អត់រាងចាល! មុខសញ្ញាចាស់ធ្លាប់ជាប់គុករហូតដល់៧លើក ត្រូវសមត្ថកិច្ចចាប់ខ្លួនសារជាថ្មី
- កំពង់ស្ពឺ
ខេត្តកំពង់ស្ពឺ ៖ ជនសង្ស័យចំនួន៣នាក់ជាមុខសញ្ញាចាស់ ពាក់ព័ន្ធករណីគាស់ផ្ទះ និងលួចម៉ូតូរបស់ប្រជាពលរដ្ឋជាច្រើនលើក ត្រូវបានសមត្ថកិច្ចនគរបាលក្រុងច្បារមន សហការជាមួយនគរបាលស្រុកឱរ៉ាល់ ធ្វើការស្ទាក់ចាប់ខ្លួនក្រុមជនសង្ស័យបានដែលធ្លាប់ជាប់ពន្ធនាគារជាច្រើនលើកទៀតផង ប៉ុន្តែមិនរាងចាលឡើយ ។
ការសហការឃាត់ខ្លួនក្រុមជនសង្ស័យជាមុខសញ្ញាគាស់ផ្ទះ និងលួចម៉ូតូរបស់ប្រជាពលរដ្ឋយ៉ាងសកម្ម ធ្វើឡើងកាលពីថ្ងៃទី៤ ខែវិច្ឆិកា ឆ្នាំ២០២៦ ។ នគរបាលខេត្តកំពង់ស្ពឺបាននិយាយឱ្យដឹងថា ក្រុមជនសង្ស័យជាមុខសញ្ញាចាស់ដែលឃាត់ខ្លួនបានមានឈ្មោះ៖ ទី១-ឈ្មោះ កែវ ឈី ភេទប្រុស អាយុ៣៩ឆ្នាំ មុខរបរមិនពិតប្រាកដ រស់នៅក្នុងសង្កាត់រកាធំ ក្រុងច្បារមន ខេត្តកំពង់ស្ពឺ ទី២-ឈ្មោះ វន ណែត ភេទប្រុស អាយុ៤០ឆ្នាំ មុខរបរមិនពិតប្រាកដ រស់នៅក្នុងសង្កាត់រកាធំ ក្រុងច្បារមន ខេត្តកំពង់ស្ពឺ និងទី៣-ឈ្មោះ ជុលប៊ុនធឿន ភេទប្រុស អាយុ៤០ឆ្នាំ មុខរបរមិនពិតប្រាកដ រស់នៅក្នុងសង្កាត់រកាធំ ក្រុងច្បារមន ខេត្តកំពង់ស្ពឺ ។
នគរបាលខេត្តកំពង់ស្ពឺបានបន្តឲ្យដឹងទៀតថា ដោយអនុវត្តតាមបទបញ្ជារបស់លោកស្នងការនគរបាលខេត្តកំពង់ស្ពឺ អធិការដ្ឋាននគរបាលក្រុងច្បារមន បានសហការជាមួយនគរបាលស្រុកឱរ៉ាល់ និងការិយាល័យព្រហ្មទណ្ឌខេត្តបានធ្វើការស្រាវជ្រាវបង្ក្រាបករណីគាស់ផ្ទះ និងលួចម៉ូតូ ឃាត់ខ្លួនជនសង្ស័យជាមុខសញ្ញាចាស់ចំនួន៣នាក់ ។
នគរបាលខេត្តកំពង់ស្ពឺបានបន្តឲ្យដឹងទៀតថា ក្រោយឃាត់ខ្លួនក្រុមជនសង្ស័យ ឈ្មោះ កែវ ឈី ភេទប្រុស អាយុ៣៩ឆ្នាំ រស់នៅសង្កាត់រកាធំ ក្រុងច្បារមន មុខសញ្ញាចាស់ធ្លាប់ជាប់ពន្ធនាគារចំនួន៧លើក (ករណីលួច និងគាស់ផ្ទះ)។
-ឈ្មោះ វន ណែត ភេទប្រុស អាយុ៤០ឆ្នាំ (រស់នៅសង្កាត់រកាធំ ក្រុងច្បារមន) មុខសញ្ញាចាស់ធ្លាប់ជាប់ពន្ធនាគារចំនួន២ដង (ករណីលួច) និងឈ្មោះ ជុល ប៊ុនធឿន ភេទប្រុស អាយុ៤០ឆ្នាំ (រស់នៅសង្កាត់រកាធំ ក្រុងច្បារមន) ជាមុខសញ្ញាចាស់ធ្លាប់ជាប់ពន្ធនាគារ១លើក (ករណីលួចម៉ូតូវត្ថុតាង និងគ្រឿងញៀន)។ក្រោយឃាត់ខ្លួននគរបាលធ្វើការដកហូតវត្ថុតាងជាច្រើន ។
នគរបាលខេត្តកំពង់ស្ពឺបានបញ្ជាក់ឲ្យដឹងថា បច្ចុប្បន្ន ក្រុមជនសង្ស័យរួមជាមួយនឹងវត្ថុតាងនគរបាលបានកសាងសំណុំរឿងបញ្ជូនទៅតុលាការដើម្បីចាត់ការបន្តតាមផ្លូវច្បាប់ ។
ចែករំលែកព័តមាននេះ