ្ឋអាមេរិកបានទេ ប៉ុន្តែយុទ្ធសាស្ត្ររបស់អ៊ីរ៉ង់ត្រូវការតែសមត្ថភាពគ្រប់គ្រាន់ ដើម្បីបង្កការរំខាន បង្កើនការចំណាយ និងការស៊ូទ្រាំឱ្យបានយូរប៉ុណ្ណោះ។
តាមរយៈការណ៍នេះ ហាក់ផ្ទុយឆ្ងាយពីការអះអាងរបស់បណ្តាមន្ត្រីអាមេរិកដែលថា មូលដ្ឋានឧស្សាហកម្មយោធាអ៊ីរ៉ង់ជាង ៨០% ត្រូវកម្ទេចខ្ទេចខ្ទី។ ប៉ុន្តែអ្នកជំនាញលើកឡើងថា ដោយសារតែអ៊ីរ៉ង់មានហេដ្ឋារចនាសម្ព័ន្ធក្រោមដី និងគ្រឿងបន្លាស់ស្តុកទុក ទើបបានជាពួកគេអាចបន្តការផលិត និងរក្សាកម្លាំងយោធាបានមកទល់ពេលនេះ៕
ចែករំលែកព័តមាននេះ