រាជធានីភ្នំពេញ ៖ លោក ឃួង ស្រេង បានណែនាំឱ្យអាជ្ញាធរសង្កាត់ទាំង៥ នៅខណ្ឌព្រែកព្នៅ ពង្រឹងធ្វើយ៉ាងណាអនុវត្តឱ្យបាននូវគោលនយោបាយ ភូមិ ឃុំ សង្កាត់មានសុវត្ថិភាព ថែរក្សាផ្លូវ លូ និងបន្តផ្តល់សេវា ជូនប្រជាពលរដ្ឋឱ្យកាន់តែល្អបន្ថែមទៀត ដើម្បីឱ្យប្រជាពលរដ្ឋមានជំនឿទុកចិត្ត បោះឆ្នោតជូនគណបក្សប្រជាជនកម្ពុជា នៅក្នុងការបោះឆ្នោត ២០២៧-២០២៨ ខាងមុខនេះ ។
ការណែនាំរបស់លោក ឃួង ស្រេង សមាជិកគណៈកម្មាធិការកណ្តាល គណបក្សប្រជាជនកម្ពុជា, ប្រធានគណៈកម្មាធិការគណបក្សរាជធានីភ្នំពេញ និងជាប្រធានក្រុមការងារចុះមូលដ្ឋានខណ្ឌព្រែកព្នៅ ខាងលើនេះ ធ្វើឡើងនាព្រឹកថ្ងៃអាទិត្យទី៨ ខែវិច្ឆិកា ឆ្នាំ២០២៦ ក្នុងកិច្ចប្រជុំប្រចាំខែ ក្រុមការងារចុះជួយខណ្ឌ-សង្កាត់ និងពិធីសំណេះសំណាល ជាមួយសមាជិកគណបក្ស សង្កាត់ទាំង៥ ក្នុងខណ្ឌព្រែកព្នៅ នៅទីស្នាក់ការគណបក្សប្រជាជនកម្ពុជា ខណ្ឌព្រែកព្នៅ ។
ក្នុងឱកាសនោះ លោក ឃួ ង ស្រេង បានមានប្រសាសន៍ថា អាជ្ញាធរសង្កាត់ទាំង៥ ត្រូវអនុវត្តឱ្យបានគោលនយោបាយភូមិ សង្កាត់មានសុវត្ថិភាព ពិសេសគឺការបង្ក្រាបក្មេងទំនើង ជាមួយនិងការជួយថែរក្សាសមិទ្ធផលនានានៅក្នុងមូលដ្ឋាន ដូចជាថែរក្សាផ្លូវ លូជាដើម ពោលគឺកុំឱ្យរថយន្តដឹកធ្ងន់លើសការកំណត់ និងទប់ស្កាត់ការដឹកខ្សាច់ នាំឱ្យហូរចូលលូ។ ត្រូវបន្តផ្តល់សេវាសាធារណៈជូនប្រជាពលរដ្ឋឱ្យកាន់តែល្អបន្ថែមទៀត។ ត្រូវទទួលរាល់សំណើនិងសំណូមពរពីប្រជាពលរដ្ឋ ពួកគាត់មានការខ្វះខាតអ្វីត្រូវជួយពួកគាត់ ក្នុងនាមយើងជាអាណាព្យាបាលពួកគាត់ ។
លោក ឃួង ស្រេង បានបន្តថា សមាជិក សមាជិកាបក្ស ជាឃោសនិកដ៏ឧត្ថុងឧត្ដមរបស់គណបក្សប្រជាជនកម្ពុជា ដូច្នេះត្រូវយកគោលនយោបាយរបស់បក្ស និងអំពើល្អៗរបស់មេដឹកនាំបក្សទៅផ្សព្វផ្សាយឱ្យប្រជាពលរដ្ឋបានយល់ជ្រួតជ្រាបកាន់តែច្បាស់ ត្រូវស៊ូ មតិឱ្យបានខ្លាំងក្លាជាមួយបក្សប្រឆាំង និងសូមឱ្យសមាជិក សមាជិកា គណបក្សប្រជាជនកម្ពុជាម្នាក់ ក្លាយជាសន្លឹកឆ្នោតមួយសន្លឹកនៅថ្ងៃបោះឆ្នោត ។
លោក ឃួង ស្រេង បានបន្តទៀតថា យើងជឿទុកចិត្តលើការដឹកនាំរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្ដេចធិបតីហ៊ុន ម៉ាណែត នាយករដ្ឋមន្ត្រី។ សម្តេចទាំងទ្វេបានប្តេជ្ញាចិត្តយ៉ាងដាច់ខាតក្នុងកិច្ចការពារបូរណៈភាពទឹកដី មិនឱ្យបាត់បង់ទាំងព្រំដែនទឹក និងគោក។ ដូច្នេះយើងត្រូវយកអ្វីៗទាំងនេះទៅផ្សព្វផ្សាយឱ្យប្រជាពលរដ្ឋបានយល់ជ្រួតជ្រាបកាន់តែច្បាស់ពេញចិត្តពេញថ្លើម បន្តគាំទ្រគណបក្សប្រជាជនកម្ពុជាកាន់តែច្រើនថែមទៀត ដើម្បីឈានឆ្ពោះទៅយកជ័យជម្នះក្នុងការឈ្នះឆ្នោតនៅឆ្នាំ២០២៧ និងឆ្នាំ២០២៨ ៕
ចែករំលែកព័តមាននេះ