ទីក្រុងតេអេរ៉ង់៖ ប្រទេសអុីរ៉ង់បានបញ្ជូនសំណើស្ដីពីការចរចាគ្នាជាមួយអាមេរិកដើម្បីដោះស្រាយបញ្ហានុយក្លេអ៊ែរទៅឱ្យអាមេរិកពិនិត្យមើលរួចហើយកាលពីពេលថ្មីៗនេះតាមរយៈប្រទេសកាតាដែលជាអន្តរការី។ ប៉ុន្តែសំណើនេះអាចយកមកតថ្លៃគ្នាបានលុះត្រាតែអាមេរិកយល់ព្រមទទួលយកលក្ខខណ្ឌទាមទាររបស់អុីរ៉ង់ចំនួន៧ចំណុចជាមុនសិន។ មន្ត្រីរដ្ឋាភិបាលអុីរ៉ង់ម្នាក់ដែលស្នើសុំមិនបញ្ចេញឈ្មោះបានបង្ហើបប្រាប់អ្នកសារព័ត៌មានថាអាមេរិកចាប់ផ្ដើមពិនិត្យមើលសំណើនោះជាបណ្ដើរៗហើយ។ ប៉ុន្តែមិនបានផ្ដល់ប្រទក្សកម្ម (មតិត្រឡប់) ទៅវិញនៅឡើយទេ។
ក្រុមអ្នកសម្របសម្រួលការចរចា (ឬអាចនិយាយបានថាក្រុមអ្នករត់ការ) បាន និងកំពុងពន្លឿនកិច្ចខិតខំប្រឹងប្រែងរបស់ខ្លួនដើម្បីធ្វើយ៉ាងណាព្យាយាមបញ្ចប់សង្គ្រាមរវាងអុីរ៉ង់ និងអាមេរិកឱ្យបានឆាប់តាមដែលអាចធ្វើទៅបាន។ ពួកគេបារម្ភថាក្រោយពេលបោះឆ្នោតពាក់កណ្ដាលអាណត្តិនៅអាមេរិកដែលទើបតែកន្លងផុតទៅថ្មីៗនេះ សង្គ្រាមអាចនឹងផ្ទុះឡើងវិញនៅក្នុងទ្រង់ទ្រាយធំដូចកាលពីពេលចាប់ផ្ដើមវាយប្រហារថ្មីៗ។ បញ្ហានេះមិនអាចមើលស្រាលបានទេព្រោះលោកត្រាំទើបតែនិយាយកាលពីពេលថ្មីៗនេះថាលោកមិនបោះបង់ចោលទេនូវលទ្ធភាពនៃការផ្ទុះអាវុធជាថ្មី។ ចំណែកអុីរ៉ង់ក៏ឆ្លើយតបទៅវិញថាខ្លួនក៏មិននៅស្ងៀមដែរ, ខ្លួននឹងចាត់វិធានការឆ្លើយតបនៅក្នុងទ្រង់ទ្រាយធំដូចគ្នា។
មន្ត្រីកំពូលអុីរ៉ង់ទទួលបន្ទុកផ្នែកកិច្ចការសន្តិសុខជាតិ លោកម៉ូសេន រ៉េហ្សាអេ (Mohsen Rezaei) ថ្លែងនៅពេលបំពេញទស្សនកិច្ចនៅប្រទេសរុស្ស៊ីថា «នៅលើសមរភូមិការទូត យើងប្រកាសដាក់ចេញលក្ខខណ្ឌ៧ចំណុចដើម្បីឱ្យពួកអាមេរិកាំងយកទៅពិចារណា។ ដរាបណាពួកគេមិនទទួលយល់ព្រមធ្វើតាមការទាមទាររបស់យើងគ្រប់ចំណុចទេ យើងនឹងមិនបើកច្រកសមុទ្រហ័រមូស ហើយក៏មិនចូលតុចរចាជាដាច់ខាត»។ អុីរ៉ង់ទាមទារឱ្យអាមេរិកលុបចោលទណ្ឌកម្មសេដ្ឋកិច្ច, អនុញ្ញាតឱ្យប្រើប្រាស់ទ្រព្យសម្បត្តិដែលបានបង្កកទុក និងផ្ដល់ប្រាក់សំណងសម្រាប់ប៉ះប៉ូវការខូចខាតរបស់អុីរ៉ង់ដោយសារការវាយប្រហាររបស់អាមេរិក។
សង្គ្រាមមិនត្រឹមតែកើតឡើងនៅអុីរ៉ង់ប៉ុណ្ណោះទេ ប៉ុន្តែបានរីករាលដាលដល់ប្រទេសលីបង់, យេម៉េន និងអារ៉ាប៊ីសាអូឌីតថែមទៀត។ ដោយសារសង្គ្រាមនេះ គណបក្សសាធារណរដ្ឋទទួលបរាជ័យយ៉ាងធ្ងន់ធ្ងរនៅក្នុងការបោះឆ្នោតសភា។ ពលរដ្ឋអាមេរិកាំងមានចិត្តខឹងសម្បារនឹងប្រេងឡើងថ្លៃ, ការចំណាយលើជីវិតរស់នៅប្រចាំថ្ងៃកាន់តែច្រើនឡើងៗ ហើយសេដ្ឋកិច្ចពិភពលោកក៏រង្គោះរង្គើថែមទៀត។ រដ្ឋមន្ត្រីការពារជាតិអាមេរិកដែលជាអ្នកផ្ដល់ផ្ដល់យោបល់ឱ្យលោកត្រាំវាយប្រហារអុីរ៉ង់នោះក៏ប្រឈមនឹងការបោះឆ្នោតដកតំណែងនាពេលខាងមុខនេះផងដែរ។ លើកនេះ ទាំងសមាជិកសភាខង់ហ្ក្រែសរបស់គណបក្សប្រជាធិបតេយ្យ និងគណបក្សសាធារណរដ្ឋអាចនឹងបោះឆ្នោតគាំទ្រសេចក្ដីស្នើច្បាប់ដកតំណែងរបស់លោក៕ ប្រភព៖ Reuters
ចែករំលែកព័តមាននេះ