កម្ពុជានឹងបើកដំណើរការព្រឹត្តិការណ៍ «ភូមិហ្វ្រង់កូហ្វូនី» ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ នៅរាជធានីភ្នំពេញ
- ភ្នំពេញ
រាជធានីភ្នំពេញ ៖ ក្រសួងទេសចរណ៍កម្ពុជាបានចេញសេចក្តីជូនដំណឹងស្តីពីការបើកដំណើរការព្រឹត្តិការណ៍ «ភូមិហ្វ្រង់កូហ្វូនី» Village de la Francophonieចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ នៅរាជធានីភ្នំពេញ ។
ក្នុងសេចក្តីជូនដំណឹងក្រសួងទេសចរណ៍ចេញផ្សាយ នៅថ្ងៃទី១២ ខែវិច្ឆិកា ឆ្នាំ២០២៦បានជូនក្រសួង ស្ថាប័នសាធារណៈ វិស័យឯកជន បណ្តាញសារព័ត៌មាន ភ្ញៀវទេសចរជាតិ-អន្តរជាតិ និងសាធារណជនទាំងអស់ឱ្យបានជ្រាបថា ក្នុងស្មារតីអបអរសាទរព្រះរាជាណាចក្រកម្ពុជាទទួលធ្វើជាម្ចាស់ផ្ទះរៀបចំ«កិច្ចប្រជុំកំពូលហ្វ្រង់កូហ្វូនីលើកទី២០» ។
ក្រសួងទេសចរណ៍សហការជាមួយក្រសួងការបរទេស និងសហប្រតិបត្តិការអន្តរជាតិ ក្រសួងកិច្ចការនារី ក្រសួងវប្បធម៌ និងវិចិត្រសិល្បៈ រដ្ឋបាលរាជធានីភ្នំពេញ និងក្រសួង ស្ថាប័នពាក់ព័ន្ធ នឹងបើកដំណើរការ«ភូមិហ្វ្រង់កូហ្វូនី» ក្រោមប្រធានបទ «ស្នាមញញឹមខ្មែរ ស្នាមញញឹមហ្វ្រង់កូហ្វូនី» ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ នៅបរិវេណសួនច្បារវត្តបទុមវតី រាជធានីភ្នំពេញ ។
ពិធីបើកសម្ពោធជាផ្លូវការនឹងប្រព្រឹត្តទៅ នាព្រឹកថ្ងៃទី១៣ ខែវិច្ឆិកា ឆ្នាំ២០២៦ ក្រោមអធិបតីភាពដ៏ខ្ពស់ខ្ពស់របស់សម្តេចមហាប់វរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និងលោកជំទាវ Louise Mushikiwabo អគ្គលេខាធិការ នៃអង្គការអន្តរជាតិហ្វ្រង់កូហ្វូនី (OIF) ។
ជាមួយគ្នានេះ សម្រាប់រយៈពេល៥ថ្ងៃ ភូមិហ្វ្រង់កូហ្វូនីនឹងបើកទទួលស្វាគមន៍គណៈប្រតិភូភ្ញៀវទេសចរជាតិ-អន្តរជាតិ និងសាធារណជន ចាប់ពីម៉ោង១០និង០០នាទីព្រឹក រហូតដល់ម៉ោង៩និង០០នាទីយប់ ដោយមានកម្មវិធីចម្រុះប្រកបដោយភាពសម្បូរបែប និងមានភាពរស់រវើក ក្នុងនោះរួមមាន៖
១-តំបន់ពន្លាជាតិ ដែលមានការតាំងបង្ហាញអំពីអត្តសញ្ញាណជាតិ វប្បធម៌ ប្រពៃណី សិល្បៈ សក្តានុពល ទេស ចរណ៍ និងសមិទ្ធផលនានារបស់ប្រទេស/រដ្ឋ/តំបន់ដែលជាសមាជិកអង្គការ OIF និងស្ថាប័ន ចំណុះអង្គការ OIF ចំនួន៧៣ទីតាំងពន្លា។
២-ការរៀបចំសន្និសីទ និងកិច្ចពិភាក្សានានា មានចំនួនប្រមាណ៤០កម្មវិធី។
៣-ការសម្តែងសិល្បៈ និងវប្បធម៌របស់បណ្តាប្រទេសសមាជិកអង្គការ OIF និងទស្សនីយភាពសិល្បៈ របស់កម្ពុជា ដែលរៀបចំដោយក្រសួងវប្បធម៌ និងវិចិត្រសិល្បៈ ដែលមានប្រមាណជាង៥០កម្មវិធី។
៤-ការតាំងពិព័រណ៍ទូទៅ ដោយមានការចូលរួមពីបណ្តាប្រទេសអង្គការ OIF ក្រសួង ស្ថាប័នសាធារណៈ រដ្ឋបាលរាជធានី-ខេត្ត សមាគម អង្គការជាតិ-អន្តរជាតិ និងវិស័យឯកជន សរុបចំនួន១៣០ស្តង់។
៥-ភូមិអាហារហ្វ្រង់កូហ្វូនី ដែលមានការបង្ហាញ និងផ្សព្វផ្សាយម្ហូបអាហារ ភេសជ្ជៈ និងផលិតផល ម្ហូបអាហារអត្តសញ្ញាណរបស់កម្ពុជា និងបណ្តាប្រទេសក្នុងសហគមន៍ហ្វ្រង់កូហ្វូនី សរុបចំនួន ៣០ ស្តង់ នឹងសកម្មភាពអមជាច្រើនទៀត។
ក្រសួងទេសចរណ៍បានស្នើសូម ក្រសួង ស្ថាប័នសាធារណៈ វិស័យឯកជន បណ្តាញសារព័ត៌មាន ភ្ញៀវទេសចរជាតិ-អន្តរជាតិ និងសាធារណជនទាំងអស់ ជ្រាបជាព័ត៌មាន និងអង់ខចូលរួមព្រឹត្តិការណ៍ «ភូមិហ្វ្រង់កូហ្វូនី» ឱ្យបានច្រើនកុះករ ៕
ចែករំលែកព័តមាននេះ