ខេត្តកណ្តាល ៖ រថយន្តឯកជនដឹកសិស្សសាលា បួងចង្កូតគេចម៉ូតូមួយទំហឹង ជ្រុលធ្លាក់ចូលស្រះទឹក បណ្តាលអោយក្មេងស្រី៥នាក់បាត់បង់ជីវិត និង ២១នាក់ទៀត រងរបួសធ្ងន់ស្រាល ។
គ្រោះថ្នាក់ចរាចរណ៍ដ៏គួរឱ្យរន្ធត់នេះបានកើតឡើងនៅវេលាម៉ោង០៧និង១០នាទីព្រឹក ថ្ងៃទី១០ ខែវិច្ឆិកា ឆ្នាំ២០២៦ នៅលើកំណាត់ផ្លូវជាតិលេខ៨ (ចន្លោះគីឡូម៉ែត្រ ២៨-២៩) ស្ថិតក្នុងភូមិអន្លង់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល ។
យោងតាមការបញ្ជាក់ពីសមត្ថកិច្ច មុនពេលកើតហេតុ មានរថយន្តទេសចរណ៍មួយគ្រឿង ម៉ាក MITSUBISHI ពណ៌ស ពាក់ស្លាកលេខ ភ្នំពេញ 3A-5603 បើកបរដោយឈ្មោះ ម៉ែន ធារិទ្ធ ភេទប្រុស អាយុ ៣១ឆ្នាំ (មានអាសយដ្ឋាននៅភូមិស្នាយពល ឃុំរកា ស្រុកពារាំង ខេត្តព្រៃវែង) ដោយមានដឹកសិស្សសាលាសរុបចំនួន ២៦នាក់ ធ្វើដំណើរក្នុងទិសដៅពីកើតទៅលិច ។ លុះមកដល់ចំណុចកើតហេតុ ស្រាប់តែមានម៉ូតូមួយគ្រឿង បើកបញ្ច្រាស់ទិសចរាចរណ៍ (ពីលិចទៅកើត) ហើយបានបត់ស្តាំឆ្លងផ្លូវទៅទិសត្បូង ។ ពេលនោះ អ្នកបើកបររថយន្តបានបើកគេចទៅខាងស្តាំដៃ រេចេញពីទ្រូងផ្លូវ ហើយក៏ជ្រុលធ្លាក់ចូលទៅក្នុងស្រះទឹក និងលិចរថយន្តតែម្តង ។
ករណីនេះបានបណ្តាលឱ្យសិស្សសាលា ដែលជិះក្នុងរថយន្ត (ប្រុស ១២នាក់ ស្រី ១៤នាក់) ទទួលរងគ្រោះថ្នាក់ដល់បាត់បង់ជីវិត ចំនួន ៥នាក់ (ភេទស្រីទាំងអស់) រួមមានឈ្មោះ សីហា សួស្តី (១៤ឆ្នាំ), ស្រៀង សុវត្តី (១៤ឆ្នាំ), ឡេង យូលី (១២ឆ្នាំ), លី ឆ័ង (១៣ឆ្នាំ) និងឈ្មោះ ឃាង ឈីងឈីង។ រងរបួសស្រាល ចំនួន ២១នាក់ (ស្រី ៩នាក់) ។
ភ្លាមៗ កម្លាំងជំនាញចរាចរណ៍ស្រុក សហការជាមួយកម្លាំងប៉ុស្តិ៍នគរបាលរដ្ឋបាលព្រែកតាមាក់ បានចុះទៅដល់ទីតាំងកើតហេតុ ដើម្បីអន្តរាគមន៍ជួយសង្គ្រោះជនរងគ្រោះ ពិនិត្យ វាស់វែង និងដកហូតវត្ថុតាងទៅរក្សាទុកនៅអធិការដ្ឋាននគរបាលស្រុក ។ ក្នុងនោះសមត្ថកិច្ចបានឃាត់ខ្លួនអ្នកបើកបររថយន្ត យកមកសួរនាំ និងធ្វើតេស្តស្វែងរកសារធាតុញៀន និងជាតិអាល់កុល ដែលជាលទ្ធផលបង្ហាញថា អវិជ្ជមាន លើសារធាតុញៀន និងគ្មានជាតិអាល់កុល ។
ក្រោយកើតហេតុ អ្នកបើកបរ ត្រូវបានឃាត់ខ្លួននៅអធិការដ្ឋាននគរបាលស្រុកខ្សាច់កណ្តាល ដើម្បីកសាងសំណុំរឿងបន្តតាមនីតិវិធីច្បាប់ ៕
ចែករំលែកព័តមាននេះ