ទីក្រុងវ៉ាស៊ីនតោន៖ រដ្ឋមន្ត្រីការបរទេសអាមេរិក លោករ៉ូប៊ីអូ ថ្លែងថាលោកដូណាល់ត្រាំនៅតែសម្រេចចិត្តវាយប្រហារអុីរ៉ង់ទោះបីវាមិនមែនជាសង្គ្រាមដែលទទួលការគាំទ្រយ៉ាងណាក្ដី។ លោកធ្វើបែបនេះដើម្បីការពារពិភពលោកទប់ទល់នឹងមហិច្ឆតានុយក្លេអ៊ែររបស់អុីរ៉ង់។ លោកសូមមិនធ្វើអត្ថាធិប្បាយពាក់ព័ន្ធនឹងការទទួលបរាជ័យនៅក្នុងបោះឆ្នោតសភាកាលពីថ្ងៃអង្គារសប្ដាហ៍មុននោះទេ។ លទ្ធផលឆ្នោតបង្ហាញពីការរិះគន់ពីសំណាក់ប្រជាជនអាមេរិកាំងចំពោះលោកត្រាំ។
សង្គ្រាមដែលគ្មានប្រជាប្រិយភាពនាំឱ្យសាំងឡើងថ្លៃ និងជះឥទ្ធិពលអាក្រក់ចំពោះសេដ្ឋកិច្ច។ ហេតុនេះគណបក្សប្រជាធិបតេយ្យទទួលជ័យជម្នះដោយមិនបាច់ខំប្រឹង។ ចំពោះសំណួរពាក់ព័ន្ធនឹងការបង្ហោះសាររបស់អនុប្រធានាធិបតីអាមេរិក លោកជេឌីវេន កាលពីសប្ដាហ៍មុនដែលស្ដីបន្ទោសថាសង្គ្រាមនេះធ្វើឱ្យគណបក្សសាធារណរដ្ឋចាញ់ឆ្នោត លោករូប៊ីថ្លែងថាលោកត្រាំសម្លឹងឃើញថាពិតជាមានការគំរាមកំហែងដ៏ពិតប្រាកដពីសំណាក់ប្រទេសអុីរ៉ង់ ហេតុនេះលោកត្រូវតែទប់ស្កាត់ប្រទេសនេះមិនឱ្យបន្តកម្មវិធីនុយក្លេអ៊ែររបស់ខ្លួន។
លោកថ្លែងថាលោកត្រាំនៅតែចាត់ការបញ្ហានេះព្រោះវាជារឿងចាំបាច់ ថ្វីដ្បិតវាមិនមានប្រជាប្រិយភាពយ៉ាងណាក្ដី។ បទអត្ថាធិប្បាយរបស់លោករូប៊ីអូផ្ទុយគ្នាពីជំហររបស់លោកជេឌីវេន។ អ្នកទាំង២ត្រូវគេមើលឃើញថាអាចនឹងប្រកួតប្រជែងគ្នាយកតំណែងជាបេក្ខជនប្រធានាធិបតីរបស់គណបក្សសាធារណរដ្ឋសម្រាប់ការបោះឆ្នោតឆ្នាំ២០២៨។ លោកត្រាំថ្លែងថាការលើកឡើងរបស់លោកជេឌីវេនពិតជាត្រឹមត្រូវពាក់ព័ន្ធនឹងការជះឥទ្ធិពលអាក្រក់នៃសង្គ្រាមទៅលើការបោះឆ្នោត។ ប្រសិនបើលោកត្រូវធ្វើរឿងនេះម្ដងទៀត លោកត្រូវតែធ្វើ ព្រោះបើពួកគេ (អុីរ៉ង់) មានអាវុធនុយក្លេអ៊ែរ ពួកគេនឹងបំផ្លាញពិភពលោក។ ចំពោះសំណួរថាតើលោកនឹងធ្វើសង្គ្រាមសាជាថ្មីទេក្រោយពេលចប់ការបោះឆ្នោត? លោកត្រាំឆ្លើយតបថាលោកមិនចង់ធ្វើរឿងនេះទៀតទេ។ គ្មានមូលហេតុដែលត្រូវធ្វើសង្គ្រាមតទៅទៀតទេ។
នៅក្នុងស្ថានភាពដែលអាមេរិកមិនមានយុទ្ធសាស្ត្រច្បាស់លាស់ដើម្បីបិទបញ្ចប់សង្គ្រាម និងនៅពេលតំបន់មជ្ឈិមបូព៌ាអាចនឹងវិលទៅរកសង្គ្រាមទ្រង់ទ្រាយធំសាជាថ្មី ក្រុមប្រទេសអន្តរការីកំពុងខិតខំសម្របសម្រួលការចរចាគ្នា។ លោករូប៊ីអូថ្លែងថាយើងមិនទាន់រកឃើញដំណោះស្រាយនៅឡើយទេ។ លោកបញ្ជាក់ថាលោកត្រាំចង់បានដំណោះស្រាយផ្នែកការទូត។ ប៉ុន្តែរហូតមកដល់ពេលនេះ នយោបាយការទូតហាក់ដូចជាគ្មានជោគជ័យទាល់តែសោះព្រោះការទាមទាររបស់អុីរ៉ង់មិនត្រឹមតែមិនអាចទទួលយកបាននោះទេ ប៉ុន្តែចំណុចខ្លះគួឱ្យខឹងសម្បារ, ជាការមាក់ងាយ និងគ្មានភាពប្រាកដនិយមថែមទៀត៕ ប្រភព៖ AP
ចែករំលែកព័តមាននេះ