ទីក្រុងមូស្គូ៖ នាវាដឹកប្រេងម៉ាស៊ូតរុស្ស៊ីប្រមាណ ៤ម៉ឺនតោន បានឈប់ស្ទើរតែមិនធ្វើដំណើរនៅមហាសមុទ្រអាត្លង់ទិកខាងជើង ខណៈកំពុងធ្វើដំណើរឆ្ពោះទៅឆ្នេរខាងកើតសហរដ្ឋអាម៉េរិក ហើយទិសដៅបន្ទាប់នៅមិនទាន់ច្បាស់នៅឡើយ។ នេះបើយោងតាមការចុះផ្សាយរបស់សារព័ត៌មាន Xinhua នៅថ្ងៃទី១១ ខែវិច្ឆិកា ឆ្នាំ២០២៦។

ក្រុមហ៊ុនវិភាគទីផ្សារអន្តរជាតិ Kpler បានឱ្យដឹងថា នាវា​នោះបានផ្ទុកប្រេងនៅកំពង់ផែ​របស់រុស្ស៊ី កាលពីថ្ងៃទី២៣ ខែតុលា ដោយដំបូងគ្រោងធ្វើដំណើរទៅទីក្រុងញូវយ៉ក និងមកដល់នៅថ្ងៃទី៧ ខែវិច្ឆិកា។ ប៉ុន្តែក្រោយមក ទិសដៅនៅលើប្រព័ន្ធកំណត់ទីតាំងនាវាត្រូវបានប្ដូរទៅជា «រង់ចាំការបញ្ជាទិញ» ហើយនាវាបានស្ទើរតែឈប់ធ្វើដំណើរចាប់តាំងពីថ្ងៃទី៩ ខែវិច្ឆិកា។

ក្រុមហ៊ុន Eastmed ដែលគ្រប់គ្រងនាវានោះបានបញ្ជាក់ថា នាវាកំពុងរង់ចាំការបញ្ជាទិញ ហើយទិសដៅមិនទាន់មានការផ្លាស់ប្ដូរទេ។ ចំណែកក្រុមហ៊ុនស៊ើបការណ៍ដែនសមុទ្រ Windward បានឱ្យដឹងថា ក្នុងចំណោមនាវាពីរគ្រឿងដែលខ្លួនវាយតម្លៃថាដឹកប្រេងម៉ាស៊ូតរុស្ស៊ីទៅអាម៉េរិក មានមួយគ្រឿងបានបត់ត្រឡប់ក្រោយ ខណៈប្រេងលើនាវាមួយគ្រឿងទៀតក៏អាចមិនមែនជាប្រេងម៉ាស៊ូតដែរ។

កាលពីថ្ងៃទី៩ ខែតុលា ក្រសួងរតនាគារអាម៉េរិកបានប្រកាសបន្ធូរបន្ថយទណ្ឌកម្មលើការជួញដូរប្រេងម៉ាស៊ូតរុស្ស៊ីក្នុងរយៈពេលប៉ុន្មានខែខាងមុខ ដើម្បីបង្កើនការផ្គត់ផ្គង់ក្នុងស្រុក និងទប់ស្កាត់ការឡើងថ្លៃប្រេងឥន្ធនៈ។ ទោះជាយ៉ាងណា ក្រុមហ៊ុន Windward បានលើកឡើងថា ប្រេងម៉ាស៊ូតរុស្ស៊ីអាចនឹងមិនមានការដឹកជញ្ជូនទៅដល់អាម៉េរិកឡើយ។

ផ្ទុយពីនេះ រដ្ឋមន្ត្រីថាមពលអាម៉េរិក ​បានបង្ហាញទំនុកចិត្តថា ប្រេងដែលកំពុងដឹកជញ្ជូននឹងអាចរកអ្នកទិញនៅទីផ្សារពិភពលោកបាន។ ទន្ទឹមនឹងនេះ ការនាំចូលប្រេងពីរុស្ស៊ីនៅតែប្រឈមនឹងបញ្ហាផ្លូវច្បាប់ និងបទប្បញ្ញត្តិ ដោយមានការព្រមានថា ក្រុមហ៊ុនដែលទទួលយកការដឹកជញ្ជូននេះអាចប្រឈមនឹងការរំលោភច្បាប់សហព័ន្ធ និងទណ្ឌកម្មផ្លូវច្បាប់៕