សហរដ្ឋអាមេរិកប្រាប់តៃវ៉ាន់ថា ខ្លួនមិនលក់​យន្ត​ហោះចម្បាំង​ F-16 ប៉ុន្តែមន្ត្រីនៃ​ប្រទេស​ទាំងពីរ​​និយាយ​ថា មិនទាន់មាន​សេចក្តី​សម្រេច​​នៅ​ឡើយទេ។ កោះតៃវ៉ាន់ស្នើ​ទិញយន្តហោះF-16C/Ds ពី​សហរដ្ឋអាមេរិកកាលពីឆ្នាំ២០០៧ ដែលជា​ម៉ាក​ថ្មី​អភិវឌ្ឍន៍ពីយន្តហោះ F-16A/Bs ​ជា​យន្ត​ហោះ​ដែលតៃវ៉ាន់កំពុងប្រើ។

ប៉ុន្តែគណៈប្រតិភូក្រសួងការពារជាតិអាមេរិក​បានធ្វើដំណើរទៅកាន់​ក្រុង​តៃប៉ិ កាលពី​សប្តាហ៍​​មុននិងប្រាប់អាជ្ញាធរក្នុងស្រុកថា រដ្ឋាភិ​បាល​ក្រុងវ៉ាស៊ីនតោនបានច្រានចោល​សំណើ​​នោះ​។ នេះ​បើតាមព័ត៌មាន​របស់​ទស្សនាវដ្តីការ​ពារ​ជាតិអាមេរិកចេញផ្សាយកាលពីថ្ងៃទី១៤ សីហា។

មន្ត្រីក្រសួងការពារ​ជាតិតៃវ៉ាន់និយាយថា យើងមានការ​ខកចិត្តជាមួយសហរដ្ឋអាមេរិក។ ចំណែក​អនុរដ្ឋមន្ត្រី​ការពារជាតិតៃ​វ៉ាន់ លោក​ Andrew Yang និយាយថា កោះតៃវ៉ាន​់​ខំ​ស្វែង​រកដំណោះ​ស្រាយ។ ​លោក​បន្តថា ពេល​នេះ​យើងបានទទួល​ពាក្យ​ពី​​សេចក្តីសម្រេច​របស់​សហរដ្ឋអាមេរិក។

ប្រទេសចិនបានបញ្ចេញប្រតិកម្មកាលពីខែកក្កដា ២០១០ ពេលលោកប្រធានាធិបតីអាមេ​រិក អូបាម៉ា ប្រកាសលក់អាវុធតំលៃ៦,៤​ពាន់​​លាន​​ដុល្លារឱ្យ​​កោះតៃវ៉ាន់ ក្នុងនោះមាន គ្រាប់មី​ស៊ីល ឧទ្ធម្ភាគ​ចក្រ Black Hawk និង​សំភារៈ​របស់យន្តហោះ F-16 ដែលតៃវ៉ាន​មាន​ស្រាប់ ​ប៉ុន្តែមិនបញ្ចូលនាវាមុជទឹក និងយន្ត​ហោះ​ថ្មី៕​