បុរសម្នាក់បើករថយន្ត តាមរថយន្តសង្គ្រោះដឹកជីដូនទៅពេទ្យ ក៏ជ្រុលទៅបុ.កនិស្សិតជិះម៉ូតូស្លា.ប់
- ភ្នំពេញ
រាជធានីភ្នំពេញ ៖ បុរសម្នាក់បើករថយន្តFord RENGER បើកដេញតាមរថយន្តសង្គ្រោះដឹកជីដូនយកទៅព្យាបាលនៅមន្ទីរពេទ្យបានជ្រុលទៅបុកម៉ូតូនិស្សិតម្នាក់យ៉ាងពេញទំហឹង បណ្ដាលអោយជនរងគ្រោះជិះម៉ូតូស្លាប់នៅកន្លែងកើតហេតុ កាលពីវេលាម៉ោង៨និង៣០នាទីយប់ថ្ងៃទី១០ ខែ វិច្ឆិកា ឆ្នាំ ២០២៦ នៅចំណុចដៃទន្លេបរិវេណកោះនរា ភូមិកោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ ។
សមត្ថកិច្ចបានអោយដឹងថា ជនរងគ្រោះឈ្មោះ ផៃ សុផាន់រ៉ា ភេទប្រុស អាយុ២១ឆ្នាំ មុខរបរនិស្សិតឆ្នាំទី៣ ផ្នែកវិស្វករសំណង់ ស្នាក់នៅផ្ទះគ្មានលេខ ផ្លូវលំ ភូមិអំពិលលើ ឃុំអំពិល ស្រុកកំពង់សៀម ខេត្តកំពង់ចាម ។ ជនរងគ្រោះជិះម៉ូតូមួយគ្រឿអម៉ាកហុងដាWAVE ពណ៌ខ្មៅ ពាក់ស្លាកលេខ បាត់ដំបង ១AJ-១៨៥៧ ។
ចំណែកអ្នកបើកបររថយន្តបង្កឈ្មោះ ឈឿន វីត ភេទប្រុស អាយុ២៤ឆ្នាំ មុខរបរលក់ដូរ ស្នាក់នៅភូមិសំពៅលិច ឃុំភ្នំសំពៅ ស្រុកបាណន់ ខេត្តបាត់ដំបង ។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ ជនរងគ្រោះជិះម៉ូតូតាមផ្លូវបេតុងជាដៃទន្លេកោះនរាក្នុងទិសដៅពីត្បូងទៅជើង ចំណែកអ្នកបើកបររថយន្ត ម៉ាក Ford RENGER ពណ៍ខ្មៅ ពាក់ស្លាកលេខ បាត់ដំបង ២C-៧៤៩៩ បើកតាមផ្លូវបេតុងដៃទន្លេក្នុងទិសដៅពីជើងទៅត្បូង ក្នុងគោលបំណងបើកតាមរថយន្តសង្គ្រោះបន្ទាន់ពីខាងក្រោយដែលដឹកជីដូនពីខេត្តបាត់ដំបង មកមន្ទីរពេទ្យជោរៃ លុះមកដល់ចំណុចកើតហេតុខាងលើមានការដ្ឋានក៏បួងចង្កូតទៅខាងឆ្វេងដៃណាមួយបាំងរថយន្តសង្គ្រោះបន្ទាន់ មើលមិនឃើញម៉ូតូ ក៏ជ្រុលទៅបុកម៉ូតូដែលធ្វើដំណើរបញ្ច្រាសទិសដៅយ៉ាងពេញទំហឹង ដោយម៉ូតូកៀបជាប់ក្រោយរថយន្ត ចំណែកបុរសជិះម៉ូតូខ្ទាតបោកខឿនសួនច្បារបាក់ដៃជើងបែកក្បាលស្លាប់នៅកន្លែងកើតហេតុ ។ រីឯបុរសបើកបររថយន្តបង្កមិនបានរត់នោះទេ បានចុះពីលើរថយន្ត ហើយត្រូវបានប្រជាពលរដ្ឋជាអ្នកដំណើរឃាត់ខ្លួន និងទូរស័ព្ទប្ដឹងសមត្ថកិច្ចចរាចរណ៍ខណ្ឌច្បារអំពៅ មកដល់នាំខ្លួនបុរសជាអ្នកបើកបរថយន្តបង្កទៅផ្នែកជំនាញចរាចរណ៍ខណ្ឌ ។
ក្រោយកើតហេតុសមត្ថកិច្ចចរាចរណ៍ខណ្ឌច្បារអំពៅបានទំនាក់ទំនងទៅការិយាល័យចរាចរណ៍ផ្លូវគោស្នងការដ្ឋាននគរបាលរាជធានីភ្នំពេញដើម្បីធ្វើការវាស់វែងយកម៉ូតូនិងរថយន្តទៅរក្សាទុក ចំណែកសពបានប្រគល់អោយគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ