ប្រទេសកូរ៉េខាងជើង ៖ ប្រទេសកូរ៉េខាងជើងបានបង្កើនការសាកល្បងបណ្ដាមីស៊ីលដ្រូន និងគ្រាប់បែកបុក ដោយមេដឹកនាំប្រទេសនេះ លោកគីម ជុងអ៊ុន ចាត់ទុកការពង្រឹងកងទ័ពជើងទឹកថា ជាអាទិភាព។
ទីភ្នាក់ងារព័ត៌មានផ្លូវការណ៍កូរ៉េខាងជើង KCNA រាយការណ៍នាថ្ងៃទី១០ វិច្ឆិកា ថា ក្រុងព្យុងយ៉ាងមិនបញ្ឈប់ការបោះជំហានទៅមុខឆ្ពោះទៅពង្រីកកម្លាំងយោធារបស់ខ្លួនឡើយ ។ ក្នុងទិសដៅនេះ កូរ៉េខាងជើងបានធ្វើការសាកល្បងគ្រាប់បែកបុកថ្មី សម្រាប់យកទៅបំពាក់ឲ្យកងទ័ពជើងទឹករបស់ខ្លួន ចាប់ពីឆ្នាំ២០២៧ ទៅ ។ ក្រុងព្យុងយ៉ាងបានបង្ហាញរួចហើយ កាលពីពាក់កណ្ដាលខែតុលាគ្រាប់បែកបុកវាយប្រហារចំគោលដៅបំផុតដែលបំពាក់ដោយបញ្ញាសប្បនិមិ្មតAI ដើម្បីតម្រង់គោលដៅនិងចាប់រកគោលដៅ ។
ចំណែកការសាកល្បងគ្រាប់បែកបុកចុងមួយ កាលពីថ្ងៃទី៩ វិច្ឆិកា អាចត្រួតពិនិត្យប្រសិទ្ទិភាពក្នុងការប្រយុទ្ធរបស់ប្រព័ន្ធគ្រាប់បែកបុកថ្មីដែលលឿននោះ ។ តាមបណ្ដាសារព័ត៌មានកូរ៉េខាងជើងថា អាវុធនោះត្រូវបំពាក់ឲ្យកងម៉ារីនកូរ៉េខាងជើងចាប់ពីដើមឆ្នាំ២០២៧ទៅ ។
កូរ៉េខាងជើងរយៈពេលប៉ុន្មានសប្ដាហ៍ចុងក្រោយនេះ បានធ្វើការសាកល្បងជាបន្តបន្ទាប់ បណ្ដាមីស៊ីល ដ្រូនព្រមទាំងគ្រាប់បែកបុក។ លោកគីម ជុងអ៊ុន បានពង្រឹងកងកម្លាំងជើងទឹកកូរ៉េខាងជើងចាត់ទុកជាអាទិភាព ។ ក្រុងព្យុងយ៉ាងបានដាក់ឲ្យប្រើប្រាស់ជាពិសេសនាវាពិឃាតចំណុះ៥០០០តោន២គ្រឿង និងចង់ផលិតនាវាពិឃាតចំណុះ១០.០០០តោន ។
មេដឹកនាំកូរ៉េខាងជើងក៏អះអាងដែរកាលពីសប្ដាហ៍មុនថា ប្រទេសលោកកសាងនាវាមួយមានសមត្ថភាពប្រយុទ្ធខ្ពស់បំពាក់ជាពិសេសអាវុធនុយក្លេអ៊ែរ ដែលគ្មានប្រទេសណាមួយលើពិភពមាន ៕
ចែករំលែកព័តមាននេះ