ម៉ោងសម្រាកនាំគ្នាជក់ថ្នាំញៀនក្នុងបន្ទប់ទឹក! ឃាត់ខ្លួនកម្មករ៥នាក់ជាមុខសញ្ញាប្រើប្រាស់ រក្សាទុក និងចែកចាយគ្រឿ.ង.ញៀ.ន
- កំពង់ស្ពឺ
ខេត្តកំពង់ស្ពឺ ៖ កម្មកររោងចក្រចំនួន៥នាក់ ជាមុខសញ្ញាប្រើប្រាស់រក្សាទុក និងចែកចាយគ្រឿងញៀនខុសច្បាប់ ត្រូវបានរដ្ឋបាលរោងចក្រសហការជាមួយសមត្ថកិច្ចនគរបាលស្រុកសំរោងទងធ្វើការឃាត់ខ្លួនបន្តបន្ទាប់ ខណៈដែលក្រុមកម្មកររោងចក្រធ្វើសកម្មភាពប្រើប្រាស់គ្រឿងញៀននៅក្នុងបន្ទប់ទឹកពេលសម្រាកពីការងារ ។
ការឃាត់ខ្លួនក្រុមកម្មករប្រើប្រាស់រក្សាទុក និងចែកចាយគ្រឿងញៀនខុសច្បាប់ បានធ្វើឡើង កាលពីវេលាម៉ោង១១និង៤០នាទីព្រឹកថ្ងៃទី១១ ខែកញ្ញា ឆ្នាំ២០២៦ ស្ថិតនៅក្នុងបន្ទប់ទឹករោងចក្រកាត់ដេរមួយកន្លែងភូមិក្រាំងលាវ ឃុំសំបូរ ស្រុកសំរោងទង ខេត្តកំពង់ស្ពឺ ។
នគរបាលស្រុកសំរោងទងបាននិយាយដឹងថា នៅមុនពេលឃាត់ខ្លួនក្រុមជនសង្ស័យខាងលើ គឺនៅវេលាម៉ោង១១ និង៤០នាទីថ្ងៃទី១១ ខែវិច្ឆិកា ឆ្នាំ២០២៦ កម្លាំងផ្នែកប្រឆាំងគ្រឿងញៀនស្រុកសំរោងទង សហការជាមួយរដ្ឋបាលរោងចក្រកាត់ដេរ យីហោ (លេសស្ទីល មេថលប្រដាក់ ខេមបូឌា ឯ.ក ) បានធ្វើការឃាត់មុខសញ្ញារក្សាទុកប្រើប្រាស់ និងចែកចាយដោយខុសច្បាប់នូវសារធាតុញៀនចំនួន៥នាក់ជាបន្តបន្ទាប់គ្នា នៅចំណុចកន្លែងបន្ទប់ទឹកនៃបរិវេណរោងចក្រ ភូមិក្រាំងលាវ ឃុំសំបូរ ស្រុកសំរោងទង ខេត្តកំពង់ស្ពឺ ។
នគរបាលស្រុកសំរោងទងបានបន្តឲ្យដឹងទៀតថា មុខសញ្ញាប្រើប្រាស់រក្សាទុក និងចែកចាយគ្រឿងញៀនខុសច្បាប់ត្រូវឃាត់ខ្លួន ទី១-ឈ្មោះ ប៉ិល សំណាង ភេទប្រុស អាយុ ២៨ឆ្នាំ មុខរបរកម្មកររោងចក្រ រស់នៅក្នុងភូមិត្រពាំងវែងទី២ ឃុំសំបូរ ស្រុកសំរោងទង ខេត្តកំពង់ស្ពឺ ។ ដកហូត៖ គ្រឿងញៀនចំនួន១ កញ្ចប់តូច,ទូរស័ព្ទ ដៃ១ គ្រឿង ។ ទី២-ឈ្មោះ សុន សុផាត ភេទប្រុស អាយុ៣៤ឆ្នាំ មុខរបរកម្មកររោងចក្រ ។ ដកហូត៖ គ្រឿងញៀនចំនួន១ កញ្ចប់តូច,ទូរស័ព្ទដៃ ២ គ្រឿង ។
ទី៣-ឈ្មោះ ខន កែវ ភេទ ប្រុស អាយុ៣២ឆ្នាំមុខរបរកម្មកររោងចក្រអ្នកទាំង២នាក់ រស់នៅក្នុងភូមិត្រពាំងសុភី ឃុំភ្នំតូច ស្រុកសាមគ្គីមុនីជ័យ ខេត្តកំពង់ស្ពឺ ។ ដកហូត៖ គ្រឿងញៀនចំនួន ១ កញ្ចប់តូច,ទូរស័ព្ទដៃ ១ គ្រឿង,ខ្សៀ ១ដើម ។ ទី៤-ឈ្មោះ ស្រស់ សៀកឡេង ភេទ ប្រុស អាយុ ២៨ឆ្នាំមុខរបរកម្មកររោងចក្រ រស់នៅក្នុងភូមិដំណាក់កកោះ ឃុំសំរោងលើ ស្រុកអង្គស្នួល ខេត្តកណ្តាល ។ ដកហូត៖ ខ្សៀចំនួន ១ ដើម,ទូរស័ព្ទដៃចំនួន ១ គ្រឿង ។
យោងតាមចម្លើយឈ្មោះ សុន សុផាត បានឆ្លើយថា គ្រឿងញៀននោះរូបគេបានទិញពីឈ្មោះ ធី កម្លាំងជំនាញបានបន្តឃាត់មុខសញ្ញាឈ្មោះ ជក់ ធី ភេទប្រុស អាយុ៣០ឆ្នាំមុខរបរកម្មកររោងចក្រ រស់នៅក្នុងភូមិវត្តភ្នំ ឃុំភ្នំតូច ស្រុកសាមគ្គីមុនីជ័យ ខេត្តកំពង់ស្ពឺ ។ក្រោយឃាត់ខ្លួន ដកហូត៖ ទូរស័ព្ទដៃចំនួន១គ្រឿង ។
នគរបាលស្រុកសំរោងទងបានបន្តឲ្យដឹងទៀតថាសរុប នគរបាលជំនាញបានឃាត់មុខសញ្ញា ចំនួន៥នាក់ និងដកហូតវត្ថុតាង -ម្សៅក្រាមពណ៌សថ្លាសង្ស័យជាគ្រឿងញៀនចំនួន ៣ កញ្ចប់តូច,ទូរស័ព្ទដៃចំនួន ៦ គ្រឿង, និងខ្សៀរ សម្រាប់ជក់គ្រឿងញៀនចំនួន២ ដើមផងដែរ។
នគរបាលស្រុកសំរោងទងបានបញ្ជាក់ដឹងថា ក្រោយឃាត់ខ្លួនក្រុមជនសង្ស័យរួមជាមួយនឹងវត្ថុតាងនគរបាលបានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ