អ្នកដាក់បង្កៃត្រីប្រទះឃើញស.ពបុរសម្នាក់ក្នុងទឹកថ្លុកជម្រៅត្រឹមជង្គង់
- ភ្នំពេញ
រាជធានីភ្នំពេញ៖ ប្រជាកសិករម្នាក់ទៅមើលបង្កៃដែលគាត់ដាក់ដើម្បីយកត្រីធ្វើម្ហូប ស្រាប់តែប្រទះឃើញសាកសពបុរសម្នាក់ដេកស្លាប់ផ្កាប់មុខនៅក្នុងស្មៅក្នុងទឹកថ្លុកលើដីវាលមួយកន្លែង ក្នុងស្ថានភាពហើមស្អុយទៅហើយ ។ បន្ទាប់មកគាត់ក៏បានរត់ទៅប្រាប់អ្នកភូមិបង្កឲ្យមានការភ្ញាក់ផ្អើលទាំងព្រឹក បន្ទាប់មកបានរាយការណ៍ជូនសមត្ថកិច្ចឲ្យចុះទៅពិនិត្យកោសល្យវិច័យ ។
ហេតុការណ៍នោះបានកើតឡើង កាលពីវេលាម៉ោង៧ និង១៥នាទីព្រឹកថ្ងៃទី០៦ ខែវិច្ឆិកា ឆ្នាំ២០២៦ នៅចំណុចដីវាល ស្ថិតនៅក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
សាកសពបុរសខាងលើមិនត្រូវបានស្គាល់អត្តសញ្ញាណនោះទេ បើតាមការប៉ាន់ស្មានមានអាយុប្រមាណជាង៣០ឆ្នាំប៉ុណ្ណោះ ហើយពុំទាន់ដឹងថាជាជនអនាថា ឬបែបណានោះទេ ។ កន្លងមកអ្នកភូមិក៏ធ្លាប់បានឃើញបុរសនេះដើរតាមផ្លូវក្នុងភូមិញឹកញាប់ដែរ ប៉ុន្តែគ្មាននរណាបានចាប់អារម្មណ៍ថាគាត់រស់នៅទីណាកន្លែងណានោះឡើយ ។
ស្ត្រីម្នាក់ដែលជាអ្នករស់នៅក្នុងភូមិជង្រុកនោះបាននិយាយថា នៅកន្លែងកើតហេតុខាងលើ គឺជាថ្លុកដែលមានទឹកដក់ជាប់រហូតទាំងក្នុងរដូវប្រាំង និងរដូវវស្សា ប៉ុន្តែទឹកមិនជ្រៅនោះទេ គឺមានទឹកជម្រៅត្រឹមជង្គង់ប៉ុណ្ណោះ និងមានត្រីផងដែរ ។ នៅមុនពេលកើតហេតុ មានអ្នកភូមិម្នាក់ទៅមើលបង្កៃដែលគាត់បានដាក់យកត្រីកាលពីវេលាយប់ថ្ងៃទី០៥ ខែវិច្ឆិកា ដើម្បីយកត្រីធ្វើម្ហូប លុះពេលទៅដល់ ស្រាប់តែឃើញសាកសពបុរសខាងលើដេកស្លាប់ផ្កាប់មុខក្នុងស្ថានភាពហើមស្អុយបាត់ទៅហើយ ។
តាមប្រភពដដែលបានប្រាប់ឲ្យដឹងបន្តទៀតថា ពេលនោះអ្នកដាក់បង្កៃត្រីខាងលើបានរត់ទៅប្រាប់អ្នកភូមិជាមួយគ្នាបង្កឲ្យមានការភ្ញាក់ផ្អើលនាំគ្នាទៅចោមរោមមើល ប៉ុន្តែពុំមាននរណាបានស្គាល់អ្នកស្លាប់នោះឡើយ ។ ដោយគ្រាន់តែកន្លងមកមានអ្នកខ្លះធ្លាប់បានឃើញបុរសរងគ្រោះរូបនោះដើរកាត់ភូមិប៉ុណ្ណោះ បន្ទាប់មកក៏បានរាយការណ៍ប្រាប់នគរបាលប៉ុស្តិ៍ត្រពាំងក្រសាំងឲ្យចុះទៅពិនិត្យមើល ។
ក្រោយពេលចុះទៅដល់ទីតាំងកើតហេតុ កម្លាំងប៉ុស្តិ៍នគរបាលរដ្ឋបាលត្រពាំងក្រសាំង ក៏បានរាយការបន្តទៅកាន់នគរបាលការិយាល័យបច្ចេកទេសនិងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ ។ ដើម្បីចុះទៅធ្វើកោសល្យវិច័យរកមូលហេតុនៃការស្លាប់នោះ ព្រមទាំងធ្វើការស្រាវជ្រាវរកសាច់ញាតិទៅទទួលយកសពធ្វើបុណ្យតាមប្រពៃណី ៕





ចែករំលែកព័តមាននេះ