ក្រុមអ្នកក្លាហានឆ្លងខេត្ត តាមរកសងសឹកគូសត្រូវ តែត្រូវសមត្ថកិច្ចស្រុកថ្មគោលស្ទាក់ក្របួចបាន០២នាក់ រត់រួច០៦នាក់
- បាត់ដំបង
ខេត្តបាត់ដំបង ៖ មានទាំងកាំបិតវែង ខ្លី ស្ទើរគ្រប់ក្នុងដៃផង ក្រុមអ្នកក្លាហានឆ្លងខេត្តចំនួន០៩នាក់ ជិះម៉ូតូទាំងហ្វូងចេញពីស្រុកមង្គលបុរី ខេត្តបន្ទាយមានជ័យ ឆ្ពោះមកកាន់ទឹកដីខេត្តបាត់ដំបង ក្នុងគោលបំណងតាមរកគូសត្រូវរបស់ខ្លួន ដើម្បីប្រយុទ្ធស្លាប់រស់ សងសឹកគំនុំចាស់ តែមិនទាន់ជួបគូសត្រូវផង ក៏ត្រូវកម្លាំងសមត្ថកិច្ចស្រុកថ្មគោល តាមស្ទាក់ប្របួច.កជាប់ចំនួន០២នាក់ ខណៈចំនួន០៦នាក់ទៀតជិះម៉ូតូរត់គេចបាត់ កាលពី១២និង៤០នាទីរំលងអធ្រាត្រ ឈានចូលថ្ងៃទី០៥ វិច្ឆិកា នៅលើដងផ្លូវជាតិលេខ៥ ត្រង់ចំណុចទឹកដូ ឃុំជ្រោយស្ដៅ ស្រុកថ្មគោល ។

តាមរយៈរបាយការណ៏ អធិការស្រុកថ្មគោល លោក សេង លុច បានឲ្យដឹងថា ការប៉ុនប៉ងបង្កហិង្សា រវាងពួកក្មេងអន្ធពាលទាំង០២ក្រុមនេះ ត្រូវបានកម្លាំងរបស់លោកទទួលបានព័ត៌មានជាមុន ទើបឈានដល់ការចុះអន្តរាគមន៍ទប់ស្កាត់បានមុនពេលពួកគេបង្ហូរឈាមគ្នា ។
លោកថា ពួកជនពាលទាំង០២ក្រុមនេះ គឺមួយក្រុមមានបក្សពួកចំនួន០៩នាក់ ជិះម៉ូតូមកពីស្រុកមង្គលបុរី ខេត្តន្ទាយមានជ័យ រីឯមួយក្រុមទៀត អាចជាអ្នកស្រុកថ្មគោល តែយើងមិនទាន់ដឹង ឬបានស្គាល់សមាសភាក្រុមនេះនៅឡើយទេ ។ ប៉ុន្តែខាងក្រុមអ្នកស្រុកមង្គលបុរីបាននាំគ្នាជិះមកកាន់ស្រុកថ្មគោល ក្នុងគោលបំណងតាមសងសឹកលើគូសត្រូវរបស់ពួកគេ ។ នេះបើយោងលើព័ត៌មានដែលមន្ត្រីរបស់លោកទទួលបានពីដំបូង ។

លោក សេង លុច បាននិយាយថា ក្រោយពីទទូលបានដំណឹងថា មានក្រុមក្មេងទំនើងចំនួន០៩នាក់ ជិះម៉ូតូ០៤គ្រឿង ប្រដាប់ដោយកាំបិតវែង ខ្លី ស្ទើរគ្រប់ដៃ ចេញមកពីស្រុកមង្គលបុរី ឆ្ពោះមកកាន់ទឹកដី ស្រុកថ្មគោល ក្នុងគោលដៅបង្កហិង្សាជាមួយភាគីម្ខាងទៀត នៅស្រុកថ្មគោល ទើបលោកបញ្ជាឲ្យកម្លាំងគ្រប់បណ្ដាប៉ុស្ដិ៍រដ្ឋបាលទាំងអស់ជាប់ផ្លូវជាតិលេខ៥ចេញអន្តរាគមន៍តាមឃ្លាំមើលរហូតស្ទាក់ជាប់នៅក្នុងទឹកដី ឃុំជ្រោយស្ដៅតែម្ដងពេលដែលពួកគេកំពុងជិះម៉ូតូអូសកាំបិតបែកផ្កាភ្លើងទាំងហ្វូងតាមរកគូសត្រូវ ដើម្បីសងសឹក ។
បើតាមរបាយការណ៍ព្រឹត្តហេតុរបស់សមត្ថកិច្ច ពេលដែលកម្លាំងអន្តរាគមន៍ស្ទាក់ជាប់នៅលើដងផ្លូវជាតិលេខ៥ ក្រុមជនអន្ធពាលទាំងនេះបានទាញកាំបិតប៉ុនប៉ងច្បាំងតទល់ជាមួយកម្លាំងសមត្ថកិច្ចទៀតផង ខណៈជនមួយចំនួនបានព្យាយាមជិះគេចខ្លួនទៅកាន់ស្រុកមង្គលបុរីវិញ ។

ប៉ុន្តែមានជនពាល០២នាក់ ដែលក្លាហានរវល់ចង់តទល់ជាមួយសមត្ថកិច្ច ទើបត្រូវសមត្ថកិច្ចក្ករបួច.កជាប់ទាំង០២នាក់ រីឯមេខ្លោងពួកគេ និងបក្សពួកប្រមាណ០៦នាក់ បានជិះគេចខ្លួនបាត់ ។
របាយការណ៍ដដែលបានបង្ហាញអត្តសញ្ញាណជនអន្ធពាលទាំង០២នាក់នោះ គឺម្នាក់ឈ្មោះ ឆូក ទីប៉ ភេទប្រុស អាយុ១៧ឆ្នាំ នៅភូមិដីកោះ ឃុំបន្ទាយនាង ស្រុកមង្គលបុរី និង ឈ្មោះ ឡាញ់ ថិនសិរី ហៅធីដូ ភេទប្រុស អាយុ១៧ឆ្នាំ នៅភូមិព្រែកសំរោង ឃុំរហាត់ទឹក ស្រុកមង្គលបុរី ។

ជាមួយនឹងការឃាត់ខ្លួនជនអន្ធពាលទាំង០២នាក់ សមត្ថកិច្ចដកហូតបានវត្ថុតាងកាំបិតវែងមួយដើម (កាំបិតគូនអ៊ី) និងម៉ូតូមួយគ្រឿងគ្មានស្លាកលេខ ។ នៅចំពោះមុខសមត្ថកិច្ច ជនអន្ធពាលទាំង០២នាក់បានសារភាពថា ពួកគេទាំងអស់គ្នាបានលើកគ្នាមកកាន់ទឹកដីស្រុកថ្មគោលទាំងកណ្ដាលអធ្រាត្រនេះ ពិតជាមានចេតនាមកតាមសងសឹកគូសត្រូវមែន។ ប៉ុន្តែជន០២នាក់នេះបានប្រាប់ថា ពួកខ្លួនទាំង០២នាក់ ហាក់មិនទាន់ស្គាល់មុខគូសត្រូវនៅស្រុកថ្មគោល តើជាអ្នកណា? ឈ្មោះអ្វី? នៅម្ដុំណានៅឡើយទេ? ព្រោះមេខ្លោងដែលនាំពួកខ្លួនមករកសងសឹកបានជិះម៉ូតូរត់រួចខ្លួនបាត់ហើយ នៅសល់តែពួកខ្លួន០២នាក់ដែលមិនដឹងអ្វី ។
លោក សេង លុច អធិការស្រុកថ្មគោលក៏បានបញ្ជាក់ដែរថា បើតាមចម្លើយសារភាពរបស់ជនទាំង០២នាក់នេះ ពិតជាមិនបានស្គាល់គូសត្រូវខ្លួនមែន ។ ពួកគេមកតាមបក្សពួកប៉ុន្តែពួកគេក្លាហានណាស់ មានចរិតកាចសាហាវ ជិះម៉ូតូអូសកាំបិតពេញដងផ្លូវ និងប៉ុនប៉ងតទល់ជាមួយកម្លាំងសមត្ថកិច្ចថែមទៀងផង ។
យ៉ាងណា ពេលនេះ មន្ត្រីជំនាញរបស់លោកបានបញ្ជូនជនទំនើងទាំង០២នាក់ទៅប្រគល់ជូនការិយាល័យជំនាញចាត់ការបន្តហើយ ដោយយោងតាមបទបញ្ជារបស់លោកស្នងការខេត្ត ៕
ចែករំលែកព័តមាននេះ