ទីក្រុងប៉ារីស៖ បណ្ដាគណបក្សស្ដាំនិយមជ្រុលនៅអឺរ៉ុបពីដំបូងទីត្រូវធាតុគ្នាជាមួយលោកដូណាល់ត្រាំ ។ ប៉ុន្តែបន្ទាប់ពីលទ្ធផលបោះឆ្នោតសភានៅអាមេរិកបង្ហាញថាគណបក្សរបស់លោកទទួលបរាជ័យយ៉ាងធ្ងន់ធ្ងរដោយសារសង្គ្រាមអុីរ៉ង់រួចមក ពួកគេព្យាយាមដកខ្លួនថយយ៉ាងឆ្ងាយជាបណ្ដើរៗ។ ទោះជាបែបនេះក្ដី ពួកគេក៏មិនចង់រិះគន់លោកដោយផ្ទាល់ជាចំហនោះដែរ។ ការកែសម្រួលគោលជំហររបស់បណ្ដាគណបក្សទាំងនោះជាព្រឹត្តិការណ៍គួរឱ្យចាប់អារម្មណ៍ ដ្បិតអីក្រោយជ័យជម្នះរបស់លោកត្រាំកាលពីឆ្នាំ២០២៤ ពួកគេសម្ដែងការអបអរសាទរយ៉ាងកងរំពងដោយប្រៀបប្រដូចថាជ័យជម្នះនេះជាកញ្ចក់ឆ្លុះបញ្ចាំងថាពួកគេក៏អាចនឹងមានឱកាសឈ្នះឆ្នោតនៅអឺរ៉ុបផងដែរ។ បណ្ដាថ្នាក់ដឹកនាំគណបក្សទាំងនោះមួយចំនួនបានធ្វើដំណើរទៅអបអរសាទរដល់ទីក្រុងវ៉ាស៊ីនតោនថែមទៀតផង។
លោកហ្សកដាន បាដេឡា (Jordan Bardella) ជាប្រធាន«គណបក្សសមាជជាតិ» នៅប្រទេសបារាំង។ លទ្ធផលឆ្នោតស្ទង់មតិបង្ហាញថាលោកអាចនឹងក្លាយជាអ្នកបង្កើតរដ្ឋាភិបាលនៅអាណត្តិថ្មី។ ឥឡូវនេះ លោកចាប់ផ្ដើមដកខ្លួនបន្តិចពីជំហរនយោបាយកាលពីមុន។ លោកថ្លែងថានៅអាណត្តិទី២នេះ លោកត្រាំហាក់ដូចជាមិនប្រកាន់នយោបាយការបរទេសមិនពាក់ព័ន្ធនឹងប្រទេសដទៃដូចអាណត្តិទី១ទេ។ ការដែលអាមេរិកធ្វើអន្តរាគមន៍នៅក្នុងបញ្ហាអ៊ីរ៉ង់ធ្វើឱ្យមានផលវិបាកយ៉ាងធ្ងន់ធ្ងរជាទីបំផុតចំពោះសេដ្ឋកិច្ចពិភពលោក។ លោកថ្លែងដូច្នេះដោយមិនបញ្ចេញឈ្មោះលោកដូណាល់ត្រាំនោះឡើយ។
ក្រឡេកទៅមើលបក្សស្ដាំនិយមនៅអាល្លឺម៉ង់វិញម្ដង។ លោកស្រីអាលីស វ៉ៃដែល (Alice Weidel) ជាសហស្ថាបនិកគណបក្សស្ដាំនិយមជ្រុលអាល្លឺម៉ង់ «ជម្រើសថ្មីសម្រាប់អាល្លឺម៉ង់ (AfD)»។ លោកស្រីក៏យល់ថាការចាញ់ឆ្នោតរបស់គណបក្សសាធារណរដ្ឋនៅអាមេរិកបណ្ដាលមកពីសង្គ្រាមអ៊ីរ៉ង់ផងដែរ។ លោកស្រីថ្លែងថាលោកដូណាល់ត្រាំធ្លាប់សន្យាថានឹងមិនអនុវត្តនយោបាយការបរទេសបែបជ្រៀតជ្រែកកិច្ចការប្រទេសដទៃទេ។ ការក្បត់សន្យានេះហើយដែលតាមលងបន្លាចពួកអ្នកសាធារណរដ្ឋនិយម។ លោកស្រីថ្លែងដូច្នេះប្រាប់សារព័ត៌មាន T-Online។
លោកដូណាល់ត្រាំទទួលស្គាល់ថាសង្គ្រាមអ៊ីរ៉ង់ពិតជាមានចំណែកធ្វើឱ្យគណបក្សរបស់លោកចាញ់ឆ្នោតមែន។ ប៉ុន្តែលោកនៅតែប្រកាន់ជំហរដដែលចំពោះសង្គ្រាមនេះ។ នៅអ៊ីតាលី លោកម៉ាត់តេអូ សាល់វីនី (Matteo Salvini) ជាប្រធានគណបក្សស្ដាំនិយមជ្រុល League Party ដែលចូលរួមនៅក្នុងរដ្ឋាភិបាលចម្រុះរបស់លោកស្រីមេឡូនី (Meloni)។ លោកថ្លែងថាសង្គ្រាមគឺជាកត្តាគ្រប់យ៉ាងដែលជះឥទ្ធិពលលើលទ្ធផលបោះឆ្នោតនៅអាមេរិក, ជះឥទ្ធិពលលើភាពតានតឹងនៅលើឆាកអន្តរជាតិ និងជះឥទ្ធិពលលើការចំណាយកាន់តែច្រើនឡើងៗទៅលើជីវិតរស់នៅប្រចាំថ្ងៃ។ នៅទីបញ្ចប់ អ្នកដែលទទួលរងផលវិបាកអស់ទាំងនេះដោយផ្ទាល់គឺប្រជាពលនោះឯង៕ ប្រភព៖ Reuters
ចែករំលែកព័តមាននេះ