ឆ្មាំទន្លេអភិរក្សសត្វផ្សោតនៅសៀមបូក ស្ម័គ្រចិត្តលែងត្រីត្រសក់ចូលទន្លេធម្មជាតិ ដើម្បីចូលរួមអភិរក្សធនធានជលផល
- ស្ទឹងត្រែង
ខេត្តស្ទឹងត្រែង ៖ ក្រុមឆ្មាំទន្លេអភិរក្សសត្វផ្សោតប៉ុស្តិ៍កោះសំពាយ-សៀមបូក បានស្ម័គ្រចិត្តលែងត្រីត្រសក់ ដែលជាប្រភេទធនធានជលផល កំពុងរងការគំរាមកំហែងចូលទៅក្នុងដែនទឹកធម្មជាតិនៃទន្លេមេគង្គវិញ ដែលជាសកម្មភាពមួយបង្ហាញពីការចូលរួមយ៉ាងសកម្មរបស់កម្លាំងមូលដ្ឋានក្នុងការការពារ និងអភិរក្សធនធានជលផល ។

សកម្មភាពនេះ ត្រូវបានខណ្ឌរដ្ឋបាលជលផលខេត្តស្ទឹងត្រែងចាត់ទុកថា ជាការចូលរួមដ៏មានសារសំខាន់ក្នុងការថែរក្សាធនធានជលផល ជាពិសេស ប្រភេទត្រីដែលកំពុងប្រឈមនឹងការថយចុះចំនួន និងត្រីមេពូជដែលមានតួនាទីសំខាន់ក្នុងការបន្តពូជ និងរក្សាតុល្យភាពប្រព័ន្ធអេកូឡូស៊ីក្នុងទន្លេ ។

តាមការលើកឡើងរបស់ខណ្ឌរដ្ឋបាលជលផលស្ទឹងត្រែង សកម្មភាពស្ម័គ្រចិត្តលែងត្រីត្រសក់នេះ គឺជាគំរូវិជ្ជមានមួយដែលបង្ហាញពីស្មារតីទទួលខុសត្រូវរបស់ក្រុមឆ្មាំទន្លេ ចំពោះធនធានធម្មជាតិ និងការយកចិត្តទុកដាក់លើការអភិរក្សប្រភេទជលផលដែលមានសារសំខាន់ចំពោះជីវចម្រុះក្នុងប្រព័ន្ធទន្លេមេគង្គ ។

ជាមួយគ្នានេះ ខណ្ឌរដ្ឋបាលជលផលស្ទឹងត្រែង ក៏បានអំពាវនាវដល់ប្រជានេសាទ សហគមន៍នេសាទ និងសាធារណជនទូទៅ ឱ្យបន្តចូលរួមការពារធនធានជលផល ដោយចៀសវាងការចាប់ ឬធ្វើអាជីវកម្មលើប្រភេទត្រីកំពុងរងគ្រោះថ្នាក់ និងត្រីមេពូជសំខាន់ៗ ព្រមទាំងចូលរួមលែងត្រីទាំងនេះទៅក្នុងជម្រកធម្មជាតិវិញ នៅពេលមានការចាប់បានដោយចៃដន្យ និងអាចលែងបានដោយសុវត្ថិភាព ។

ការចូលរួមរបស់កម្លាំងអភិរក្ស សហគមន៍មូលដ្ឋាន និងប្រជានេសាទត្រូវបានចាត់ទុកថា ជាកត្តាសំខាន់ក្នុងការកាត់បន្ថយសម្ពាធលើធនធានជលផល និងរួមចំណែករក្សាចំនួនប្រភេទត្រីក្នុងទន្លេមេគង្គឱ្យមាននិរន្តរភាព សម្រាប់បរិស្ថាន និងជីវភាពប្រជាពលរដ្ឋក្នុងតំបន់នាពេលអនាគត ៕

ចែករំលែកព័តមាននេះ