ADផ្ទាំងផ្សព្វផ្សាយពាណិជ្ជកម្ម

Picture

លួច​កាត់​ខ្សែរ​ភ្លើង​ក្នុង​ចម្ការ​ដូង ម្ចាស់​ទាន់ ប្តឹង​ឱ្យ​នគរបាល​ស្រុក​ប​សេដ្ឋ​ឃាត់ខ្លួន

2 អាទិត្យ មុន
  • កំពង់ស្ពឺ

ខេត្តកំពង់ស្ពឺ ៖ ជនសង្ស័យ​ម្នាក់​ត្រូវ​បាន​កម្លាំង​នគរបាល​ស្រុក​ប​សេដ្ឋ ធ្វើការ​ឃាត់ខ្លួន​តាម​បណ្ដឹង​របស់​ម្ចាស់​ចម្ការ ខណៈ​ដែល​ជនសង្ស័យ​បាន​ធ្វើ​សកម្មភាព​លួច​កាត់​ខ្សែភ្លើង​បាន​សម្រេច ហើយ​ម្ចាស់​ឃើញ​ទាន់​ស្រែក​ផ្អើល​ឆោឡោ ។ ការ​ឃាត់ខ្លួន​ជន​សង្ស័យ​លួច​កាត់​ខ្សែភ្លើង​របស់​ប្រជាពលរដ្ឋ​បាន​ធ្វើ​ឡើង កាលពី​វេលា​ម៉ោង​៣ និង​៣០​នាទី​រសៀល​ថ្ងៃ​ទី​៥ ខែវិច្ឆិកា ឆ្នាំ​២០២៦ នៅ​ចំណុច​ក្នុង​ចំការ​ដូង ស្ថិត​ក្នុងភូមិ​ក្រសាំង​តា​គង់ ឃុំ​និទាន ស្រុក​ប​សេដ្ឋ ខេត្តកំពង់ស្ពឺ ។

នគរបាល​ស្រុក​ប​សេដ្ឋ​បាន​និយាយ​ឱ្យ​ដឹង​ថា ជនសង្ស័យ​ដែល​ឃាត់ខ្លួន ឈ្មោះ ចាន់ រ៉ា​ម៉េ​ត ភេទ​ប្រុស អាយុ​២៩​ឆ្នាំ មុខរបរ​មិន​ពិតប្រាកដ បច្ចុប្បន្ន ស្នាក់​នៅ​ភូមិ​ម្កាក់ ឃុំ​ស្រង់ ស្រុក​គងពិសី ខេត្តកំពង់ស្ពឺ ។

នគរបាល​ស្រុក​ប​សេដ្ឋ​បាន​និយាយ​បន្ត​ទៀត​ថា នៅ​មុន​ពេល​ឃាត់ខ្លួន​ជនសង្ស័យ គឺ​នគរបាល​បាន​ទទួល​ពាក្យបណ្តឹង​របស់​ប្រជាពលរដ្ឋ​ថា មាន​ជនសង្ស័យ​មិន​ស្គាល់​អត្តសញ្ញាណ​ម្នាក់​ជិះ​ម៉ូតូ​ម៉ាក​អ៊ិ​ច​សិន​ឌ័​រ ពណ៌​ស​-​ក្រហម ពាក់​ផ្លា​ក​លេខ​កំពង់ស្ពឺ 1B- 3738 បាន​ធ្វើ​សកម្មភាព​ចូល​ក្នុង​របងចម្ការ​របស់​ជន​រង​គ្រោះ​ឈ្មោះ ឃុន សុផល ភេទ​ប្រុស អាយុ​៥៥​ឆ្នាំ រស់នៅ​ភូមិ​-​ឃុំ​ខាងលើ ខណៈ​ពេល​ជនសង្ស័យ​កំពុង​ធ្វើ​សកម្មភាព​លួច​កាត់​ខ្សែភ្លើង​ដាច់​ប្រវែង​ប្រហែល​១០០​ម៉ែត្រ ស្រប​ពេល​ជន​រង​គ្រោះ​ឈ្មោះ (​ឃុន សុផល​) ដើរមក​ចម្ការ​ឃើញ​បាន​រាយការណ៍​មក​សមត្ថកិច្ច​តែ​ម្តង ។

នគរបាល​ស្រុក​ប​សេដ្ឋ​បាន​បន្ត​ឲ្យ​ដឹង​ទៀត​ថា ក្រោយ​ពី​ទទួល​បណ្តឹង​ពី​ជន​រង​គ្រោះ(​ឃុន សុផល​) កំលាំង​ប៉ុស្តិ៍​នគរបាល​រដ្ឋបាល​ឃុំ​និទាន បាន​ចេញ​ធ្វើការ​ល្បាត ក៏​ដេញ​ស្ទាក់​ឃាត់​ជនសង្ស័យ​បាន​តែ​ម្តង រួម​ជាមួយ​វត្ថុ​តាង​ដកហូត​រួម​មាន​៖
១-​ម៉ូតូ​១​គ្រឿង​ម៉ាក​អ៊ិ​ច​សិន​ឌ័​រ ពណ៌​ស លាយ​ក្រហម​ពាក់​ផ្លា​ក​លេខ កំពង់ស្ពឺ​1B-3738
២- កន្ត្រៃ​កាត់​ខ្សែភ្លើង​ចំនួន​១​ដើម
៣- ដែក​កាប់​ចំនួន​២​ដើម
៤- កន្ត្រៃ​ចំនួន​១​ដើម
៥- ស្រោមដៃ​ចំនួន​១​គូរ
៦- កា​រ៉ុ​ង​ចំនួន​២​ផង​ដែរ​។

នគរបាល​ស្រុក​ប​សេដ្ឋ​បាន​បញ្ជាក់​ដឹង​ថា សម្ភារ​ខ្សែភ្លើង​បាន​ប្រគល់​ឲ្យ​ម្ចាស់​វិញ​ហើយ ​។ ក្រោយ​ឃាត់ខ្លួន​ជនសង្ស័យ រួម​ជាមួយនឹង​វត្ថុ​តាង​នគរបាល​បាន​កសាង​សំណុំរឿង​បញ្ជូន​ទៅ​សំណង់​ការដ្ឋាន​នគរបាល​ខេត្តកំពង់ស្ពឺ ដើម្បី​ចាត់ការ​បន្ត​តាម​ផ្លូវច្បាប់ ៕