ប្រទេសយេម៉ែន ៖ មីស៊ីល២គ្រាប់ កាលពីព្រឹកថ្ងៃទី១១ វិច្ឆិកា ត្រូវបាញ់លើជំរំយោធាមួយរបស់ក្រុមចម្រុះអារ៉ាប់ ដឹកនាំដោយអារ៉ាប៊ីសាអូឌីត នៅភាគខាងលិចក្រុងអាដេន ។ ចំណែកដ្រូន១គ្រឿង ដែលប៉ងវាយប្រហារបន្ទាយយោធាមួយ នៅក្នុងទីក្រុងនោះដែរ ត្រូវបានស្ទាក់កម្ទេច។ ការវាយប្រហារនោះ មិនទាន់មានការប្រកាសថា ជាស្នាដៃអ្នកណានៅឡើយ តែពួកឧទ្ទាមហ៊ូធីស្និទ្ធិអ៉ីរ៉ង់តែងវាយប្រហារដោយទៀងទាត់បណ្ដាទីតាំងរបស់រដ្ឋាភិបាលយេម៉ែនទទួលស្គាល់ដោយអន្តរជាតិ ហើយជួយទ្រទ្រង់ដោយអារ៉ាប៊ីសាអូឌីត ។
ការវាយប្រហារថ្មីនេះ លើក្រុងអាដេន ជារដ្ឋធានីបណ្ដោះអាសន្នរបស់រដ្ឋាភិបាលយេម៉ែន ក្រោយពីពួកហ៊ូធីវាយឲ្យខ្ទាតចេញពីរដ្ឋធានីសាណា ធ្វើឡើងបន្ទាប់ពីការវាយប្រហារតាមអាកាសដ៏បង្ហូរឈាមរបស់អារ៉ាប៊ីសាអូឌីតរយៈពេលប៉ុន្មានថ្ងៃចុងក្រោយនេះ ប្រឆាំងបណ្ដាជនស៊ីវិលក្នុងដែនដីត្រួតត្រាដោយហ៊ូធី ។ ក្រុងអាដេននាភាគខាងត្បូងប្រទេសជារដ្ឋធានីនៃអតីតយេម៉ែនខាងត្បូងមុនពេលមានការបង្រួបបង្រួមយេម៉ែន ត្រូវបានរដ្ឋាភិបាលយកធ្វើជារដ្ឋធានីបណ្ដោះអាសន្ន ។
កាលពីខែតុលាទីក្រុងនោះ រងការវាយប្រហារជាប់រដឹកពីសំណាក់ពួកហ៊ូធី ។ វិមានប្រធានាធិបតីក៏ជាផ្នែកមួយនៃការវាយប្រហារទាំងនោះដែរ ។ ពួកហ៊ូធីវាយដណ្ដើមកាន់កាប់រដ្ឋធានីយេម៉ែនសាណា កាលពីឆ្នាំ២០១៤ បង្ខំឲ្យរដ្ឋាភិបាលដកថយទៅកាន់ក្រុងអាដេន ។ ចាប់តាំងពីពេលនោះមក ពួកហ៊ូធីដណ្ដើមកាន់កាប់ផ្នែកមួយដ៏ធំរបស់ប្រទេស ។
បន្ទាប់ពីបទឈប់បាញ់គ្នាកាលពីឆ្នាំ២០២២ ការប្រយុទ្ធគ្នាកើតមានជាថ្មី ពីខែកក្កដាមក រវាងពួកហ៊ូធី និងកងទ័ពរដ្ឋាភិបាល គាំទ្រដោយអារ៉ាប៊ីសាអូឌីត ។ ទន្ទឹមគ្នានេះដែរ ពួកហ៊ូធី ក៏បង្កើនការវាយប្រហារលើអារ៉ាប៊ីសាអូឌីត សំដៅជាពិសេស លើបណ្ដាព្រលានយន្តហោះ និងហេដ្ឋារចនាសម្ព័ន្ធប្រេងកាតអារ៉ាប៊ីសាអូឌីត ។ អារ៉ាប៊ីសាអូឌីតប្រកាសពីការស្ទាក់កម្ទេចមីស៊ីលបណ្ដែត៣គ្រាប់ដែលពួកហ៊ូធីបាញ់សំដៅរាជធានីរីយ៉ាដ ។
នៅក្រុងសាណាមនុស្សច្រើនពាន់នាក់ ប្រមូលផ្ដុំគ្នាកាលពីថ្ងៃទី១១ វិច្ឆិកា ដើម្បីចូលរួមក្នុងការគោរពវិញ្ញាណក្ខ័ន្ធបណ្ដាជនរងគ្រោះដែលស្លាប់ ដោយសារការទម្លាក់គ្រាប់បែករបស់អារ៉ាប៊ីសាអូឌីត លើភូមិមួយនាភាគខាងកើតរដ្ឋធានីបណ្ដាលឲ្យមនុស្សស្លាប់ដល់៤៤នាក់ ក្នុងនោះ មានកុមារជាង២០នាក់ កាលពីថ្ងៃទី៧ វិច្ឆិកា៕
ចែករំលែកព័តមាននេះ