កោះប៉ែន ដីចម្ការថ្នាំ ពេលនេះបានអភិវឌ្ឍទៅជាផ្លូវបេតុងអស់ហើយ
- កំពង់ចាម
ខេត្តកំពង់ចាម ៖ នៅតាមភូមិឋាននានាក្នុងឃុំកោះមិត្ត ស្រុកកំពង់សៀម ពីមុនជាប្រភេទផ្លូវដីហុយក្នុងរដូវប្រាំងនិងបែកភក់នៅរដូវវស្សាពិបាកក្នុងការធ្វើដំណើរ។
ដោយមានការយកចិត្តទុកដាក់ពីសំណាក់អាជ្ញាធរមូលដ្ឋានក៏ដូចជាអង្គភាពពាក់ព័ន្ធបានប្រែក្លាយទៅជាផ្លូវបេតុងពីមួយឆ្នាំទៅមួយឆ្នាំមកដល់សព្វថ្ងៃនេះគឺសឹងតែ១០០% ទៅហើយបានអភិវឌ្ឍន៍ទៅជាផ្លូវបេតុងបង្ករភាពងាយស្រួលដល់ពលរដ្ឋដឹកកសិផលទៅកាន់ទីផ្សារបានដោយងាយស្រួល។
លោកវ៉ែន នាង មេឃុំកោះមិត្ត មានប្រសាសន៍ឲ្យដឹងនារសៀលថ្ងៃទី៥ វិច្ឆិកា ឆ្នាំ២០២៦ ថា រូបលោកបានត្រូវប្រជាពលរដ្ឋបោះឆ្នោតគាំទ្រជាមេឃុំបន្តបន្ទាប់តាំងពីអាណិតទីមួយមកដល់អាណត្តិទីប្រាំ។ ក្នុងមូលដ្ឋានរបស់លោកពីមុនគឺមានតែការអភិវឌ្ឍន៍ក្នុងនោះរួមមានអណ្ដូងទឹក ប្រឡាយ ផ្លូវដីសម្រាប់ឱ្យបងប្អូនប្រជាពលរដ្ឋនៅក្នុងភូមិកោះចាស់ កោះព្រលួង កំពង់ត្រុំលើ កំពង់ត្រុំក្រោម កោះប៉ែន ដើម្បីឱ្យពលរដ្ឋធ្វើដំណើរកាត់តាមភូមិមួយទៅភូមិមួយមានភាពងាយស្រួលដែលក្នុងគ្រានោះគឺមានរទេះសេះសម្រាប់ដឹកបន្លែបង្ការ ឬថ្នាំជក់ជាដើមទៅកាន់ទីផ្សារ។
លោកមេឃុំកោះមិត្តមានប្រសាសន៍បន្តឲ្យដឹងទៀតថា នៅក្នុងអំឡុងឆ្នាំ២០១២ ពេលដែលអភិវឌ្ឍន៍ផ្លូវដីទៅជាផ្លូវបេតុងដំបូងគឺធ្វើឡើងនៅក្បាលកោះប៉ែន ហើយក្រោយមកទៀតក៏បានធ្វើនៅតាមភូមិផ្សេងៗតាមគម្រោងមូលនិធិរបស់ឃុំដែលថ្នាក់ជាតិបានទម្លាក់មកជារៀងរាល់ឆ្នាំតាមទំហំទឹកប្រាក់ក្នុងរង្វង់ជាង១០០លាន រហូតដល់ជាង៥០០ លានរៀល ត្រូវបានដាក់ឲ្យដេញថ្លៃជាសាធារណៈធ្វើឡើងនៅសាលាឃុំកោះមិត្តឬនៅសាលាស្រុកកំពង់សៀមជាដើម។
ជាមួយនោះពេលខ្លះក្រុមហ៊ុនដេញថ្លៃមានការប្រកួតប្រជែងយកឈ្នះចាញ់រាងខ្លួនធ្វើឲ្យចុះច្រើនហើយថវិកានៅសល់ត្រូវបានដាក់ឲ្យដេញថ្លៃដើម្បីស្ថាបនាផ្លូវបេតុងបន្ថែមនៅតាមភូមិក្នុងឃុំកោះមិត្ត។
លោកវ៉ែន នាង មេឃុំកោះមិត្ត បញ្ជាក់ថា សម្រាប់ផ្លូវបេតុងដែលបានស្ថាបនាក្នុងឆ្នាំ២០២៦កន្លងទៅមានប្រវែង៧០០ ម៉ែត្រនៅក្បាលកោះប៉ែន តភ្ជាប់ចុះទៅរមណីយដ្ឋានឆ្នេរខ្សាច់កោះប៉ែន។សម្រាប់គម្រោងផ្លូវបេតុងឆ្នាំ២០២៧ គឺត្រូវធ្វើឡើងផ្លូវទៅដល់ចំការរបស់ពលរដ្ឋមានន័យថាផ្លូវបេតុងគឺបានអភិវឌ្ឍសឹងតែ១០០% ក្នុងពេលអនាគតដល់ឆាប់គឺនឹងពង្រីកផ្លូវបេតុងឱ្យលើសពីទំហំ៤ម៉ែត្រ ដើម្បីងាយស្រួលដល់ប្រជាពលរដ្ឋធ្វើដំណើរក្នុងរដូវបុណ្យទានផ្សេងៗ។
លោកមេឃុំលើកឡើងថា ជារឿយៗមានភ្ញៀវបរទេសតែងតែជិះម៉ូតូឬក៏តុកតុកជាលក្ខណៈគ្រួសារមកមើលទេសភាពនានានៅកោះប៉ែន ក្នុងនោះរួមទាំងពីការរស់នៅបែបសាមញ្ញរបស់ពលរដ្ឋទៀតផង។សូមបញ្ជាក់ថាពីមុនអ្នកកោះប៉ែនធ្វើដំណើរមកកំពង់ចាមតាមប្រដឹសឬស្សីក្នុងរដូវប្រាំងនិងកាណូតឆ្លងនៅរដូវវស្សា តែពេលនេះវិស្វករខ្មែរបានស្ថាបនាស្ពានបេតុងកាត់ទន្លេមេគង្គពីត្រើយកំពង់ចាមមកកោះមិត្តបានទាំងថ្ងៃទាំងយប់ងាយស្រួលមិនពិបាកដូចមុនទៀតទេ ៕






ចែករំលែកព័តមាននេះ